ପାଟନା,୨୭।୪: ବାହୁବଳୀ ପୂର୍ବତନ ଏମ୍ପି ଆନନ୍ଦ ମୋହନ ସିଂ ଗୁରୁବାର ଭୋର ୪ଟା ୩୦ରେ ବିହାରର ସହର୍ସା ଜେଲରୁ ମୁକୁଳିଛନ୍ତି। ଆନନ୍ଦ ମୋହନଙ୍କୁ ଅପରାହ୍ନରେ ମୁକ୍ତ କରାଯିବ ବୁଧବାର ସୂଚନା ମିଳିଥିଲା। ତେବେ ଆଇନ ବ୍ୟବସ୍ଥା ପ୍ରଭାବିତ ନ ହେବା ପାଇଁ ଏଭଳି ନିଷ୍ପତ୍ତି ନିଆଯାଇଥିବା ଜଣାପଡିଛି। ଆନନ୍ଦ ମୋହନଙ୍କ ସମର୍ଥକମାନେ ଯେତେବେଳେ ଗୁରୁବାର ସକାଳେ ଜେଲରେ ପହଞ୍ଚିଥିଲେ, ସେତେବେଳେ ଜାଣିବାକୁ ପାଇଥିଲେ ଯେ ତାଙ୍କୁ ସକାଳେ ଜେଲରୁ ମୁକ୍ତ କରାଯାଇଛି।
ଆନନ୍ଦ ମୋହନ ତାଙ୍କ ପୁଅର ବିବାହେ ଯୋଗ ଦେବା ପାଇଁ ୧୫ ଦିନ ପାରୋଲରେ ବାହାରକୁ ଆସିଥିଲେ। ଏହାପରେ ବୁଧବାର ନିଜେ ଆତ୍ମସମର୍ପଣ କରିଥିଲେ। ତେବେ ଆନନ୍ଦ ମୋହନ ଆଜି ଜେଲରୁ ମୁକୁଳିବା ପରେ ସମର୍ଥକମାନେ ତାଙ୍କର ସ୍ବାଗତ କରିବାକୁ ପ୍ରସ୍ତୁତ କରିଥିଲେ। ହେଲେ ସକାଳେ ହଠାତ୍ ଜେଲରୁ ବାହାରିବା ପରେ ସେ କେଉଁଆଡେ ଯାଇଛନ୍ତି ତାହା କେହି ଜାଣି ନାହାଁନ୍ତି। ସୂଚନାଯୋଗ୍ୟ, ୧୯୯୪ରେ ତତ୍କାଳୀନ ଜିଲା ମାଜିଷ୍ଟ୍ରେଟ ଗୋପାଳଗଞ୍ଜ ଜି କୃଷ୍ଣଙ୍କ ହତ୍ୟା ମାମଲାରେ ସେ ଆଜୀବନ କାରାଦଣ୍ଡ ଭୋଗୁଥିଲେ।