ଭୁବନେଶ୍ବର,୧୯ା୯(ବ୍ୟୁରୋ):ରାଜ୍ୟରେ ଉଚ୍ଚଶିକ୍ଷାରେ ଆସନ ସଂରକ୍ଷଣ ବିଷୟ ନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ରବିବାର ପୂର୍ବତନ କେନ୍ଦ୍ରମନ୍ତ୍ରୀ ଶ୍ରୀକାନ୍ତ ଜେନା ଚିଠି ଲେଖିଛନ୍ତି। ସେ ତାଙ୍କ ଚିଠିରେ ଉଲ୍ଲେଖ କରିଛନ୍ତି ଯେ, ରାଜ୍ୟର ମୋଟ ଜନସଂଖ୍ୟାର ୬ ପ୍ରତିଶତ ହେଉଛନ୍ତି ସାଧାରଣବର୍ଗ। ରାଜ୍ୟ ସରକାର ଏହି ବର୍ଗର ଗରିବ ଛାତ୍ରୀଛାତ୍ରଙ୍କ ପାଇଁ ୧୦ ପ୍ରତିଶତ ସିଟ୍ ଉଚ୍ଚଶିକ୍ଷାରେ ସଂରକ୍ଷଣ ବ୍ୟବସ୍ଥାର ଘୋଷଣା କରିଛନ୍ତି। ହେଲେ ରାଜ୍ୟର ପଛୁଆ ବର୍ଗ ଜନସଂଖ୍ୟା ୫୪ ପ୍ରତିଶତ । ଏହି ବର୍ଗର ଛାତ୍ରୀଛାତ୍ରଙ୍କ ପାଇଁ ଉଚ୍ଚଶିକ୍ଷାରେ ଆଦୌ ସଂରକ୍ଷଣ ନାହିଁ। ସମଗ୍ର ଦେଶରେ ଏହି ବର୍ଗର ଛାତ୍ରୀଛାତ୍ରମାନେ ୨୭ ପ୍ରତିଶତ ସଂରକ୍ଷଣ ସୁବିଧା ଗତ ୨୦ ବର୍ଷ ହେଲା ପାଉଛନ୍ତି। ରାଜ୍ୟରେ ମଣ୍ଡଳ କମିଶନ ଲାଗୁ କରାଯାଇଥିଲେ ଏହି ବର୍ଗରୁ ଅତିକମ୍ରେ ୫ ହଜାର ଡାକ୍ତର ଏବଂ ୧୫ରୁ ୨୦ ହଜାର ଇଞ୍ଜିନିୟର ହୋଇପାରି ଥାଆନ୍ତେ। ରାଜ୍ୟ ଜନସଂଖ୍ୟାର ୪୦ ପ୍ରତିଶତ ହେଉଛନ୍ତି ଅନୁସୂଚିତ ଜାତି ଓ ଜନଜାତି । ଉଚ୍ଚଶିକ୍ଷା କ୍ଷେତ୍ରରେ ଏହି ବର୍ଗର ଛାତ୍ରୀଛାତ୍ରଙ୍କ ପାଇଁ ୨୦ ପ୍ରତିଶତ ସଂରକ୍ଷଣ, ଯାହା ଅତିକମ୍ରେ ୩୮.୫ ପ୍ରତିଶତ ହେବା କଥା। ମୁଖ୍ୟମନ୍ତ୍ରୀ କାହିଁକି ପଛୁଆ ଏବଂ ଅନୁସୂଚିତ ଜାତି ଓ ଜନଜାତି ଛାତ୍ରୀଛାତ୍ରଙ୍କ ସାମ୍ବିଧାନିକ ଅଧିକାରରୁ ସେମାନଙ୍କୁ ବଞ୍ଚିତ କରୁଛନ୍ତି ବୋଲି ଜେନା ପ୍ରଶ୍ନ କରିଛନ୍ତି। ରାଜ୍ୟବାସୀଙ୍କୁ ମୁଖ୍ୟମନ୍ତ୍ରୀ ଏନେଇ ସ୍ପଷ୍ଟୀକରଣ ଦିଅନ୍ତୁ ବୋଲି ମଧ୍ୟ ସେ ଯୁକ୍ତି ରଖିଛନ୍ତି।
