ବେଙ୍ଗାଲୁରୁ,୯।୫: କର୍ନାଟକ ବିଧାନସଭା ନିର୍ବାଚନ ପାଇଁ ବୁଧବାର ଅର୍ଥାତ୍ ୧୦ ମେ’ରେ ଭୋଟ ଗ୍ରହଣ ହେବାକୁ ଯାଉଛି। ଏହାର ଠିକ ଗୋଟିଏ ଦିନ ପୂର୍ବରୁ ମଙ୍ଗଳବାର ବଜରଙ୍ଗ ଦଳ ଓ ବିଶ୍ୱ ହିନ୍ଦୁ ପରିଷଦ ସାରା ଦେଶରେ ହନୁମାନ ଚାଳିଶା ପାଠ କରିବାକୁ ଘୋଷଣା କରିଛି। ସୂଚନାଯୋଗ୍ୟ, କର୍ନାଟକ ନିର୍ବାଚନରେ କଂଗ୍ରେସର ଘୋଷଣା ପତ୍ରରେ ବଜରଙ୍ଗ ଦଳକୁ ବ୍ୟାନ କରିବାକୁ ଘୋଷଣା କରାଯାଇଛି। ଏହା ଉପରେ ଭାରତୀୟ ଜନତା ପାର୍ଟି(ଭାଜପା) ଏହି ପ୍ରସଙ୍ଗକୁ ‘ବଜରଙ୍ଗ ବଲି’ ସହ ଯୋଡି ଦେଇଛି। ଏହାକୁ ନେଇ ନିର୍ବାଚନ ପ୍ରଚାରର ଶେଷ ୪ ଦିନ ବହୁତ ରାଜନୀତି ହୋଇଛି।
ସୂଚନାଯୋଗ୍ୟ, କଂଗ୍ରେସ ତା’ର ଘୋଷଣା ପତ୍ରରେ କହିଛି, ରାଜ୍ୟରେ କଂଗ୍ରେସ ସରକାର ଗଠନ କଲେ ଏହାପରେ ପରେ ବଜରଙ୍ଗ ଦଳ, ପିଏଫଆଇ ସମେତ ଜାତି ଓ ଧର୍ମ ଆଧାରରେ ସଂମ୍ପ୍ରଦାୟଙ୍କ ମଧ୍ୟରେ ଅସନ୍ତୁଷ୍ଟ ଜାଗ୍ରତ କରୁଥିବା ସମସ୍ତ ସଙ୍ଗଠନ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରି ବ୍ୟାନ କରିବ।
କଂଗ୍ରେସର ଏହି ଘୋଷଣା ପତ୍ରକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କଂଗ୍ରେସ ଉପରେ ଖୁବ ବର୍ଷିଛନ୍ତି। ସେ ବଜରଙ୍କ ଦଳକୁ ବଜରଙ୍ଗ ବଲି ସହ ଯୋଡି ଦେଇଛନ୍ତି। ମୋଦି ତାଙ୍କ ରାଲିରେ କହିଥିଲେ, କଂଗ୍ରେସ ଦଳ ତା’ର ମନିଫେଷ୍ଟୋରେ ବଜରଙ୍ଗ ବଲିକୁ ତାଲାରେ ବନ୍ଦ କରିବାକୁ ନିର୍ଣ୍ଣୟ ନେଇଛି।