ନୂଆଦିଲ୍ଲୀ, ୨୧।୬ : ବିକଶିତ ତଥା ବିକାଶଶୀଳ ଦେଶ ମଧ୍ୟରେ ଅନ୍ତର୍ଜାତୀୟମଧ୍ୟସ୍ଥତା ଦ୍ୱାରା ପୃଥିବୀର ସନ୍ତୁଳନ ବଜାୟ ରହିବ ବୋଲି ସୁପ୍ରିମ୍କୋର୍ଟ ପ୍ରଧାନ ବିଚାରପତି (ସିଜେଆଇ) ଏନ.ଭି.ରମନା ଆହ୍ବାନ ଜଣାଇଛନ୍ତି। ମଙ୍ଗଳବାର ଭାରତର ପ୍ରଧାନ ବିଚାରପତି ଏକ କାର୍ଯ୍ୟକ୍ରମରେ ଯୋଗଦେଇ ଏଭଳି କହିଛନ୍ତି।
ବର୍ତ୍ତମାନ ସିଙ୍ଗାପୁର, ଲଣ୍ଡନ, ପ୍ୟାରିସ ଏବଂ ଷ୍ଟକହୋମ ଆଦି ବିକଶିତ ବ୍ୟବସାୟିକ କେନ୍ଦ୍ରରେ ଏହା ଜାରି ରହିଛି। ବିବାଦର ସମାଧାନ ପାଇଁ ଏହାର ଭିତ୍ତିଭୂମି ମଜବୁତ କରୁଥିବା ବିକାଶଶୀଳ ଦେଶମାନଙ୍କରେ ଏଭଳି ପ୍ରସଙ୍ଗର ପ୍ରତିକାର ରହିଛି ବୋଲି ସେ କହିଛନ୍ତି। ସେ ଦର୍ଶାଇଛନ୍ତି ଯେ ଯଦିଓ ଅଧିକାଂଶ ବିବାଦ ବିକାଶଶୀଳ ଦେଶମାନଙ୍କରେ ଉତ୍ପନ୍ନ ହୁଏ, ସେଠାରେ ଥିବା ଦଳଗୁଡିକ ପ୍ରତିଷ୍ଠିତ ସମାଧାନ କେନ୍ଦ୍ର ଚୟନ କରନ୍ତି। କାରଣ ବିକାଶଶୀଳ ଦେଶଗୁଡ଼ିକର ସମ୍ବଳ ଏବଂ ଭିତ୍ତିଭୂମିର ଅଭାବ ରହିଥାଏ।
ବିକାଶଶୀଳ ଦେଶମାନଙ୍କ ପାଇଁ, ବିବାଦର ସମାଧାନ ପାଇଁ ପର୍ଯ୍ୟାପ୍ତ ଭିତ୍ତିଭୂମି ସୃଷ୍ଟି କରିବା ଅତ୍ୟନ୍ତ ଜରୁରୀ। ଆମର ବିବାଦର ସମାଧାନ ସୁବିଧା ଆମର ନିବେଶ ପ୍ରବାହ ସହିତ ମେଳ ହେବା ଆବଶ୍ୟକ। ଆଧୁନିକ ଅନୁଷ୍ଠାନିକ ଆର୍ବିଟ୍ରେଶନ ସେଣ୍ଟର ଗଠନ କରି ଏକ ସନ୍ତୁଳନ ରକ୍ଷା କରାଯାଇପାରିବ ବୋଲି ସେ ପରାମର୍ଶ ଦେଇଛନ୍ତି। ସେ କହିଛନ୍ତି ଯେ ଏହିପରି ସଂସ୍ଥାଗୁଡ଼ିକର ପୂର୍ବ-ସ୍ଥାପିତ ନିୟମ ଏବଂ ଢାଞ୍ଚା ନିଶ୍ଚିତତା ତଥା ସ୍ବଚ୍ଛତା ପ୍ରଦାନ କରିଥାଏ ଯାହା ଦ୍ୱାରା ବିବାଦ ସମାଧାନ ପ୍ରଣାଳୀରେ ବିଭିନ୍ନ ପକ୍ଷମାନେ ଉପକୃତ ହୋଇଥାନ୍ତି। ସମଗ୍ର ବିଶ୍ୱରୁ ଆସୁଥିବା ପ୍ୟାନେଲିଷ୍ଟ ଏବଂ ଆର୍ବିଟ୍ରେଟରମାନଙ୍କ ଅଭିଜ୍ଞତାର ବିବିଧତ ଦ୍ୱାରା ପ୍ରଭାବଶାଳୀ ଜ୍ଞାନର ଆଦାନପ୍ରଦାନ ସହଜ ହୋଇଥାଏ।
ପ୍ରଧାନ ବିଚାରପତି ପରାମର୍ଶ ଦେଇଛନ୍ତି ଯେ ସମଗ୍ର ବିଶ୍ୱରେ କାର୍ଯ୍ୟ କରୁଥିବା ଅନୁଷ୍ଠାନିକ ଆର୍ବିଟ୍ରେଶନ ସେଣ୍ଟସରଗୁଡ଼ିକର ଏକ ମିଳିତ ପରିଷଦ କିମ୍ବା କନଫେଡେରେଶନ ଗଠନ କରିବା ପାଇଁ ହାତ ମିଳାଇବା ଅପରିହାର୍ଯ୍ୟ ହୋଇପଡ଼ିଛି।