କୋଲକାତା, ୨୫।୨ : ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ଙ୍କଠାରୁ ଖରାପ ସମୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପାଇଁ ଅପେକ୍ଷା କରିଛି ବୋଲି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ବୁଧବାର କହିଛନ୍ତି। ତାଙ୍କ ପୁତୁରା ତଥା ଟିଏମ୍ସି ଏମ୍ପି ଅଭିଷେକ ବାନାର୍ଜୀଙ୍କ ସ୍ତ୍ରୀ ରୁଜିରାଙ୍କୁ ସିବିଆଇ ତଦନ୍ତରେ ସାମିଲ କରାଯାଇଥିବାରୁ ମମତା ଭାଜପାକୁ କଡ଼ା ସମାଲୋଚନା କରିଥିଲେ। ପଶ୍ଚିମବଙ୍ଗର ହୁଗ୍ଲିଠାରେ ଏକ ନିର୍ବାଚନୀ ସଭାକୁ ସମ୍ବୋଧିତ କରିବା ଅବସରରେ ତୃଣମୂଳ କଂଗ୍ରେସ ନେତ୍ରୀ ପ୍ରଧାନମନ୍ତ୍ରୀ ମୋଦିଙ୍କୁ ଦେଶର ସବୁଠୁ ବଡ଼ ଦଙ୍ଗାବାଜ୍ ଓ ଦୈତ୍ୟ କହିଥିଲେ। ଗତବର୍ଷ ନଭେମ୍ବରରେ ଅନୁଷ୍ଠିତ ଆମେରିକା ରାଷ୍ଟ୍ରପତି ନିର୍ବାଚନରେ ଟ୍ରମ୍ପ୍ ପରାଜିତ ହୋଇଥିଲେ। ଆଗାମୀ ଦିନରେ ମୋଦିଙ୍କ ପାଇଁ ଏହାଠାରୁ ଆହୁରି ଖରାପ ସମୟ ଅପେକ୍ଷା କରିଛି। ମମତା ଗୋଲ୍କିପର ହେବେ ଏବଂ ଭାଜପାକୁ ଗୋଟିଏ ବି ଗୋଲ୍ ସ୍କୋର କରିବାକୁ ଦେବେନାହିଁ ବୋଲି କହିଥିଲେ।
ଟିଏମ୍ସିରେ ମନୋଜ ତିଓ୍ବାରୀ
ପଶ୍ଚିମବଙ୍ଗ ବିଧାନସଭା ନିର୍ବାଚନ ପୂର୍ବରୁ କ୍ରିକେଟର ମନୋଜ ତିଓ୍ବାରୀ ବୁଧବାର ତୃଣମୂଳ କଂଗ୍ରେସ (ଟିଏମ୍ସି)ରେ ସାମିଲ ହୋଇଛନ୍ତି। ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଉପସ୍ଥିତିରେ ସେ ଦଳରେ ଯୋଗଦେଇଥିଲେ। ଭାଜପା ବିଭାଜନ ରାଜନୀତି ଚଳାଇଥିବାବେଳେ ମମତା ବାନାର୍ଜୀ ଲୋକଙ୍କୁ ଏକାଠି କରିବା ଲାଗି ଉଦ୍ୟମ ଚଳାଇଥିବା ମନୋଜ କହିଥିଲେ। ସେ କୌଣସି ଅଞ୍ଚଳ ଭିତ୍ତିରେ ନୁହେଁ ବରଂ ଦେଶ ପାଇଁ କ୍ରିକେଟ ଖେଳୁଥିଲେ। ଆଜିଠାରୁ ଏକ ନୂଆ ଯାତ୍ରା ଆରମ୍ଭ ହେଲା ବୋଲି ସେ ଟୁଇଟ୍ କରିଛନ୍ତି।