ରସୁଲପୁର,୧୩ା୧୧(ଡି.ଏନ.ଏ.): ରସୁଲପୁର ତହସିଲ ଅଧୀନ ଯାବରା ବାଲି ଘାଟରୁ ବାଲି ଉତ୍ତୋଳନକୁ ନେଇ ବିବାଦ ଦେଖାଦେଇଥିଲା। ଉକ୍ତ ବିବାଦ କ୍ରମଶଃ ହାଇକୋର୍ଟଙ୍କ ପର୍ଯ୍ୟନ୍ତ ଯାଇଥିଲା। ହାଇକୋର୍ଟ ଏହାର ବିଚାର କରି ତଦନ୍ତ କରିବାକୁ ପ୍ରଶାସନକୁ ନିର୍ଦ୍ଦେଶ ଦେଇଥିଲେ। ସେହି ଅନୁସାରେ ଗତ ବୁଧବାର ଏହାର ତଦନ୍ତ ଆରମ୍ଭ ହୋଇଛି। ଏକ ତଦନ୍ତକାରୀ ଦଳ ବାଲିଘାଟ ନିକଟରେ ପହଞ୍ଚତ୍ ତଦନ୍ତ କରି ଫେରିଛି। ତଦନ୍ତ ରିପୋର୍ଟ ଯାଜପୁର ଜିଲାପାଳଙ୍କ ଜରିଆରେ କୋର୍ଟଙ୍କ ନିକଟରେ ଉପସ୍ଥାପନ କରାଯିବ।
ପ୍ରକାଶଯୋଗ୍ୟ, ଯାବରା ବାଲିଘାଟରୁ ବେଆଇନ ବାଲି ଉତ୍ତୋଳନ ହେଉଥିଲା। ପରେ ଏହିଘାଟକୁ ନିଲାମ ଦିଆଯାଇଥିଲା। ଘାଟ ନିକଟରୁ ଗ୍ରାମର କେତେଜଣ ଲୋକ ବେଆଇନ ବାଲି ଚାଲାଣ କରିଥିଲେ। ଏହାକୁ ନେଇ ଉଭୟ ନିଲାମଧାରୀ ଓ ଗ୍ରାମବାସୀଙ୍କ ମଧ୍ୟରେ ବିବାଦ ଉପୁଜିଥିଲା। ଲିଜଧାରୀ ଲିଜ୍ ଅଞ୍ଚଳରୁ ବାଲି ନ ଉଠାଇ ଯାବରା ପୋଲ ନିକଟରୁ ବାଲି ଉତ୍ତୋଳନ କରୁଥିବା ତହସିଲ ପ୍ରଶାସନ ନିକଟରେ ଅଭିଯୋଗ ହୋଇଥିଲା। ତହସିଲ ପକ୍ଷରୁ ବେଆଇନ ବାଲି ଉଠାଣ ଉପରେ ରୋକ ଲଗାଇବା ପାଇଁ ପଦକ୍ଷେପ ନିଆଯାଇଥିଲା। ଏପରି କି ବାଲି ପରିବହନକୁ ନେଇ ଗ୍ରାମବାସୀ ଓ ପ୍ରଶାସନ ମଧ୍ୟରେ ମୁହାଁମୁହିଁ ପରିସ୍ଥିତି ହୋଇଥିଲା। ପୋଲିସ, ତହସିଲ ପ୍ରଶାସନକୁ ଦୁର୍ବ୍ୟବହାର କରିବା ଓ ଗଣ୍ଡଗୋଳ ସୃଷ୍ଟି କରୁଥିବା ଅଭିଯୋଗରେ କେତେଜଣ ବ୍ୟକ୍ତିଙ୍କୁ ଗିରଫ କରାଯାଇଥିଲା। ଏହି ବିବାଦ କ୍ରମଶଃ ଜଟିଳ ହେବାରୁ ଗ୍ରାମବାସୀ କୋର୍ଟଙ୍କ ଦ୍ୱାରସ୍ଥ ହୋଇଥିଲେ। ଏବେ କୋର୍ଟଙ୍କ ନିର୍ଦ୍ଦେଶ ମୁତାବକ ଯାଜପୁର ଉପଜିଲାପାଳ ନାରାୟଣଚନ୍ଦ୍ର ଧଳଙ୍କ ନେତୃତ୍ୱରେ ଖଣି ଉପନିର୍ଦ୍ଦେଶକ ଡମ୍ବରୁଧର ମହାନ୍ତି, ଭୂତତ୍ତ୍ୱବିତ୍ ସନ୍ତୋଷୀ ସେଠୀ, ରସୁଲପୁର ତହସିଲଦାର ଜ୍ୟୋତିକାନ୍ତ ଭୁଜବଳ, କୁଆଖିଆ ଥାନା ଅଧିକାରୀ ମନୋଜ କୁମାର ସ୍ବାଇଁ, ତହସିଲ ମୁଖ୍ୟକିରାଣି ଗଗନ ବିହାରୀ ଦାସ, ରାଜସ୍ବ ନିରୀକ୍ଷକ ରମେଶ ଚନ୍ଦ୍ର ସାହୁ ପ୍ରମୁଖ ଘଟଣାସ୍ଥଳ ପରିଦର୍ଶନ କରିଛନ୍ତି। ତଦନ୍ତକାରୀ ଦଳ ବାଲିଘାଟ ନକ୍ସାକୁ ନିରୀକ୍ଷଣ କରିଥିଲେ। ସେମାନେ କ’ଣ ସ୍ଥିତି ଦେଖିଲେ ତାର’ ରିପୋର୍ଟ ଜିଲାପାଳଙ୍କୁ ପ୍ରଦାନ କରାଯିବ ବୋଲି ତହସିଲଦାର ଭୁଜବଳ କହିଛନ୍ତି।