ବଲାଙ୍ଗୀର,୨୮ା୧୦(ବୀରେନ୍ଦ୍ର କୁମାର ଝାଙ୍କର): ଜାତୀୟ ସ୍ତରର ମର୍ଯ୍ୟଦାଜନକ କଣ୍ଠସଙ୍ଗୀତ ପ୍ରତିଯୋଗିତା ଇଣ୍ଡିଆନ୍ ଆଇଡଲ ସିଜନ୍ ୧୪ର ଅଡିଶନ୍ ରାଉଣ୍ଡରେ ବଲାଙ୍ଗୀରର ଉଦୟୀମାନ ଯୁବ କଣ୍ଠଶିଳ୍ପୀ ଏବଂ ସଙ୍ଗୀତଜ୍ଞ ଅଜୟ ଅମର ସିଂଦେଓ ଗୋଲଡେନ୍ ଟିକଟ ପାଇଛନ୍ତି। ସୋନି ଟିଭି ପ୍ରାୟୋଜିତ ଲୋକପ୍ରିୟ ଇଣ୍ଡିଆନ୍ ଆଇଡଲ ଅଡିଶନ୍ ରାଉଣ୍ଡରେ ଯୋଗ୍ୟ ବିବେଚିତ ଅଜୟ ଅମରଙ୍କ ଏପିଶୋଡ ପ୍ରସାରିତ ହେବା ପରେ ବଲାଙ୍ଗୀର ସମେତ ସାରା ରାଜ୍ୟରେ ତାଙ୍କୁ ଶୁଭେଚ୍ଛୁ ମହଲରେ ଶୁଭେଚ୍ଛା ଜଣାଯାଇଛି। ବଲାଙ୍ଗୀର ଜିଲାପାଳ ଚଞ୍ଚଳ ରାଣା ମଧ୍ୟ ତାଙ୍କୁ ଜିଲାପାଳ ଅଫିସକୁ ଆମନ୍ତ୍ରଣ କରି ଶୁଭେଚ୍ଛା ଜଣାଇଛନ୍ତି। ତାଙ୍କର ଏଭଳି ନିଷ୍ଠା ଏବଂ ସଙ୍ଗୀତ ପ୍ରତିଭାକୁ ସେ ପ୍ରଶଂସା କରି ଆଗାମୀ ଦିନରେ ଇଣ୍ଡିଆନ୍ ଆଇଡର ବିଭିନ୍ନ ସୋପନରେ ତାଙ୍କର ସଫଳତା କାମନା କରିଥିଲେ। ଏହି ଅବସରରେ ଅଜୟଙ୍କ ପିତା ଦିଲୀପ କୁମାର ସିଂଦେଓ ଓ ମାତା ନଳିନୀ ସିଂ ଏବଂ ଜିଲା ସଂସ୍କୃତି ଅଧିକାରୀ ରଶ୍ମୀରଞ୍ଜନ ମିଶ୍ର ଉପସ୍ଥିତ ଥିଲେ। ଜିଲାପାଳ ରାଣା ଉଭୟ ମାତାପିତାଙ୍କୁ ମଧ୍ୟ ଶୁଭେଚ୍ଛା ଜଣାଇଥିଲେ। ଇଣ୍ଡିଆନ ଆଇଡଲ ପ୍ରତିଯୋଗିତାରେ ଭାଗ ନେବାକୁ ଅଜୟ ସେପ୍ଟେମ୍ବରରେ ମୁମ୍ବାଇ ଯାଇଥିଲେ। ଅଡିଶନ୍ ରାଉଣ୍ଡରେ ଦେଶର ବିଭିନ୍ନ ରାଜ୍ୟରୁ ହଜାର ହଜାର କଣ୍ଠଶିଳ୍ପୀ ଏବଂ ସଙ୍ଗୀତଜ୍ଞ ସେମାନଙ୍କ ପ୍ରତିଭା ଦେଖାଇବାକୁ ଏହି କାର୍ଯ୍ୟକ୍ରମରେ ଅଂଶଗ୍ରହଣ କରିଥିଲେ। ବିଚାରକ ଭାବେ ପ୍ରଖ୍ୟାତ କଣ୍ଠଶିଳ୍ପୀ କୁମାର ସାନୁ, ଶ୍ରେୟା ଘୋଷାଲ ଏବଂ ସଙ୍ଗୀତଜ୍ଞ ବିଶାଳ ଦାଦଲାନୀ ଯୁବ କଣ୍ଠଶିଳ୍ପୀ ଅଜୟଙ୍କ ଗୀତ ଏବଂ ଭାଓଲିନ୍ ବାଦନ ଶୁଣିବା ପରେ ଠିଆ ହୋଇ ପ୍ରଶଂସା କରିଥିଲେ।