ତିହିଡ଼ି,୨୯।୩ (ସଞ୍ଜିତ ବଳ):ଭଦ୍ରକ ଜିଲା ଧାମନଗର ବିଧାନସଭା ନିର୍ବାଚନମଣ୍ଡଳୀରେ ବିଜେଡି ପ୍ରାର୍ଥୀ ଘୋଷଣା କରିଥିବା ବେଳେ ଭାଜପା ଓ କଂଗ୍ରେସ କାହାକୁ ପ୍ରାର୍ଥୀ କରିବ ଚିନ୍ତାରେ ଅଛି। ଏପରି ସ୍ଥଳେ କଂଗ୍ରେସରୁ ପ୍ରାର୍ଥୀ ହେବାକୁ ଆଶାୟୀଙ୍କ ସଂଖ୍ୟା ବଢ଼ିବାରେ ଲାଗିଛି। ତିହିଡ଼ି ବ୍ଲକର ୩ଜଣଙ୍କ ସମେତ ମୋଟ ୯ଜଣ ପ୍ରାର୍ଥୀ ହେବାକୁ ଆଶାୟୀ ଥିବା ଜଣାଯାଇଛି। ନିର୍ବାଚନମଣ୍ଡଳୀରେ କଂଗ୍ରେସ ଭୋଟରଙ୍କ ସଂଖ୍ୟା ନଗଣ୍ୟ ଥିବାବେଳେ ପ୍ରାର୍ଥୀ ହେବାକୁ ଏତେ ସଂଖ୍ୟାରେ ଆଶାୟୀ ରହିବା ଅନେକଙ୍କୁ ଆଶ୍ଚର୍ଯ୍ୟ କରିବା ସ୍ବାଭାବିକ।
ବ୍ଲକର ମୁକୁନ୍ଦପୁର ପଞ୍ଚାୟତ ଅଧୀନ ଗୁଡୁପାଳ ଗ୍ରାମର ପୀତାମ୍ବର ସେଠୀ, ବାରୋ ପଞ୍ଚାୟତ ଶାଶନଖାସ ଗ୍ରାମର ପ୍ରଦୀପ କୁମାର ଦାସ ଓ ବାମନବିନ୍ଧା ପଞ୍ଚାୟତର ଭାସ୍କର ସେଠୀଙ୍କ ସମେତ ମଧୁମିତା ସେଠୀ, ହୃଦାନନ୍ଦ ସେଠୀ, ପଞ୍ଚାନନ ମଣ୍ଡଳ, କୁମାର ଚିରଞ୍ଜୀବୀ, ରଞ୍ଜନ ବେହେରା ଓ ଜାନକୀ ଦାସ ପ୍ରାର୍ଥୀ ହେବାକୁ ଆଶାୟୀ ଥିବା ଜଣାପଡ଼ିଛି। ପୀତାମ୍ବର ୧୯୭୩ରେ ବ୍ଲକ କଂଗ୍ରେସ କମିଟିର ସଦସ୍ୟ ଭାବେ ଯୋଗ ଦେଇଥିଲେ। ୧୯୯୦ ସାଧାରଣ ନିର୍ବାଚନରେ ଚାନ୍ଦବାଲି ନିର୍ବାଚନମଣ୍ଡଳୀରେ ବିଧାୟକ ପ୍ରାର୍ଥୀ ଏବଂ ୨୦୧୯ରେ ଭଦ୍ରକ ଲୋକ ସଭା ଆସନରେ ଏମ୍ପି ପ୍ରାର୍ଥୀ ହୋଇ ସ୍ବାଧୀନ ଭାବେ ସେ ପ୍ରତିଦ୍ୱନ୍ଦ୍ୱିତା କରିଥିଲେ। ନିର୍ବାଚନମଣ୍ଡଳୀର ଲୋକଙ୍କ ସମସ୍ୟା ସମାଧାନ ଦିଗରେ ସେ ନିଜକୁ ନିୟୋଜିତ କରିଥିବାରୁ ଟିକେଟ ପାଇଲେ ସେ କଡ଼ା ଟକ୍କର ଦେଇପାରିବେ ବୋଲି ଆଶାବାଦୀ ଅଛନ୍ତି। ସେହିପରି ଶିକ୍ଷକତାରୁ ଅବସର ନେଇଥିବା ପ୍ରଦୀପ କଂଗ୍ରେସ ପରିବାରର। ପ୍ରାର୍ଥୀ ହେଲେ ଆଶାନୁରୂପ ସଫଳତା ପାଇପାରିବେ ବୋଲି ପ୍ରଦୀପ ଦୃଢ଼ୋକ୍ତି ପ୍ରକାଶ କରିଛନ୍ତି। ଅନ୍ୟ ପ୍ରାର୍ଥୀମାନେ ମଧ୍ୟ ସାମାଜିକ କାର୍ଯ୍ୟରେ ନିଜକୁ ନିୟୋଜିତ କରିଥିବାରୁ ଟିକେଟ ପାଇବାକୁ ଆଶା ବାନ୍ଧି ରହିଛନ୍ତି।