କଟକ ଅଫିସ,୨୪ା୯: ପୁରୀ ବଗଲା ଧର୍ମଶାଳା ଜମି ବିକ୍ରି ନେଇ ସମ୍ବିତ ପାତ୍ରଙ୍କ ପକ୍ଷରୁ ଦାଏର ମାମଲାରେ ଗୁରୁବାର ହାଇକୋର୍ଟ ଅନ୍ତରୀଣ ନିର୍ଦ୍ଦେଶ ଦେଇଛନ୍ତି। ଜମିର ବିକ୍ରି ଖର୍ଦ୍ଦି, କିସମ ବଦଳ, ନିର୍ମାଣ କାର୍ଯ୍ୟ ଚୂଡାନ୍ତ ରାୟ ଉପରେ ନିର୍ଭର କରିବ। ଗତ ଅଗଷ୍ଟ ୯ ତାରିଖରେ ପୁରୀ ବାସିନ୍ଦା ଜଗନ୍ନାଥ ବସ୍ତିଆଙ୍କ ପକ୍ଷରୁ ଆଗତ ମିସ୍କେସ୍ର ଶୁଣାଣିକରି ହାଇକୋର୍ଟ ମଧ୍ୟ ଉକ୍ତ ଆଦେଶ ଦେଇଥିଲେ। ସମାନ ମାମଲାରେ ପୂର୍ବ ଆଦେଶ କାଏମ ରହିବ ବୋଲି ଗୁରୁବାର ହାଇକୋର୍ଟ ମୁଖ୍ୟ ବିଚାରପତି ଏସ୍. ମୁରଲୀଧର ଓ ଜଷ୍ଟିସ ବି.ପି. ରାଉତରାୟଙ୍କୁ ନେଇ ଗଠିତ ଖଣ୍ଡପୀଠ ନିର୍ଦ୍ଦେଶ ଦେଇଛନ୍ତି। ଆବେଦନକାରୀ ସମ୍ବିତ୍ଙ୍କ ପକ୍ଷରୁ ଆଇନଜୀବୀ ପୀତାମ୍ବର ଆଚାର୍ଯ୍ୟ ମାମଲା ପରିଚାଳନା କରୁଛନ୍ତି। ଆସନ୍ତା ଡିସେମ୍ବର ୧୬ରେ ଉଭୟ ମାମଲାର ଏକତ୍ର ଶୁଣାଣି ହେବ। ଆଇନଜୀବୀ ପୀତାମ୍ବର ଯୁକ୍ତିରେ ଦର୍ଶାଇଥିଲେ, ଧର୍ମଶାଳା ଜମି ରାଜ୍ୟ ସରକାର ଓ ବଗଲାର ନୁହେଁ, ଏହା ଜଗନ୍ନାଥ ମହାପ୍ରଭୁଙ୍କର। ସାବକରେ ଏହି ଜମି ଶ୍ରୀଜଗନ୍ନାଥଙ୍କର ଥିବାବେଳେ ହାଲ୍ ରେକର୍ଡରେ ଏହା ଲଜିଂ ହାଉସ ଫଣ୍ଡକୁ କିଭଳି ଗଲାବୋଲି ସେ ପ୍ରଶ୍ନ ଉଠାଇଥିଲେ।
ପୂର୍ବରୁ ବସ୍ତିଆଙ୍କ ପକ୍ଷରୁ ଅନ୍ୟ ଏକ ମାମଲା ହାଇକୋର୍ଟରେ ବିଚାରାଧୀନ ରହିଛି। ସେ ତାଙ୍କ ପିଟିଶନରେ ଦର୍ଶାଇଛନ୍ତି, ବଗଲା ଧର୍ମଶାଳାର ମୋଟ ୨ ଏକର ୫୭୪ ଡିସିମିଲ ଜମିରୁ ପୁରୀ ଜିଲାପାଳ ୨୦୨୦ ଅଗଷ୍ଟ ୫ରୁ ୧୨ ମଧ୍ୟରେ ୩୪୦ ଡିସିମିଲ ଜମିକୁ ୬ଜଣ ଲଜିଂ ମାଲିକଙ୍କୁ ବିକ୍ରି କରିଥିଲେ। ଅଦାଲତଙ୍କ ବିନା ଅନୁମତିରେ ଜିଲାପାଳ ନିଜ କ୍ଷମତାର ଅପବ୍ୟବହାର କରି ଏହି ଜମିକୁ ବିକ୍ରି କରିଥିବା ଅଭିଯୋଗ ହୋଇଥିଲା। ଜିଲାପାଳଙ୍କ ଏଭଳି କାର୍ଯ୍ୟକୁ ବିରୋଧକରି ହାଇକୋର୍ଟରେ ମାମଲା ରୁଜୁ ହୋଇଥିଲା। ଏନେଇ ହାଇକୋର୍ଟ ଜିଲାପାଳଙ୍କୁ ଜାନୁୟାରୀ ୧୧ରେ ଜବାବ ଦାଖଲ ପାଇଁ ନିର୍ଦ୍ଦେଶ ଦେଇଥିଲେ। ପରବର୍ତ୍ତୀ ସମୟରେ ପୁରୀ ଜିଲାପାଳ ଗତ ମାର୍ଚ୍ଚ ୨ରେ ଆଉ ୬ଜଣ ଲଜିଂ ମାଲିକଙ୍କୁ ଥଇଥାନ ଯୋଜନାରେ ଜମି ବିକ୍ରି ପାଇଁ ସାନି ବିଜ୍ଞପ୍ତି ପ୍ରକାଶ କରିଥିଲେ। ଏ ସମ୍ପର୍କରେ ଜଣାପଡିବା ପରେ ଆବେଦନକାରୀ ଜିଲାପାଳଙ୍କୁ ସ୍ମାରକପତ୍ର ଦେଇଥିଲେ। ହେଲେ କିଛି ସୁଫଳ ନ ମିଳିବାରୁ ସେ ହାଇକୋର୍ଟରେ ମିସ୍କେସ୍ ରୁଜୁ କରିଥିଲେ।