କେନ୍ଦ୍ରାପଡା, ୨ା୪ (ଜଗନ୍ନାଥ ଧଳ):କର୍ମନିଯୁକ୍ତି କେନ୍ଦ୍ରାପଡ଼ା ଜିଲା ପାଇଁ ଏକ ବଡ଼ ସମସ୍ୟା। ଏହାର ସମାଧାନ ପାଇଁ ଜିଲାରେ ଶିଳ୍ପ ଆବଶ୍ୟକ। ଲୋକ ସଭାରେ ଏ ନେଇ ନିଶ୍ଚିତ ଭାବେ ସ୍ବର ଉଠାଯିବ ବୋଲି ଭାଜପାର ରାଷ୍ଟ୍ରୀୟ ଉପାଧ୍ୟକ୍ଷ ତଥା କେନ୍ଦ୍ରାପଡ଼ା ଲୋକ ସଭା ପ୍ରାର୍ଥୀ ବୈଜୟନ୍ତ ପଣ୍ଡା କହିଛନ୍ତି। ଭାଜପା ପକ୍ଷରୁ ଲୋକ ସଭା ପାଇଁ ପ୍ରାର୍ଥୀ ହେବା ପରେ ସେ ସୋମବାର ସନ୍ଧ୍ୟାରେ ତୁଳସୀ କ୍ଷେତ୍ରାଧିପତି ଶ୍ରୀବଳଦେବଜୀଉଙ୍କୁ ଦର୍ଶନ କରି ସଂସଦୀୟ କ୍ଷେତ୍ରରେ ନିର୍ବାଚନ ପ୍ରଚାର ଆରମ୍ଭ କରିଛନ୍ତି। ପ୍ରାର୍ଥିତ୍ୱ ସମ୍ପର୍କରେ ସେ କହିଛନ୍ତି ଯେ ଏହି ନିର୍ବାଚନ କ୍ଷେତ୍ରରେ ଏମ୍ପି ଥିବା ବେଳେ ଜିଲାରେ ରେଳପଥ କାର୍ଯ୍ୟକାରୀ ପାଇଁ ଉଦ୍ୟମ କରିଥିଲେ। ଫଳସ୍ବରୂପ ଏବେ ପଣ୍ୟ ପରିବହନ ସହ ଯାତ୍ରୀବାହୀ ରେଳ ଚଳାଚଳ କରୁଛି। ଗତ ୫ବର୍ଷ ଧରି ଏହି ଜିଲାର ଉନ୍ନୟନ କାର୍ଯ୍ୟ ଠପ ହୋଇପଡିଛି। ଏହି ସଂସଦୀୟ କ୍ଷେତ୍ର ସହ ଭାଜପା ୪୦୦ରୁ ଅଧିକ ସିଟ୍ ଜିଣିବ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଲହରି ଏବେ ଚାଲିଛି। ଓଡ଼ିଶା ରାଜ୍ୟରେ ଭାଜପା ସରକାର ଗଠନ କରିବାକୁ ଯାଉଛି। ଏଠାରେ କର୍ମନିଯୁକ୍ତି ନାହିଁ। ଶିଳ୍ପ ଦ୍ୱାରା ଏହାର ସମାଧାନ ହୋଇପାରିବ। ସେହିପରି କେନ୍ଦ୍ର ସରକାରଙ୍କ ବିଭିନ୍ନ ଯୋଜନାଗୁଡ଼ିକ ଏଠାରେ କାର୍ଯ୍ୟକାରୀ ହେଲେ ରାଜ୍ୟବାସୀ ଉପକୃତ ହେବେ। ଆୟୁଷ୍ମାନ ଭାରତ ପରି ଯୋଜନାକୁ ଓଡ଼ିଶାରେ ଅଣଦେଖା କରାଯାଉଛି। ରାଜ୍ୟରେ ଭାଜପା ସରକାର ଆସିଲେ କେନ୍ଦ୍ରୀୟ ଯୋଜନା ଲାଗୁ ହେବ ବୋଲି ଏହି ଅବସରରେ ଗଣମାଧ୍ୟମକୁ ସେ ସୂଚନା ଦେଇଥିଲେ। ଅପରାହ୍ନ ୩ଟାରୁ ଅନେକ ହଜାର ସମର୍ଥକଙ୍କ ସହ ଡେରାବିଶ ବ୍ଲକ ଚାନ୍ଦୋଳ ବଜାରଠାରୁ ଦୁହୁରିଆ ପର୍ଯ୍ୟନ୍ତ ବାଇକ୍ ରାଲି ହୋଇଥିଲା। ଏହି ରାଲିରେ ଜିଲା ସଭାପତି କିଶୋର ଚନ୍ଦ୍ର ପଣ୍ଡାଙ୍କ ସମେତ ଜିଲାର ସମସ୍ତ କର୍ମକର୍ତ୍ତା ଓ ବରିଷ୍ଠ ନେତା ସାମିଲ ହୋଇଥିଲେ।