ଭଦ୍ରକ ଅଫିସ/ଭଣ୍ଡାରିପୋଖରୀ,୨୭ା୫(ଡି.ଏନ୍.ଏ.): ‘ୟାସ୍’ର ତାଣ୍ଡବ ଯୋଗୁ ବୈତରଣୀ ଧୀରେ ଧୀରେ ଫୁଲିବାରେ ଲାଗିଛି। ଆଖୁଆପଦା ଠାରେ ବିପଦ ସଙ୍କେତ ୧୭.୮୩ ମିଟର ରହିଥିବା ବେଳେ ମଧ୍ୟାହ୍ନ ୧୨ଟା ସୁଦ୍ଧା ୧୭.୯୨ ମିଟର ପ୍ରବାହିତ ହେଉଛି। ପର୍ଯ୍ୟାୟ କ୍ରମେ ବଢ଼ିବାରେ ଲାଗିଥିବାରୁ ବନ୍ୟା ପରିସ୍ଥିତି ସୃଷ୍ଟି ନିଶ୍ଚୟ ହେବ ବୋଲି ସୂଚନା ମିଳିଛି।
ତେବେ ବନ୍ୟାଜଳ ଧୀରେ ଧୀରେ ବୁଧବାର ରାତିରୁ ବଢ଼ିବା ଆରମ୍ଭ କରି ଗୁରୁବାର ପୂର୍ବାହ୍ନ ୧୦ଟାରେ ୧୫.୪୬ ମିଟର ଥିଲା। ହଠାତ୍ ୧୧ଟାଠାରୁ ବୃଦ୍ଧି ପାଇ ୧୬.୯୫ମିଟର , ୧୧ ଟା ୪୫ ରେ ବିପଦ ସଙ୍କେତ ୧୭. ୮୩ ମିଟରଅତିକ୍ରମ କରିଥିଲା। ୧୨ ଟାରେ ୧୭.୯୨ମିଟର, ୧ଟାରେ ୧୮.୨୦ମିଟର, ୨ଟାରେ ୧୮ . ୩୭ ମିଟର ଅର୍ଥାତ ବିପଦ ସଙ୍କେତ ଉପରେ ପ୍ରବାହିତ ହେଉଛି। ବୈତରଣୀ ଉପରମୁଣ୍ଡରେ ହୋଇଥିବା ବର୍ଷା ରେକର୍ଡ ଅନୁଯାୟୀ କେନ୍ଦୁଝରରେ ୧୭୮.୪୦ ମିଲି, ଆନନ୍ଦପୁର ୫୫.୬୦ ମିଲି, ଆଖୁଆପଦା ୨୫.୦୨ ମିଲି ,ସୋମପାଟଣା ୧୩୩.୨୦ ମିଲି, ଠାକୁରମୁଣ୍ଡା ୧୪୦.୦୦, ଚମ୍ପୁଆରେ ୨୦୪.୭୦ ମିଲିମିଟର ବର୍ଷା ହୋଇଥିବା ରେକର୍ଡ କରାଯାଇଛି। ବାତ୍ୟା ୟାସ୍ ପରେ ବୈତରଣୀ ନଦୀରେ ବନ୍ୟା ଦେଖି ଲୋକେ ଏକପ୍ରକାର ଭୟଭୀତ ହୋଇପଡ଼ିଛନ୍ତି।