ମହାକାଳପଡ଼ା,୧୪ା୮(ପ୍ରତାପ ଚନ୍ଦ୍ର ସ୍ବାଇଁ): ପିଲାମାନଙ୍କ ଶାରୀରିକ, ମାନସିକ ଓ ବୌଦ୍ଧିକ ବିକାଶ ହେବା ପାଇଁ ପ୍ରଚୁର ପରିମାଣରେ ଭିଟାମିନ ଆବଶ୍ୟକତା ରହିଛି। ତେବେ ଏହି କୋମଳମତି ପିଲାମାନଙ୍କର ପ୍ରାରମ୍ଭ କାଳରୁ ଶରୀର ଗଠନ ବିକଶିତ ହେବା ପୂର୍ବରୁ ଶାରୀରିକ କଷ୍ଟ ଅନୁଭବ ପରୋକ୍ଷରେ ଦେଖିବାକୁ ମିଳୁଛି। ଏହା କିଛିବର୍ଷ ଲାଗି ରହିଲେ ପିଲାଙ୍କ କାନ୍ଧ, ମେରୁଦଣ୍ଡ ଅଧିକ ବହି ବସ୍ତାନି ବୋଝ ଉପରେ ଭାରାକ୍ରାନ୍ତ ହେଉଛି। ଫଳରେ ପିଲାମାନଙ୍କ ଭବିଷ୍ୟତରେ ମେରୁଦଣ୍ଡ ଜନିତ ସ୍ନାୟୁ (ସ୍ପାଇନାଲ କର୍ଡ) ରୋଗରେ ପୀଡିତ ହେବା ଯଥେଷ୍ଟ ସମ୍ଭାବନା ରହିଛି ବୋଲି ବିଶେଷଜ୍ଞମାନଙ୍କ ମତ ଥିଲା। ଫଳରେ ପିଲାମାନଙ୍କ ବୟସ ବଢ଼ିଲେ ଏହି ମେରୁଦଣ୍ଡ ବିକାରଜନିତ ରୋଗ ସମସ୍ୟା ବୃଦ୍ଧି ପାଇବା ସହ ଶାରୀରିକ ଅକ୍ଷମତା ଦେଖା ଦେବ।
କେନ୍ଦ୍ରାପଡ଼ା ଜିଲା ମହାକାଳପଡ଼ା ଅଞ୍ଚଳର ସାମାଜିକ କର୍ମୀ ସୁବାସ ଚନ୍ଦ୍ର ସ୍ବାଇଁ , ଲକ୍ଷ୍ମୀକାନ୍ତ ସ୍ବାଇଁ, ନାଥ କୁମାର ଭୋଳ ପ୍ରମୁଖ କହିଛନ୍ତି, ୨୦୧୭ ମେ ମାସରେ ସର୍ବୋଚ୍ଚ ନ୍ୟାୟାଳୟ ଏକ ଡିଭିଜନ ବେଞ୍ଚ ଶୁଣାଣି କରି ପ୍ରାଥମିକ ବିଦ୍ୟାଳୟରେ ଅଧ୍ୟୟନ କରୁଥିବା କୋମଳମତି ପିଲାମାନଙ୍କ କାନ୍ଧରେ ବହି ବସ୍ତାନି ବୋଝ କମାଇବାକୁ କହିଥିଲେ। କାରଣ ପିଲାମାନଙ୍କ ମେରୁଦଣ୍ଡ ବିକାର ଗ୍ରସ୍ତ ହେବା ସହ ଶାରୀରିକ, ମାନସିକ, ଅକ୍ଷମତା ହେବା ଫଳରେ ଭବିଷ୍ୟତରେ ସେମାନଙ୍କର ଶରୀର ପ୍ରତି ବିପଦ ସୃଷ୍ଟି ହେବା ଆଶଙ୍କା ରହିଛି ବୋଲି ନ୍ୟାୟଧୀଶ ମତବ୍ୟକ୍ତ କରିଥିଲେ। ପରେ ଦେଶର ବିଭିନ୍ନ ଶିକ୍ଷାନୁଷ୍ଠାନରେ ଛାତ୍ରୀଛାତ୍ରମାନଙ୍କ ଦୈନିକ ବସ୍ତାନିରେ ରହୁଥିବା ଆବଶ୍ୟକ ଅନୁସାରେ ବହି, ଖାତା, ଖାଦ୍ୟ ଟିଫିନ୍ ବକ୍ସ, ପାଣି ବୋତଲ, ଯନ୍ତ୍ର ବାକ୍ସ, ରେନିକୋଟଗୁଡ଼ିକ ବିଦ୍ୟାଳୟକୁ ବୋଝ କମ୍ ନେବା ପାଇଁ ବିଭାଗୀୟ କର୍ତ୍ତୃପକ୍ଷଙ୍କୁ ପରାମର୍ଶ ଦେଇଥିଲେ। ଏହି ବ୍ୟାଗ ୨ କିଲୋରୁ ଅଧିକ ହେବ ନାହିଁ ବୋଲି ଖଣ୍ଡପୀଠ ନିର୍ଦ୍ଦେଶ ଦେଇଥିଲେ। କିନ୍ତୁ ନ୍ୟାୟାଳୟଙ୍କ ନିର୍ଦ୍ଦେଶ ଶିକ୍ଷାନୁଷ୍ଠାନଗୁଡିକ ମୁଖ୍ୟ ମାନୁ ନ ଥିବା ଦେଖିବାକୁ ମିଳୁଛି। ଆଦ୍ୟାବଧି ପ୍ରତି ଛାତ୍ରୀଛାତ୍ରଙ୍କ ବ୍ୟାଗ୍ରେ ୩ରୁ ୪ କିଲୋ ଓଜନର ବୋଝ କଅଁଳ କାନ୍ଧରେ ଝୁଲାଇ ନେଉଥିବା ଦେଖିବାକୁ ମିଳୁଛି। ଏହାର ଏକ ଉଦାହରଣ ଦେଖିବାକୁ ମିଳୁଛି ମହାକାଳପଡ଼ା ବ୍ଲକରେ ଥିବା ବିଭିନ୍ନ ସରକାରୀ, ବେସରକାରୀ ଶିକ୍ଷାନୁଷ୍ଠାନଗୁଡ଼ିକର ଛାତ୍ରୀଛାତ୍ରମାନଙ୍କ କ୍ଷେତ୍ରରେ। ଛାତ୍ରୀଛାତ୍ରମାନଙ୍କ ଶାରୀରିକ, ମାନସିକ ଓ ସ୍ବାର୍ଥ ଦୃଷ୍ଟିରୁ ଶିକ୍ଷା ବିଭାଗର ଉଚ୍ଚ କର୍ତ୍ତୃପକ୍ଷ ପ୍ରତି ବିଦ୍ୟାଳୟ ପ୍ରଧାନଶିକ୍ଷକଙ୍କୁ ଚିଠି ଲେଖିବା ସହ ତୁରନ୍ତ ସଚେତନତା ଓ ଅଭିଭାବକମାନଙ୍କୁ ଡକାଇ କହିବାକୁ ସେମାନେ କହିଛନ୍ତି। ଏ ସଂକ୍ରାନ୍ତରେ ବ୍ଲକ ଶିକ୍ଷା ଅଧିକାରୀ ତନ୍ମୟ କୁମାର ବେହେରାଙ୍କୁ ପଚାରିବାବାରେ ପ୍ରତି ଶନିବାର ବିଦ୍ୟାଳୟରେ ଅନୁଷ୍ଠିତ ହେଉଥିବା ପିଟିଏସ୍ ବା ପ୍ୟାରେଣ୍ଟ ଟିଚର ଷ୍ଟୁଡେଣ୍ଟ୍ମାନଙ୍କ ମିଟିଂରେ ଆଲୋଚନା କରାଯାଇ ସଚେତନ କରାଯିବ ବୋଲି ସେ କହିଛନ୍ତି।