ନୂଆଦିଲ୍ଲୀ,୩ା୧୨: ୧୯୯୪ ଇସ୍ରୋ ଗୁପ୍ତଚରଗିରି ଘଟଣାରେ ବୈଜ୍ଞାନିକ ନାମ୍ବି ନାରାୟଣଙ୍କୁ ସମ୍ପୃକ୍ତ କରାଯିବା ମାମଲାରେ ପୂର୍ବତନ ପୋଲିସ ଡିଜିଙ୍କ ସମେତ ୪ ଜଣଙ୍କୁ କେରଳ ହାଇକୋର୍ଟ ଅନ୍ତରୀଣ ଜାମିନ ପ୍ରଦାନ କରିଥିବାବେଳେ ସୁପ୍ରିମକୋର୍ଟ ଶୁକ୍ରବାର ଏହାକୁ ଖାରଜ କରିଦେଇଛନ୍ତି। ଜଷ୍ଟିସ୍ ଏମ୍.ଆର୍. ଶାହା ଏବଂ ସି.ଟି. ରବିକୁମାରଙ୍କ ଖଣ୍ଡପୀଠ ମାମଲାକୁ ହାଇକୋର୍ଟଙ୍କୁ ଫେରାଇଦେବା ସହ ୪ ସପ୍ତାହ ମଧ୍ୟରେ ଜାମିନ ନିଷ୍ପତ୍ତିର ପୁନର୍ବିଚାର କରିବାକୁ ନିର୍ଦ୍ଦେଶ ଦେଇଛନ୍ତି। ହାଇକୋର୍ଟଙ୍କୁ ହିଁ ନିଷ୍ପତ୍ତି ନେବାକୁ ହେବ ବୋଲି ଖଣ୍ଡପୀଠ କହିଛନ୍ତି। ଜାମିନ ଆବେଦନ ଉପରେ ଚୂଡ଼ାନ୍ତ ରାୟ ପ୍ରକାଶ ନ ପାଇବା ଯାଏ, ତଦନ୍ତରେ ସହଯୋଗ ଆଳରେ ପ୍ରତିବାଦୀଙ୍କୁ ଗିରଫ କରାଯଇପାରିବ ନାହିଁ ବୋଲି ସର୍ବୋଚ୍ଚ ଅଦାଲତ କହିଛନ୍ତି।
ଇସ୍ରୋ ଗୁପ୍ତଚରଗିରି ମାମଲାରେ ଗୁଜରାଟର ପୂର୍ବତନ ପୋଲିସ ଡିଜି ଆର୍.ବି. ଶ୍ରୀକୁମାର, କେରଳର ଦୁଇଜଣ ପୂର୍ବତନ ପୋଲିସ ଅଫିସର ଏସ୍. ବିଜୟନ ଏବଂ ଥାମ୍ପି ଏସ୍ ଦୁର୍ଗା ଦତ୍ତ ଏବଂ ଅବସରପ୍ରାପ୍ତ ଗୋଇନ୍ଦା ଅଧିକାରୀ ପି.ଏସ୍. ଜୟପ୍ରକାଶଙ୍କୁ ହାଇକୋର୍ଟ ଅନ୍ତରୀଣ ଜାମିନ ପ୍ରଦାନ କରିଥିବାବେଳେ ସିବିଆଇ ଏହାକୁ ବିରୋଧ କରିଥିଲା। ସେତେବେଳେ ଶ୍ରୀକୁମାର ଗୋଇନ୍ଦା ବ୍ୟୁରୋ ଉପନିର୍ଦ୍ଦେଶକ ଥିଲେ। ଗୁପ୍ତଚରଗିରି ନାଁରେ କେତେଜଣ ବୈଜ୍ଞାନିକଙ୍କୁ ନିର୍ଯାତନା ଦିଆଯିବା ସହ ସେମାନଙ୍କ ବିରୋଧରେ ମାମଲା ରୁଜୁ କରାଯାଇଥିଲା। ଫଳରେ କ୍ରାୟୋଜେନିକ ଇଞ୍ଜିନ୍ ନିର୍ମାଣ କାର୍ଯ୍ୟ ବାଧାପ୍ରାପ୍ତ ହେବାରୁ ଭାରତର ମହାକାଶ କାର୍ଯ୍ୟକ୍ରମ ୧ରୁ ୨ ଦଶନ୍ଧି ବିଳମ୍ବିତ ହୋଇଥିଲା ବୋଲି ତଦନ୍ତରୁ ଜଣାପଡ଼ିଥିଲା। ଇସ୍ରୋର କ୍ରାୟୋଜେନିକ ଇଞ୍ଜିନ ଉତ୍ପାଦନ ଉଦ୍ୟମକୁ ଭଣ୍ଡୁର କରିବା ପଛରେ ଉକ୍ତ ଟିମ୍ ସମ୍ପୃକ୍ତ ଥିବା ସ୍ପଷ୍ଟ ସୂଚନା ମିଳୁଥିବା ସିବିଆଇ ପୂର୍ବରୁ ଅଭିଯୋଗ କରିଥିଲା। ତେବେ ପର୍ଯ୍ୟାପ୍ତ ପ୍ରମାଣ ନ ଥିବା ଦର୍ଶାଇ ଗତବର୍ଷ ଅଗଷ୍ଟ ୧୩ରେ କେରଳ ହାଇକୋର୍ଟ ସେମାନଙ୍କୁ ଅନ୍ତରୀଣ ଜାମିନ ପ୍ରଦାନ କରିଥିଲେ।