ମହାକାଳପଡ଼ା,୫ା୮(ଡି.ଏନ୍.ଏ.): ଦେଶର ସର୍ବୋଚ୍ଚ ନ୍ୟାୟାଳୟ ୨୦୧୭ ମେରେ ଏକ ଡିଭିଜନ ବେଞ୍ଚ ରାୟରେ ଉଲ୍ଲେଖ ଥିଲା ବିଦ୍ୟାଳୟର ଛାତ୍ରୀଛାତ୍ରମାନଙ୍କ ବସ୍ତାନି ବୋଝ କମାଇବାକୁ ସ୍ବତନ୍ତ୍ର ନିର୍ଦ୍ଦେଶନାମା ଥିଲା। ଏହି ଆଦେଶରେ ଅନ୍ୟ ଏକ ଦିଗ ଥିଲା ପିଲାମାନଙ୍କ କାନ୍ଧରେ ଅଧିକ ବହି ବସ୍ତାନି ବୋଝ ରହିବା ଦ୍ୱାରା ମାନସିକ, ଶାରିରୀକ ଓ ମେରୁଦଣ୍ଡ ପ୍ରଭାବିତ ହେବା ଆଶଙ୍କା ରହିଛି ବୋଲି କୁହାଯାଇଥିଲା। ଶିଶୁମାନଙ୍କର କାନ୍ଧ ଓ ମେରୁଦଣ୍ଡ ଉପରେ ଅଧିକ ବସ୍ତାନି ବୋଝ ଭାରାକ୍ରାନ୍ତ ହେଲେ ଭବିଷ୍ୟତରେ ମେରୁଦଣ୍ଡ ଜନିତ ସ୍ନାୟୁ ବା (ସ୍ପାଇନାଲ କର୍ଡ) ରୋଗରେ ପୀଡିତ ହେବା ଯଥେଷ୍ଟ ସମ୍ଭାବନା ରହିଛି ବୋଲି ବିଶେଷଜ୍ଞମାନଙ୍କ ମତ ଥିଲା। ପରବର୍ତ୍ତୀ ସମୟରେ ସର୍ବୋଚ୍ଚ ନ୍ୟାୟାଳୟଙ୍କ ଆଦେଶ ଅନୁଯାୟୀ, ଶିକ୍ଷା ବିଭାଗ ପିଲାମାନଙ୍କ କାନ୍ଧରେ ବୋଝ କମାଇବାକୁ ଆବଶ୍ୟକ ଅନୁସାରେ ବହି ଖାତା, ଖାଦ୍ୟ, ପାଣି ବୋତଲ, ଯନ୍ତ୍ର ବାକ୍ସ ଓ ଅନ୍ୟ ସାମଗ୍ରୀକୁ ବ୍ୟାଗ ଭିତରେ କାଣ୍ଟ ଛାଣ୍ଟ ପାଇଁ ପରାମର୍ଶ ଦିଆଯାଇଥିଲା। ତେବେ ଏହି ନିର୍ଦ୍ଦେଶ କିଛିଦିନ ଚାଲିଲା ପରେ ଶିକ୍ଷା ବିଭାଗର ଦାୟିତ୍ୱ ହୀନତା ଯୋଗୁ ପୁନର୍ବାର ପିଲାମାନେ ଅଧିକ ଓଜନ ବସ୍ତାନି ସ୍କୁଲକୁ ନେଉଥିବା କେନ୍ଦ୍ରାପଡ଼ା ଜିଲା ମହାକାଳପଡ଼ା ଅଞ୍ଚଳରେ ଦେଖିବାକୁ ମିଳିଛି। କେତେଜଣ ପିଲାଙ୍କ ମତରେ ଦୈନିକ ବସ୍ତାନିରେ ଅଧିକ ବହି ଖାତା, ଜଳାଖିଆ, ପାଣି ବୋତଲ, ଯନ୍ତ୍ର ବାକ୍ସ ଆଦି ନେବାକୁ ପଡେ। ଆଗ ଅପେକ୍ଷା ଏବେ ବହି ଖାତା ଓ ଅନ୍ୟ ସାମଗ୍ରୀ ବସ୍ତାନିରେ ପୂରେଇବାକୁ ପଡୁଛି। ଫଳରେ ଅଧିକ ଓଜନିଆ ହୋଇଥାଏ ବୋଲି କହିଛନ୍ତି। ପିଲା ଅବସ୍ଥାରେ ମେରୁଦଣ୍ଡ ଉପରେ ପ୍ରଭାବ ପକାଇ ନ ଥାଏ। ଭବିଷ୍ୟତରେ ଏହାର ପ୍ରଭାବ ପଡିବ ବୋଲି ବୁଦ୍ଧିଜୀବୀମାନେ କହିଛନ୍ତି। ଶିକ୍ଷା ବିଭାଗ ପକ୍ଷରୁ ବିଭିନ୍ନ ବିଦ୍ୟାଳୟରେ ପଢୁଥିବା ଛାତ୍ରୀଛାତ୍ର ଓ ସେମାନଙ୍କ ଅଭିଭାବକମାନଙ୍କୁ ସଚେତନତା କରିବା ଆବଶ୍ୟକ ରହିଛି ବୋଲି କୁହାଯାଇଛି। ବ୍ଲକ ଅଧୀନରେ ଥିବା ସରକାରୀ ଓ ବେସରକାରୀ ବିଦ୍ୟାଳୟଗୁଡ଼ିକରେ ଛାତ୍ରୀଛାତ୍ରମାନଙ୍କ କାନ୍ଧରେ ବସ୍ତାନି ବୋଝକୁ ଶିକ୍ଷା ବିଭାଗ ପକ୍ଷରୁ କମା ଯାଉନାହିଁ। ବିଦ୍ୟାଳୟର ପ୍ରଧାନଶିକ୍ଷକମାନେ ଏହି ଘଟଣାକୁ ଗୁରୁତ୍ୱ ଦେଉ ନ ଥିବା ଅଭିଯୋଗ ହେଉଛି। ଏ ସମ୍ପର୍କରେ ବ୍ଲକ ଶିକ୍ଷା ଅଧିକାରୀ ତନ୍ମୟ କୁମାର ବେହେରାଙ୍କୁ ପଚାରିବାରେ ବିଦ୍ୟାଳୟରେ ଛାତ୍ରୀଛାତ୍ରମାନଙ୍କ ବସ୍ତାନି ବୋଝ କମାଇବାକୁ ସରକାରଙ୍କ ଗାଇଡ୍ ଲାଇନ୍ ରହିଛି। ପିଲାମାନଙ୍କର ଦୈନିକ ପାଠ୍ୟ ସୂଚୀ ଅନୁଯାୟୀ ପୁସ୍ତକ ବିଦ୍ୟାଳୟକୁ ନେବାକୁ କୁହାଯାଇଛି। ଫଳରେ ବସ୍ତାନି ବୋଝ ସମସ୍ୟା ଦୂର ହେବ। ଏ ସଂକ୍ରାନ୍ତରେ ଅଭିଭାବକମାନଙ୍କୁ ସଚେତନତା କରାଯାଇଛି ବୋଲି ସେ କହିଛନ୍ତି।