କେନ୍ଦୁଝର,୧୧ା୧(ସ୍ବ.ପ୍ର.): କେନ୍ଦୁଝର ଜିଲା ହରିଚନ୍ଦନପୁର ବ୍ଲକ ତେନ୍ତଳାପଶି ପଞ୍ଚାୟତ ବଡ଼କମଣ୍ଡରା ସ୍କୁଲରେ ବର୍ଷାଧିକ ଧରି ଶିକ୍ଷକ ଅଭାବ ନେଇ ଚାଲିଥିବା ଆନ୍ଦୋଳନ ତୃତୀୟ ଦିନରେ ସ୍କୁଲ କମିଟି,ଅଭିଭାବକ, ହରିଚନ୍ଦନପୁର ଶିକ୍ଷା ବିଭାଗ ମଧ୍ୟରେ ଆପୋସ ଆଲୋଚନା ମାଧ୍ୟମରେ ସମାଧାନ ହୋଇଛି। ତେନ୍ତଳାପଶି ସିଆରସିସି ମାନସ ସେଠୀଙ୍କ ପ୍ରତିଶ୍ରୁତି ଅନୁଯାୟୀ ହରିଚନ୍ଦନପୁର ଏବିଇଓ ବିକଳ ଚରଣ ସାହୁ ବୁଧବାର ବିଦ୍ୟାଳୟରେ ପହଞ୍ଚିଥିଲେ। ପୂର୍ବଥର ସେ ତାଙ୍କ ଲିଖିତ ପ୍ରତିଶ୍ରୁତି ପାଳନ କରି ନ ଥିବାରୁ ଗ୍ରାମବାସୀ ବିରକ୍ତି ପ୍ରକାଶ କରିବା ସହିତ ୩ ଶିକ୍ଷକଙ୍କ ପାଇଁ ଜିଦ୍ ଧରି ବସିଥିଲେ। ବିକଳ ସାହୁ ପୂର୍ବ ଭୁଲ୍କୁ ସ୍ବୀକାର କରିବା ସହ ନୂତନ ଭାବେ ନିଯୁକ୍ତ ସ୍ମୃତିରଞ୍ଜନ ସେଠୀ ଆଉ ଜଣେ ଶିକ୍ଷକ ନ ଆସିବା ପର୍ଯ୍ୟନ୍ତ ସ୍କୁଲ ଛାଡ଼ିବେ ନାହିଁ ବୋଲି ଲିଖିତ ପ୍ରତିଶ୍ରୁତି ଦେବା ସହିତ ନୂତନ ଶିକ୍ଷକ ନିଯୁକ୍ତି ହେଲେ ଆଉ ଜଣେ ଶିକ୍ଷକଙ୍କୁ ନିଯୁକ୍ତି ଦେବାକୁ କହିଥିଲେ। ପ୍ରତିଶ୍ରୁତି ପାଇବା ପରେ ଗ୍ରାମବାସୀ ସ୍କୁଲ ଫାଟକ ଖୋଲିଥିଲେ। ଫାଟକ ଖୋଲିବାରୁ ସ୍କୁଲରେ ଦୁଇ ଦିନ ଧରି ବନ୍ଦ ଥିବା ଶିକ୍ଷାଦାନ ଚାଲିବା ସହିତ,ମଧ୍ୟାହ୍ନଭୋଜନ ମଧ୍ୟ ଚାଲୁ ହୋଇଥିଲା।
ପ୍ରକାଶଥାଉ କି, ବଡ଼କମଣ୍ଡରା ସ୍କୁଲରେ ୫ଟି ଶ୍ରେଣୀରେ ୧୧୧ ଜଣ ଛାତ୍ରୀଛାତ୍ର ପଢୁଥିଲା ବେଳେ ବର୍ଷେରୁ ଅଧିକ ସମୟ ହେବ ଜଣେ ମାତ୍ର ଶିକ୍ଷୟିତ୍ରୀ ଥିବାରୁ ପାଠପଢ଼ା ସମ୍ପୂର୍ଣ୍ଣ ଠପ୍ ହେଇଯାଇଥିବା ଅଭିଯୋଗରେ ଗ୍ରାମବାସୀ ୨୮ ଦିନ ଭିତରେ ଦୁଇଦୁଇ ଥର ସ୍କୁଲ ଫାଟକରେ ତାଲା ମାରିଥିଲେ। ଦୁଇ ଜଣ ଶିକ୍ଷକରେ ସ୍କୁଲ ଚାଲିଥିବା ବେଳେ ୩ ଶିକ୍ଷକ ନ ମିଳିବାରୁ ଗ୍ରାମବାସୀ କ୍ଷୋଭ ପ୍ରକାଶ କରିବା ସହିତ ଅସନ୍ତୁଷ୍ଟ ଥିବା ପ୍ରକାଶ କରିଛନ୍ତି।