ଦୁବାଇ, ୨୪।୯: ଆଇପିଏଲ୍-୧୩ତମ ସଂସ୍କରଣର ୬ଷ୍ଠ ମ୍ୟାଚ୍ରେ ଗୁରୁବାର କିଙ୍ଗ୍ସ ଇଲେଭେନ ପଞ୍ଜାବର ମୁକାବିଲା ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆର୍ସିବି) ସହ ହେବ। ସ୍ଥାନୀୟ ଦୁବାଇ ଇଣ୍ଟର ନ୍ୟାଶନାଲ କ୍ରିକେଟ୍ ଷ୍ଟାଡିୟମରେ ଖେଳାଯିବାକୁ ଥିବା ଏହି ମ୍ୟାଚ୍ ପୂର୍ବରୁ ବିରାଟ କୋହଲିଙ୍କ ନେତୃତ୍ୱାଧୀନ ଆର୍ସିବି ଦଳକୁ ଝଟ୍କା ଲାଗିଛି। ଦଳର ଷ୍ଟାର୍ ଅଲ୍ରାଉଣ୍ଡର କ୍ରିସ୍ ମୋରିସ ଆଘାତଜନିତ ସମସ୍ୟା ଲାଗି ପଞ୍ଜାବ ବିପକ୍ଷ ଏହି ମ୍ୟାଚ୍ ଖେଳିବେ ନାହିଁ ବୋଲି ଆର୍ସିବି ପକ୍ଷରୁ ସୂଚନା ଦିଆଯାଇଛି। ‘ମୋରିସଙ୍କ ଅନୁପସ୍ଥିତିରେ ଆମ ଦଳର ସନ୍ତୁଳନରେ ଏକ ବଡ଼ ପାର୍ଥକ୍ୟ ସୃଷ୍ଟି ହୋଇଛି। ସେ ଏଭଳି ଜଣେ ଖେଳାଳି ଥିଲେ ଯିଏକି ବ୍ୟାଟିଂ, ବୋଲିଂ ଓ ଫିଲ୍ଡିଂରେ ବେଶ୍ ଦକ୍ଷ ଥିଲେ’ ବୋଲି ବାଙ୍ଗାଲୋର ଦଳର ଡାଇରେକ୍ଟର ଅଫ୍ କ୍ରିକେଟ୍ ମାଇକ ହେସେନ କହିଛନ୍ତି। ଏଠାରେ ଉଲ୍ଲେଖଯୋଗ୍ୟ, ଖେଳାଳି ନିଲାମୀରେ ବାଙ୍ଗାଲୋର ମୋରିସଙ୍କୁ ୧୦ କୋଟି ଟଙ୍କା ମୂଲ୍ୟରେ କ୍ରୟ କରିଥିଲା। ଚଳିତ ସିଜନରେ ସେ ଦଳ ପାଇଁ ଜଣେ ପ୍ରମୁଖ ଖେଳାଳି ଥିଲେ।