ଭୋପାଳ ,୧୯।୧୦ : ମଧ୍ୟପ୍ରଦେଶର ଦାମୋହରୁ ଏକ ଆଶ୍ଚର୍ଯ୍ୟଜନକ ମାମଲା ସାମ୍ନାକୁ ଆସିଛି। ଯେଉଁଠାରେ ଜଣେ ମହିଳା ଅଧିକାରୀ ଏବଂ ତାଙ୍କ ୬ବର୍ଷର ଝିଅଙ୍କୁ ବଳାତ୍କାର ହେବାର ଧମକ ଦିଆଯାଇଛି। ଦମୋହରେ ଜଣେ ମହିଳା ଅଧିକାରୀ ଭୟରେ କାମ ଛାଡି ପୋଲିସ ପାଖରେ ପହଞ୍ଚି ସୁରକ୍ଷା ଲୋଡିବା ସହ ଭାଜପା ନେତାଙ୍କ ବିରୋଧରେ ମାମଲା ଦାଏର କରିଛନ୍ତି। ଏହି ମାମଲା ଦମୋହର ପଥରିଆ ପୌରପାଳିକାରେ ଘଟିଛି। ଏଠାରେ ପୋଷ୍ଟିଂ ହୋଇଥିବା ସିଏମଓ ଜ୍ୟୋତି ସୂନହରେଙ୍କୁ ଏଭଳି ଧମକ ମିଳିଛି। ପୌରସଂସ୍ଥା ଅଧ୍ୟକ୍ଷଙ୍କ ପୁତୁରା ତଥା ଭାଜପା ନେତା ଆଶିଷ ବିଶ୍ୱକର୍ମାଙ୍କ ବିରୋଧରେ ଏହି ଅଭିଯୋଗ କରାଯାଇଛି। ବୁଧବାର ସନ୍ଧ୍ୟା ଠାରୁ ବରିଷ୍ଠ ପୋଲିସ ଅଧିକାରୀଙ୍କ ପାଖରେ ପହଞ୍ଚିଥିବା ଜ୍ୟୋତିଙ୍କ ଅଭିଯୋଗ ଅନୁସାରେ ବିଳମ୍ବିତ ରାତିରେ ପୋଲିସ ଏକ ମାମଲା ରୁଜୁ କରିଛି।
ସିଏମଓ ଜ୍ୟୋତି କହିଛନ୍ତି, ମ୍ୟୁନିସିପାଲିଟି ଅଧ୍ୟକ୍ଷଙ୍କ ପୁତୁରା ଆଶିଷ ଗତ କିଛି ମାସ ଧରି ତାଙ୍କୁ ହଇରାଣ କରୁଥିଲେ। ମ୍ୟୁନିସିପାଲିଟିର କାର୍ଯ୍ୟରେ ଅନିୟମିତତା ସୃଷ୍ଟି କରିବାକୁ ସେମାନେ ତାଙ୍କ ଉପରେ ଚାପ ପକାଉଥିଲେ ଏବଂ ଯେତେବେଳେ ସେ ବୈାଇନ କାମ କରିବାକୁ ମନା କରିଥିଲେ, ସେତେବେଳେ ତାଙ୍କୁ ଅନେକ ଉପାୟରେ ନିର୍ଯାତନା ଦିଆଯାଉଥିଲା। ବୁଧବାର ଅଭିଯୁକ୍ତ ଭାଜପା ନେତା ସିଏମଓଙ୍କୁ ଡାକିଥିଲେ ଏବଂ ତାଙ୍କୁ ଦୁର୍ବ୍ୟବହାର କରିବା ସହିତ ତାଙ୍କୁ ଏବଂ ତାଙ୍କର ୬ ବର୍ଷର ଝିଅକୁ ବଳାତ୍କାର କରିବାର ଧମକ ଦେଇଥିଲେ। ଏହା ପରେ ମହିଳା ଅଧିକାରୀ ଭୟଭୀତ ହୋଇ ଜିଲା ମୁଖ୍ୟାଳୟକୁ ଯାଇ କଲେକ୍ଟରଙ୍କୁ ତାଙ୍କ କଷ୍ଟ ବିଷୟରେ ବର୍ଣ୍ଣନା କରିଥିଲେ।
ଏହା ପରେ ସେ ଏସପିଙ୍କୁ ଭେଟିବାକୁ ଚାହୁଁଥିଲେ କିନ୍ତୁ ଏସପି ନିର୍ବାଚନ ଡ୍ୟୁଟିରେ ଥିବାରୁ ସିଏମଓ ଅତିରିକ୍ତ ଏସପିଙ୍କ ନିକଟରେ ଅଭିଯୋଗ କରିଥିଲେ। ଅତିରିକ୍ତ ଏସପି ଏହି ମାମଲାକୁ ଗୁରୁତର ସହ ନେଇ ସିଏସପଙ୍କୁ ଯାଞ୍ଚ କରିବାକୁ ନିର୍ଦ୍ଦେଶ ଦେଇଥିଲେ। ବିଳମ୍ବିତ ରାତି ପର୍ଯ୍ୟନ୍ତ ଚାଲିଥିବା ଅନୁସନ୍ଧାନ ପରେ ଶେଷରେ ପୀଡିତା ମହିଳା ଅଧିକାରୀଙ୍କ ରିପୋର୍ଟରେ ଭାଜପା ନେତା ସୋନୁ ଓରଫ ଆଶିଷ ବିଶ୍ୱକର୍ମାଙ୍କ ବିରୋଧରେ ଅପରାଧିକ ମାମଲା ରୁଜୁ ହୋଇଛି। ସେ ବର୍ତ୍ତମାନ ପୋଲିସ ହେପାଜତରେ ଅଛନ୍ତି। ଏହି ଘଟଣା ସାମ୍ନାକୁ ଆସିବା ପରେ ସ୍ଥାନୀୟ ଅଞ୍ଚଳରେ ଉତ୍ତେଜନା ସୃଷ୍ଟି ହୋଇଥିଲା ବିରୋଧୀ ଏହାକୁ ନେଇ ପ୍ରଶ୍ନ ଉଠାଇଛନ୍ତି। ରାଜ୍ୟରେ ମହିଳାଙ୍କ ପାଇଁ ଚାଲିଥିବା ଯୋଜନାଗୁଡିକ ଉପରେ ସରକାର ଯୁକ୍ତି ବାଢୁଥିବାବେଳେ ଜଣେ ସରକାରୀ ଅଧିକାରୀଙ୍କ ପ୍ରତି ଶାସକଦଳ ଜଣେ ନେତାଙ୍କ ଏଭଳି କାର୍ଯ୍ୟ ନିନ୍ଦା ଜନକ। ଯେତେବେଳେ ଜଣେ ମହିଳା ଅଧିକାରୀଙ୍କୁ ହଇରାଣ କରାଯାଉଛି। ସେତେବେଳେ ରାଜ୍ୟର ସାଧାରଣ ମହିଳାମାନେ କେତେ ସୁରକ୍ଷିତ ବୋଲି ବିରୋଧୀ କହିଛନ୍ତି।