ରାଜନଗର,୧୧ା୫(ଡି.ଏନ୍.ଏ.): ବଙ୍ଗୋପସାଗର ତଟବର୍ତ୍ତୀ ଅଭିଶପ୍ତ ସାତଭାୟାବାସୀ ୭୦ ଦଶକ ପରଠାରୁ ସାମୁଦ୍ରିକ ଝଡ଼ ଏବଂ ସମୁଦ୍ର ଢେଉରେ ସେମାନଙ୍କ ଭିଟାମାଟି ହରାଇଥିଲେ। ଜୀବନ ଜୀବିକାକୁ ନେଇ ସାତଭାୟାବାସୀ ଭିଟାମାଟିର ମୋହକୁ ତୁଟାଇ ନୂଆ ଠିକଣା ବଗପାଟିଆଠାରେ ବସତି ସ୍ଥାପନ କରିଛନ୍ତି। ୨୦୧୧ରୁ ବଗପାଟିଆଠାରେ ଆରମ୍ଭ ହୋଇଥିବା ସାତଭାୟାବାସୀଙ୍କ ଥଇଥାନ ପ୍ରକ୍ରିୟା ୨୦୧୯ରେ ଶେଷ ହୋଇଥିଲା। ୨୦୧୯ ଏପ୍ରିଲ ୨୦ରେ ସାତଭାୟାବାସୀଙ୍କ ଆରାଧ୍ୟା ଦେବୀ ମା’ ପଞ୍ଚୁବରାହୀଙ୍କୁ ବଗପାଟିଆକୁ ସ୍ଥାନାନ୍ତର କରାଯାଇଥିଲା। ପରେ ସାତଭାୟାର ୫୭୧ ପରିବାର ବଗପାଟିଆଠାରେ ନୂଆ ଜୀବନ ଆରମ୍ଭ କରିଛନ୍ତି। ନିକଟ ଅତୀତରେ ୫-ଟି ସଚିବ ଭି.କେ. ପାଣ୍ଡିଆନ ବଗପାଟିଆ ଥଇଥାନ ସ୍ଥଳ ପରିଦର୍ଶନ କରି କେବଳ ରାଜ୍ୟରେ ନୁହେଁ, ସମଗ୍ର ଦେଶରେ ଜଳବାୟୁ ପରିବର୍ତ୍ତନ ପରବର୍ତ୍ତୀ ଥଇଥାନ ସ୍ଥଳ ବଗପାଟିଆକୁ ମଡେଲ ଭିଲେଜରେ ପରିଣତ କରିବାକୁ ୨୨ କୋଟି ଟଙ୍କା ଅନୁଦାନ ପ୍ରଦାନ କରିଛନ୍ତି। କିନ୍ତୁ ଅଭିଶପ୍ତ ସାତଭାୟାବାସୀଙ୍କୁ ସେମାନଙ୍କ ନୂଆ ଠିକଣା ଏବେବି ଅଭିଶପ୍ତରେ ପରିଣତ କରିଚାଲିଛି। ୨୦୨୨ ଡିସେମ୍ବର ୨୩ରେ ବଡ଼ଦିନ ଛୁଟିରେ ମସ୍ଗୁଲ ଥିବା ବଗପାଟିଆର ୩ ଜଣ ଛାତ୍ର ବିଶାଲ, ସନ୍ଦୀପ ଓ ବ୍ରିବେନ ଗଁା ପାଖ ପୋଖରୀକୁ ଗାଧୋଇବାକୁ ଆସି ପାଣିରେ ବୁଡ଼ିଯାଇ ଜଳସମାଧି ନେଇଥିଲେ। ଏ ଘଟଣା ସେତେବେଳେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳାଇ ଦେଇଥିଲା। ୩ ନିଷ୍ପାପ ଶିଶୁଙ୍କର ଅକାଳ ବିୟୋଗରେ ତାଙ୍କ ମା’ମାନଙ୍କ ଆଖିରୁ ଲୁହ ଶୁଖି ନ ଥିବା ବେଳେ ଗତମାସ ୨୧ ତାରିଖରେ ଏହି ବଗପାଟିଆ ଗ୍ରାମର ଦଶମ ଶ୍ରେଣୀ ଛାତ୍ରୀ ସ୍ମୃତିରେଖା ପୋଖରୀରେ ଗାଧୋଉଥିବା ସମୟରେ ବୁଡ଼ିଯାଇ ପ୍ରାଣ ହରାଇଛନ୍ତି। ୨୦୨୧ରେ ମଧ୍ୟ ଏହି ଗଁାର ଜଣେ ଛାତ୍ର ପୋଖରୀରେ ବୁଡ଼ି ପ୍ରାଣ ହରାଇଥିଲେ। ସାତଭାୟାବାସୀ ବଗପାଟିଆରେ ସେମାନଙ୍କ ଆରାଧ୍ୟା ଦେବୀ ମା’ ପଞ୍ଚୁବରାହୀଙ୍କୁ ନୂତନ ମନ୍ଦିରରେ ସ୍ଥାପନ କରାଇ ପୂଜା କରୁଥିବା ବେଳେ ନିଷ୍ପାପ ୫ ଶିଶୁଙ୍କର ପାଣିରେ ବୁଡ଼ି ମରିବା ଘଟଣା ସେମାନଙ୍କ ଆଖିରୁ ନିଦ ହଜାଇ ଦେଇଛି। ସେମାନେ ଆଶଙ୍କା ଭିତରେ ରହି ଦିନ ଗଣୁଛନ୍ତି। ତାଙ୍କ ବାପ, ଅଜାମାନେ ୧୯୭୧ ମସିହା ସାମୁଦ୍ରିକ ଝଡ଼ରେ ହଜାର ହଜାର ସଂଖ୍ୟାରେ ମୃତ୍ୟୁବରଣ କରିଥିବା ବେଳେ ସେଦିନର ଦୁଃଖଦ ଘଟଣା ଏବେ ବି ସାତଭାୟାର ଶତାୟୁ ମଣିଷଙ୍କ ମନରେ ଆଙ୍କି ହୋଇ ରହିଛି। ଏବେ ସେମାନଙ୍କ ନୂଆ ଠିକଣାରେ ଶିଶୁମାନଙ୍କର ଅକାଳ ବିୟୋଗ ସେମାନଙ୍କ ମାନସିକ ଭାରସାମ୍ୟକୁ ଦୋହଲାଇ ଦେଇଛି।