ନୂଆଦିଲ୍ଲୀ, ୧୪ା୮ (ପି.ଟି.)-ବିଶିଷ୍ଟ ମହିଳା ଡବଲ୍ସ ବ୍ୟାଡ୍ମିଣ୍ଟନ ଖେଳାଳି ଏନ୍. ସିକ୍କି ରେଡ୍ଡୀ ଏବଂ ତାଙ୍କ ଫିଜିଓଥେରାପିଷ୍ଟ କିରନ ସି’ଙ୍କର କୋଭିଡ୍-୧୯ ଟେଷ୍ଟରେ ପଜିଟିଭ ଆସିଛି। ହାଇଦ୍ରାବାଦସ୍ଥିତ ପୁଲେଲା ଗୋପୀଚାନ୍ଦ ବ୍ୟାଡ୍ମିଣ୍ଟନ ଏକାଡେମୀରେ ନ୍ୟାଶନାଲ କ୍ୟାମ୍ପ ଅବସରରେ ସମସ୍ତ ଖେଳାଳି, କୋଚ୍, ସପୋର୍ଟ ଷ୍ଟାଫ୍ ଓ ପ୍ରଶାସନିକ କର୍ମଚାରୀଙ୍କର କରୋନା ଭାଇରସ୍ ଟେଷ୍ଟ ହୋଇଥିଲା। ଫଳାଫଳ ପଜିଟିଭ ଆସିବା ପରେ ଏକାଡେମୀରେ ସାନିଟାଇଜେଶ୍ଠନ କରାଯାଇଛି। ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ (ସାଇ) ତରଫରୁ ଗୁରୁବାର ଏ ବିଷୟରେ ସୂଚନା ଦିଆଯାଇଛି। ଉଭୟ ସିକ୍କି ଓ କିରନ ହାଇଦ୍ରାବାଦରୁ ଆସି ନ୍ୟଶନାଲ କ୍ୟାମ୍ପରେ ଯୋଗ ଦେଇଥିଲେ। ଟେଷ୍ଟ ପୂର୍ବରୁ ସେମାନଙ୍କ ନିକଟରେ କିନ୍ତୁ କୌଣସି ଲକ୍ଷଣ ଦେଖାଯାଇ ନ ଥିଲା। ସାନିଟାଇଜେଶନ ପାଇଁ ଏକାଡେମୀକୁ ବର୍ତ୍ତମାନ ବନ୍ଦ ରଖାଯାଇଛି। ସିକ୍କି ଓ କିରନଙ୍କ ସଂସ୍ପର୍ଶରେ ଯେଉଁମାନେ ଆସିଥିଲେ ସେମାନଙ୍କର ପୁଣି ଆରଟି ପିସିଆର୍ ଟେଷ୍ଟ ହେବ। ବ୍ୟାଡ୍ମିଣ୍ଟନ କ୍ୟାମ୍ପରେ ଅଂଶଗ୍ରହଣ ପାଇଁ ରିଓ ଗେମ୍ସ ରୌପ୍ୟ ବିଜୟିନୀ ଓ ବିଶ୍ୱ ଚାମ୍ପିୟନ ପି.ଭି. ସିନ୍ଧୁଙ୍କ ସମେତ ୮ଜଣ ଅଲିମ୍ପିକ ଆଶାୟୀଙ୍କୁ ସାଇ ଅନୁମତି ଦେଇଛି। ଏଥିପାଇଁ ଅଗଷ୍ଟ ୧ରେ ତେଲେଙ୍ଗାନା ସରକାରଙ୍କଠାରୁ ଅନୁମତି ଆଣିବାକୁ ହୋଇଥିଲା।