ଭୁବନେଶ୍ୱର,(ବ୍ୟୁରୋ)/ବାଲେଶ୍ୱର ଅଫିସ୍, ୮।୪: ଆମେରିକାରୁ ପରିଚାଳିତ ମୋବାଇଲ ଆପ୍ ‘କ୍ଲାଉଡ୍ ଫଟ୍’ରେ ଅଳ୍ପ ଟଙ୍କା ନିବେଶ କରି ଲକ୍ଷାଧିକ ଟଙ୍କା ପାଇବା ଆଶାରେ ଦେଶବ୍ୟାପୀ ୮୦ ହଜାରରୁ ଊର୍ଦ୍ଧ୍ୱ ଲୋକ ଠକେଇର ଶିକାର ହୋଇଛନ୍ତି। ଏହି ମାମଲାରେ କ୍ରାଇମବ୍ରାଞ୍ଚର ଅର୍ଥନୈତିକ ଅପରାଧ ଶାଖା (ଇଓଡବ୍ଲ୍ୟୁ) ଉକ୍ତ କମ୍ପାନୀର ବାଲେଶ୍ୱର ଜିଲା ମୁଖ୍ୟଙ୍କୁ ଗିରଫ କରିଛି। ସେ ହେଲେ ସ୍ଥାନୀୟ ଅଙ୍ଗାରଗଡ଼ିଆ ଅଞ୍ଚଳର ନିଲେଶ କୁମାର କର। ତାଙ୍କଠାରୁ ଠକେଇ ସମ୍ବନ୍ଧିତ ବହୁ ତଥ୍ୟ ଥିବା ଏକ ମୋବାଇଲ ଫୋନ୍ ଜବତ ହୋଇଛି। ନିଲେଶଙ୍କୁ ଗୁରୁବାର ବାଲେଶ୍ୱର ଓପିଆଇଡି କୋର୍ଟରେ ହାଜର କରି ଇଓଡବ୍ଲ୍ୟୁ ଶୁକ୍ରବାରଠାରୁ ତାଙ୍କୁ ୪ଦିନିଆ ରିମାଣ୍ଡରେ ଆଣି ଅଧିକ ପଚରାଉଚରା କରୁଛି।
ବିଶେଷକରି ସୋସିଆଲ ମିଡିଆରେ ବିଶ୍ୱାସ ଜନ୍ମାଇବା ଭଳି ଭିଡିଓ ଛାଡ଼ି ଲୋକଙ୍କୁ ଫସାଇଥାନ୍ତି। ରିଚାର୍ଡ ପର୍ସଲ୍ ନାମକ ଜଣେ ବ୍ୟକ୍ତି ନିଜକୁ ଭାରତର ଆଞ୍ଚଳିକ ମୁଖପାତ୍ର କହିବା ସହ ଇଂଲିଶ ଭାଷାରେ ଭିଡିଓ ବାର୍ତ୍ତା ଦେଇ ଲୋଭନୀୟ ଅଫର ବିଷୟରେ କହୁଥିଲେ। ଏହି କମ୍ପାନୀ ଭାରତୀୟ ରିଜର୍ଭ ବ୍ୟାଙ୍କ ସହ ଅନୁବନ୍ଧିତ ଓ ଭାରତ ସରକାରଙ୍କ ସହ ୧୦ ବର୍ଷର ଚୁକ୍ତି ହୋଇଥିବାର ଜାଲ ଦସ୍ତାବିଜ ଦେଖାଉଥିଲେ। ଏହା କ୍ରିପ୍ଟୋ ମାଇନିଂ କମ୍ପାନୀ କହି ଅଳ୍ପ ଟଙ୍କା ନିବେଶ କରିବା ପରେ ଲକ୍ଷାଧିକ ଟଙ୍କାର ରୋଜଗାର ହୋଇପାରିବ ବୋଲି କହୁଥିଲେ। ୬୬୫ ଟଙ୍କା ଡିପୋଜିଟ୍ କରି ଲୋକେ ନାମ ପଞ୍ଜୀକରଣ କରୁଥିଲେ। ଏହାର ୩୭ଦିନ ପରେ ୧୪୭୭ ଟଙ୍କା ମିଳିବ ଓ ପ୍ରତିଦିନ ୪୦ ଟଙ୍କାର ବୋନସ୍ ସହ ପ୍ରତିଥର ଲଗ୍ଇନ୍ କରିବା ପରେ ୧ ଟଙ୍କା ୭୫ ପଇସା ମିଳିବ ବୋଲି କୁହାଯାଉଥିଲା। ଅଧିକ ଟଙ୍କା ନିବେଶ କଲେ ସେହିପରି ବହୁଗୁଣ ଟଙ୍କା ମିଳିବ। ଏପରିକି ଅନ୍ୟ ଲୋକଙ୍କୁ ସାମିଲ କଲେ ରେଫରାଲ ବୋନସ୍ର ଅଫର ଥିଲା। ତେବେ କମ୍ପାନୀର ବାଲେଶ୍ୱର ଜିଲା ମୁଖ୍ୟ ଥିବା ନିଲେଶଙ୍କ ଦ୍ୱାରା ୨୦୦ ଲୋକ ପ୍ରଥମ ପର୍ଯ୍ୟାୟରେ କିଛି ଟଙ୍କା ପାଇବା ପରେ ଲକ୍ଷାଧିକ ଟଙ୍କା ନିବେଶ କରି ଠକେଇର ଶିକାର ହୋଇଥିଲେ। ସହଦେବଖୁଣ୍ଟିଆର ମହାମାନ୍ୟ ଜେନା ଜାନୁୟାରୀ ୨୩ରୁ ମାର୍ଚ୍ଚ ୨୩ ମଧ୍ୟରେ ୨ ଲକ୍ଷ ୧୩ ହଜାର ଟଙ୍କା ନିବେଶ କରିଥିଲେ। ତାଙ୍କ ୱାଲେଟ୍ରେ ୫୦ ଲକ୍ଷ ୫୭ ହଜାର ୧୧୭ ଟଙ୍କା ଥିବା ଦେଖାଉଥିଲା। ହେଲେ ପରବର୍ତ୍ତୀ ସମୟରେ ୱେବ୍ସାଇଟ୍ ବନ୍ଦ ହୋଇଯିବାରୁ ଉକ୍ତ ଟଙ୍କାକୁ ସେ ଉଠାଇ ପାରି ନ ଥିଲେ। ଏନେଇ ସେ ଅଭିଯୋଗ କରିବା ପରେ ଇଓଡବ୍ଲ୍ୟୁ ବୁଧବାର ଏକ ମାମଲା (ନଂ.୧୫/୨୦୨୩) ରୁଜୁ କରି ତଦନ୍ତ ଆରମ୍ଭ କରିଥିଲା। ତେବେ ଅଭିଯୁକ୍ତ ନିଲେଶଙ୍କୁ ଏହି ଠକେଇ ସଂକ୍ରାନ୍ତରେ ଇଓଡବ୍ଲ୍ୟୁ ଜେରା କରି ଅଧିକ ତଥ୍ୟ ହାସଲ କରୁଛି। ଏଥିରେ ସମ୍ପୃକ୍ତ ଥିବା ଅନ୍ୟ ଅଭିଯୁକ୍ତଙ୍କୁ ଇଓଡବ୍ଲ୍ୟୁ ଧରିବାକୁ ପ୍ରୟାସ ଜାରି ରଖିଛି।