ପୁରୀ ଅଫିସ,୧୧।୭: ଆଉ ୨ଦିନ ପରେ ମହାପ୍ରଭୁଙ୍କ ରଥଯାତ୍ରା। ଶୃଙ୍ଖଳିତ ରଥଯାତ୍ରା କରିବା ଉଦ୍ଦେଶ୍ୟରେ ଶନିବାର ଆଇନ ଶୃଙ୍ଖଳା ବିଭାଗର ଅତିରିକ୍ତ ପୋଲିସ ମହାନିର୍ଦ୍ଦେଶକ(ଏଡିଜି) ଆର୍. କେ. ଶର୍ମା ଚୂଡ଼ାନ୍ତ ସ୍ଥିତି ସମୀକ୍ଷା କରିଛନ୍ତି। ଏ ନେଇ ପୋଲିସ ପ୍ରଶାସନ ପକ୍ଷରୁ ଶେଷ ପ୍ରସ୍ତୁତି ବୈଠକ ହୋଇଛି। ରଥଯାତ୍ରାରେ ନିୟୋଜିତ ହେବାକୁ ଥିବା ସମସ୍ତ ପୋଲିସ ଅଧିକାରୀଙ୍କ ଉପସ୍ଥିତିରେ ପୋଲିସ ମୁତୟନ ସମ୍ପର୍କିତ କଡ଼ା ନିୟମ କରିବାକୁ ନିର୍ଦ୍ଦେଶ ଦେଇଛନ୍ତି। ଏସ୍ପି କନୱର ବିଶାଲ ସିଂଙ୍କ ଉପସ୍ଥିତିରେ ପୋଲିସ ଅଧିକାରୀମାନଙ୍କୁ କଟକଣାକୁ ପାଳନ କରାଇବା ପାଇଁ ଦାୟିତ୍ୱ ଦିଆଯାଇଛି। ପୋଲିସ ମୁତୟନ ଦୃଷ୍ଟିରୁ ବଡ଼ଦାଣ୍ଡକୁ ୪ଟି ଜୋନ୍ରେ ବିଭକ୍ତ କରାଯାଇଥିବା ବେଳେ ପୂରା ସହରକୁ ୧୨ଟି ଜୋନ୍ରେ ବିଭକ୍ତ କରାଯାଇଛି। ୬୫ ପ୍ଲାଟୁନ୍ ଫୋର୍ସ ମୁତୟନ ହେବା ନେଇ ଏଡିଜି ଶର୍ମା କହିଛନ୍ତି। ଶ୍ରୀମନ୍ଦିର ନିକଟବର୍ତ୍ତୀ ଅଞ୍ଚଳକୁ ୧ ନମ୍ବର ଓ ଶ୍ରୀଗୁଣ୍ଡିଚା ନିକଟବର୍ତ୍ତୀ ଅଞ୍ଚଳକୁ ୪ ନମ୍ବର ଜୋନ୍ରେ ରଖାଯାଇଥିବା ବେଳେ ମାର୍କେଟ ଛକ ଓ ମେଡିକାଲ ଛକକୁ ଯଥାକ୍ରମେ ୨ ଓ ୩ ନମ୍ବର ଜୋନ୍ରେ ରଖାଯାଇଛି। ଏହି ୪ଟି ଜୋନ୍ରେ ସୁରକ୍ଷା ବ୍ୟବସ୍ଥା ଅତ୍ୟନ୍ତ କଡ଼ାକଡ଼ି ରହିବା ନେଇ ଆଇନଶୃଙ୍ଖଳା ଏଡିଜି ସୂଚନା ଦେଇଛନ୍ତି। ସେହିଭଳି ଶ୍ରୀମନ୍ଦିର ଚାରିପାଖକୁ ୬ଟି ଜୋନ୍ ଓ ବଡ଼ଦାଣ୍ଡ ବାହାର ଅଞ୍ଚଳକୁ ୨ଜୋନ୍ରେ ରଖାଯାଇଛି।
ରଥ ସୁରକ୍ଷା ବଳୟ ପାଇଁ ଜଣେ ଅତିରିକ୍ତ ଏସ୍ପି, ୩ ଡିଏସ୍ପି, ୬ ଇନ୍ସପେକ୍ଟର ଓ ୧୮ଜଣ ସବଇନ୍ସପେକ୍ଟରଙ୍କୁ ଦାୟିତ୍ୱରେ ରଖାଯାଇଛି। ଏହାବ୍ୟତୀତ ରଥ ସୁରକ୍ଷା ଦାୟିତ୍ୱରେ ୧୮ ସେକ୍ସନ୍ ପୋଲିସ ମୁତୟନ ହେବେ। ରଥଟଣା ହେବା ବେଳେ ଏହାର ଚାରିପାଖରେ ରଖାଯାଇଥିବା ସୁରକ୍ଷା ବଳୟ ଦାୟିତ୍ୱରେ ୩ଜଣ ଅତିରିକ୍ତ ଏସ୍ପି, ୩ ଡିଏସ୍ପି, ୯ ଇନ୍ସପେକ୍ଟର, ୯ ସବ୍ଇନ୍ସପେକ୍ଟର ଓ ୨୧ ସେକ୍ସନ୍ର ଫୋର୍ସ ମୁତୟନ ହେବେ। ଏହିଭଳି ଭାବରେ ୧୧ଟି ଜୋନ୍ ପାଇଁ ମଧ୍ୟ ପୋଲିସ ମୁତୟନର ବ୍ୟାପକ ବ୍ୟବସ୍ଥା ହୋଇଛି। ଛାତ ଉପରେ ହୋଇଥିବା ସୁରକ୍ଷା ବ୍ୟବସ୍ଥା ପାଇଁ ୫୫୪ଜଣ ହୋମଗାର୍ଡଙ୍କୁ ଦାୟିତ୍ୱ ଦିଆଯାଇଛି। ସେହିଭଳି ମୋବାଇଲ ଭ୍ୟାନ୍, କଣ୍ଟ୍ରୋଲ ଓ ସବ୍କଣ୍ଟ୍ରୋଲ୍ ରୁମ୍ ଓ ଜରୁରିକାଳୀନ ସ୍ଥିତି ପାଇଁ ମଧ୍ୟ ପୋଲିସ ଫୋର୍ସ ମୁତୟନ ହେବେ। ସର୍ବମୋଟ୍ ଅତିରିକ୍ତ ଏସ୍ପି ପାହ୍ୟାର ୧୦ଜଣ, ଡିଏସ୍ପି ପାହ୍ୟାର ୩୧ଜଣ, ଇନ୍ସପେକ୍ଟର ୬୪ ଓ ସବଇନ୍ସପେକ୍ଟର ଓ ଏଏସ୍ଆଇ ୨୨୨ଜଣ ରଥଯାତ୍ରା କାର୍ଯ୍ୟରେ ନିୟୋଜିତ ହେବେ। ସମୁଦାୟ ୩୨୭ଜଣ ପୋଲିସ ଅଧିକାରୀଙ୍କୁ ରଥଯାତ୍ରାରେ ମୁତୟନ କରାଯିବ। ସେହିଭଳି ୧୮୨ଜଣ ହାବିଲଦାର, ୫୬ ଏପିଆର୍, ୬୫ ପ୍ଲାଟୁନ୍ ଫୋର୍ସ ଓ ୭୩୮ଜଣ ହୋମଗାର୍ଡଙ୍କୁ ନିୟୋଜିତ କରାଯିବ।
ଅନ୍ୟପକ୍ଷେ ସିସିଟିଭି କ୍ୟାମେରାର ମଧ୍ୟ ବ୍ୟବସ୍ଥା ହୋଇଛି। ଶ୍ରୀମନ୍ଦିରରୁ ଗୁଣ୍ଡିଚା ମନ୍ଦିର ପର୍ଯ୍ୟନ୍ତ ରାସ୍ତାରେ ୨୫ଟି ସିସିଟିଭି କ୍ୟାମେରା ଲଗାଯିବ। ଏଥିସହ ଶ୍ରୀମନ୍ଦିର ଚତୁଃପାର୍ଶ୍ୱ ଏବଂ ବଡ଼ଦାଣ୍ଡରେ ମଧ୍ୟ ମୋବାଇଲ ମ୍ୟାନ(ପୋଲିସ କର୍ମଚାରୀ) ଭାବେ ନଜର ରଖିବେ। ବୈଠକ ପରେ ସନ୍ଧ୍ୟାରେ ପୁରୀ ଏସ୍ପି ପୂରା ଟିମ୍ର ଅଧିକାରୀମାନଙ୍କ ସହ ବଡ଼ଦାଣ୍ଡରେ ଚାଲିଚାଲି ଏଡିଜି ସ୍ଥିତି ସମୀକ୍ଷା କରିଛନ୍ତି। ସନ୍ଧ୍ୟାରେ ଏସପି ସବୁ ଅଧିକାରୀମାନଙ୍କୁ ନିର୍ଦ୍ଧାରିତ ଛକଗୁଡ଼ିକରେ ରହିବା ନିର୍ଦ୍ଦେଶ ଦେଇ ସୁରକ୍ଷା ବ୍ୟବସ୍ଥାର ସମୀକ୍ଷା କରିଛନ୍ତି। ସେହିଭଳି ପାର୍କିଂ ବ୍ୟବସ୍ଥାକୁ ନେଇ ପୋଲିସ ପ୍ରଶାସନ ପକ୍ଷରୁ ସ୍ବତନ୍ତ୍ର ବ୍ୟବସ୍ଥା ହୋଇଛି। ଗଣମାଧ୍ୟମ ପ୍ରତିନିଧି, ଶ୍ରୀମନ୍ଦିର ଓ ଜିଲା ପ୍ରଶାସନର କର୍ମଚାରୀମାନଙ୍କ ପାଇଁ ଶ୍ରୀମନ୍ଦିର ନିକଟବର୍ତ୍ତୀ ସ୍ଥାନରେ ବ୍ୟବସ୍ଥା ହୋଇଛି। ଅନ୍ୟପକ୍ଷରେ ସେବାୟତମାନେ ଦୁଇ ଚକିଆ ଯାନ ନେଇ ଆସିଲେ ସମ୍ପୃକ୍ତ ଗଳି ନିକଟରେ ଗାଡ଼ି ରଖିବେ ବୋଲି ସୂଚନା ମିଳିଛି। ସେହିଭଳି କର୍ଫ୍ୟୁ ସମୟରେ ଜନତାଙ୍କ ଜରୁରିକାଳୀନ ସମସ୍ୟା ପାଇଁ ଗ୍ରୀନ୍ କରିଡର ଓ ପୋଲିସ ଅଧିକାରୀଙ୍କୁ ମୁତୟନ କରାଯାଇଛି। ସହରବାସୀ ବିନା ଜରୁରିକାଳୀନ ସ୍ଥିତିରେ ଘରୁ ନ ବାହାରି ସିଧା ପ୍ରସାରଣ ମାଧ୍ୟମରେ ରଥଯାତ୍ରା ଦେଖିବା ପାଇଁ ପୋଲିସ ପ୍ରଶାସନ ଅନୁରୋଧ କରିଛି।