ବର୍ମିଂହାମ,୫।୭: ଭାରତ ଏବଂ ଇଂଲଣ୍ଡ ମଧ୍ୟରେ ଖେଳାଯାଇଥିବା ଏଜବାଷ୍ଟନ ଟେଷ୍ଟର ୫ମ ଦିନରେ ଦୁଇ ଅଭିଜ୍ଞ ବ୍ୟାଟ୍ସମ୍ୟାନ୍ ଜୋ ରୁଟ୍ ଏବଂ ଜନି ବେୟାରଷ୍ଟୋ ଜବରଦସ୍ତ ପ୍ରଦର୍ଶନ କରି ଦଳକୁ ବିଜେତା କରାଇଛନ୍ତି। ଫଳରେ ସିରିଜ ଡ୍ର ହୋଇଛି। ମ୍ୟାଚ୍ର ଦ୍ୱିତୀୟ ଇନିଂସରେ ୩୭୮ ରନ୍ର ବଡ଼ ଲକ୍ଷ୍ୟକୁ ପିଛା କରି ରୁଟ୍ ତାଙ୍କ କ୍ୟାରିୟରର ୨୮ ତମ ଶତକ ମାରିଥିଲେ। ସେହିଭଳି କ୍ରମାଗତ ଭାବେ ଶତକ ହାସଲ କରିଥିଲେ ବେୟାରଷ୍ଟୋ। ଏହା ତାଙ୍କ କ୍ୟାରିୟରର ଦ୍ୱାଦଶ ଶତକ ଥିଲା।
ମ୍ୟାଚ୍ର ପ୍ରଥମ ଇନିଂସରେ ବେୟାରଷ୍ଟୋ ୧୦୬ ରନ୍ କରିଥିଲା। ଏହି ଶତକ ବଳରେ ଇଂଲଣ୍ଡ ୨୮୪ ରନ୍ କରିପାରିଥିଲା। ହେଲେ ଅନ୍ତିମ ଇନିଂସରେ ଦଳକୁ ୩୭୮ ରନ୍ର ବିଶାଳ ଟାର୍ଗେଟ ମିଳିଥିଲା। ପ୍ରଥମେ ଏହା ଅସମ୍ଭବ ବୋଲି ଲାଗୁଥିଲେ ହେଁ ବେୟାରଷ୍ଟୋ ପୁଣି ଥରେ ଜବରଦସ୍ତ ବ୍ୟାଟିଂ କରି ଜୋ ରୁଟ୍ଙ୍କ ସହ ଭାଗିଦାରୀରେ ଇତିସ ରଚିଥିଲେ।
ବେୟାରଷ୍ଟୋ ୧୪୫ ବଲ୍ରେ ଅପରାଜିତ ୧୧୪ ରନ୍ କରିଥିଲେ। ଏଥିସହ ସେ କ୍ରମାଗତ ଭାବେ ତିନୋଟି ଟେଷ୍ଟରେ ନିଜ ପ୍ରଦର୍ଶନ ଯୋଗୁ ଟେଷ୍ଟରେ ଇଂଲଣ୍ଡର ଶ୍ରେଷ୍ଠ ବ୍ୟାଟ୍ସମ୍ୟାନ୍ ପାଲଟିଛନ୍ତି। ସେ ତିନୋଟି ମ୍ୟାଚ୍ରେ ୪ ଶତକ ଏବଂ ୧ ଅର୍ଦ୍ଧଶତକ ହାସଲ କରିଛନ୍ତି।
୧- ନ୍ୟୁଜିଲ୍ୟାଣ୍ଡ ବିପକ୍ଷ ନଟିଂହାମ ଟେଷ୍ଟ: ୮ ରନ୍ ଏବଂ ୧୩୬ ରନ୍
୨.ନ୍ୟୁଜିଲ୍ୟାଣ୍ଡ ବିପକ୍ଷ ଲିଡ୍ସ ଟେଷ୍ଟ: ୧୬୨ ରନ୍ ଏବଂ ୭୧ ରନ୍(ଅପରାଜିତ)
୩- ଭାରତ ବିପକ୍ଷ ଏଜବାଷ୍ଟନ ଟେଷ୍ଟ: ୧୦୬ ରନ୍ ଏବଂ ୧୧୪ ରନ୍(ଅପରାଜିତ)
ପ୍ରକାଶ ଯେ, ବେୟାରଷ୍ଟୋ ଏଜବାଷ୍ଟନ ଟେଷ୍ଟର ପ୍ରଥମ ଇନିଂସରେ ନୂଆ ଅଧିନାୟକ ତଥା ଇଂଲଣ୍ଡର କିମ୍ବଦନ୍ତୀ ଅଲରାଉଣ୍ଡର ବେନ୍ ଷ୍ଟୋକ୍ସଙ୍କୁ ପଛରେ ପକାଇ ଦେଇଥିଲେ। ଏଯାବତ ଟେଷ୍ଟ କ୍ରିକେଟରେ ୮୩ ମ୍ୟାଚ୍ରେ ୫୨୮୦ ରନ୍ କରିଥିବା ବେଳେ ବେୟାରଷ୍ଟୋ ୮୭ ମ୍ୟାଚ୍ରେ ୫୪୧୫ ରନ୍ କରିଛନ୍ତି।