ଭୁବନେଶ୍ୱର,୬।୧୦(ବ୍ୟୁରୋ): ରାଜଧାନୀରେ ବଜ୍ରକାପ୍ତା କାତି ର଼୍ୟାକେଟ। ପାର୍କରେ ହେଲା ଡିଲ୍। ଶେଷରେ ର଼୍ୟାକେଟରେ ସମ୍ପୃକ୍ତ ଦୁଇଜଣଙ୍କୁ କ୍ରାଇବ୍ରାଞ୍ଚ ଏସ୍ଟିଏଫ୍ ଓ ଓ୍ବାଇଲ୍ଡଲାଇଫ୍ କ୍ରାଇମ କଣ୍ଟ୍ରୋଲ ବ୍ୟୁରୋ(ଡବ୍ଲ୍ୟୁସିସିବି) ଗିରଫ କରିବା ସହ ସେମାନଙ୍କଠାରୁ ୨କେଜିରୁ ଉର୍ଦ୍ଧ୍ୱ କାତି ଜବତ କରିଛି। ଅଭିଯୁକ୍ତ ଦ୍ୱୟ ହେଲେ ବାଲିପାଟଣା ଅଞ୍ଚଳର ସୁକାନ୍ତ କୁମାର ମୁଦୁଲି ଓ ପିପିଲି ଅଞ୍ଚଳର ପ୍ରସନ୍ନ ରାୟ। ଏନେଇ ଅଧିକ ତଦନ୍ତ ଚାଲିଥିବା ଜଣେ ଅଧିକାରୀ କହିଛନ୍ତି।
ତାଙ୍କ ସୂଚନାନୁସାରେ, ଭୁବନେଶ୍ୱରରେ ବଜ୍ରକାପ୍ତା ର଼୍ୟାକେଟ ନେଇ ଖବର ମିଳିବା ପରେ ଡବ୍ଲ୍ୟୁସିସିବିର ଜଣେ ଅଧିକାରୀ ଗ୍ରାହକ ହୋଇ ପ୍ରଥମେ ସୁକାନ୍ତଙ୍କ ସହ ଯୋଗାଯୋଗ କରିଥିଲେ। ସୁକାନ୍ତ କାରବାରର ତରିକା ଜଣାଇ କେତେକ ସର୍ତ୍ତ ରଖିଥିଲେ। ପ୍ରଥମେ ୧୫ କାତିକୁ ୮୦ହଜାର ଟଙ୍କା ଦେଇ କିଣିବା ପରେ ଅଧିକ କାତି କିଣିବାକୁ କହିଥିଲେ। ଏପରିକି କଥାବାର୍ତ୍ତାବେଳେ ଅନ୍ୟଜଣଙ୍କ ପାଖରେ ୨ କେଜି କାତି ଥିବା ମଧ୍ୟ ସେ ଜଣାଇଥିଲେ। ଏଥିରେ ଅଧିକାରୀ ଜଣକ ରାଜି ହେବା ପରେ ସୁକାନ୍ତ ଇନ୍ଦିରା ଗାନ୍ଧୀ ପାର୍କକୁ ଡାକିଥିଲେ। ଏହାପରେ ଏସ୍ଟିଏଫ୍ ସହ ଯୋଗାଯୋଗ କରାଯାଇ ସେଠାରେ ଚଢ଼ାଉ ଯୋଜନା ହୋଇଥିଲା। ମଙ୍ଗଳବାର ସୁକାନ୍ତ ଇନ୍ଦିରା ଗାନ୍ଧୀ ପାର୍କରେ ୧୫ କାତି ଧରି ଅପେକ୍ଷା କରିଥିଲେ। ଏହି ସମୟରେ ମିଳିତ ଟିମ୍ ସେଠାରେ ଚଢ଼ାଉ କରି ତାଙ୍କୁ ଗିରଫ କରିବା ସହ ତାଙ୍କଠାରୁ ୧୫ ବଜ୍ରକାପ୍ତା କାତି ଜବତ କରିଥିଲା। ପରେ ସୁକାନ୍ତଙ୍କୁ ଧରି ଟିମ୍ ର଼୍ୟାକେଟର ମାଷ୍ଟରମାଇଣ୍ଡ୍ ପ୍ରସନ୍ନଙ୍କୁ ପିପିଲି ଟୋଲ ଗେଟ୍ ନିକଟ ଜଇସିପାଟଣା ଛକରୁ ଧରିଥିଲା। ତାଙ୍କଠାରୁ ୨ କେଜିରୁ ଊର୍ଦ୍ଧ୍ୱ କାତି ଜବତ କରାଯାଇଥିଲା। ୨ ଅଭିଯୁକ୍ତଙ୍କ ପାଖରୁ ୨ଟି ବାଇକ୍ ଓ ୨ଟି ମୋବାଇଲ ଫୋନ ମଧ୍ୟ ଜବତ କରାଯାଇଛି। ଉଭୟଙ୍କୁ ଭୁବନେଶ୍ୱର ଅଣାଯାଇ ପଚରାଉଚରା କରାଯାଉଥିବାବେଳେ ବହୁ ଗୁରୁତ୍ୱପୂର୍ଣ୍ଣ ତଥ୍ୟ ମିଳିଥିବା ଜଣାପଡିଛି। ଏହି ଅପରେଶନରେ କ୍ରାଇମବ୍ରାଞ୍ଚ ଏସ୍ଟିଏଫ୍ ଟିମ୍ ସହିତ ଡବ୍ଲ୍ୟୁସିସିବିର ଏକ ଦୁଇ ଜଣିଆ ଟିମ୍, ଖୋର୍ଦ୍ଧା ଜିଲାର ଅବୈତନିକ ବନ୍ୟପ୍ରାଣୀ ତତ୍ତ୍ୱାବଧାରକ ଶୁଭେନ୍ଦୁ ମଲ୍ଲିକ ମଧ୍ୟ ସାମିଲ ଥିଲେ। ତେବେ ଏସ୍ଟିଏଫ୍ ଏହି ମାମଲାକୁ ନଗର ବନଖଣ୍ଡକୁ ହସ୍ତାନ୍ତର କରିଥିବାବେଳେ ବୁଧବାର ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯିବ ବୋଲି ସୂଚନା ମିଳିଛି।
