ତୁମୁଡିବନ୍ଧ,୨୫।୪: (ଡି.ଏନ.ଏ.) ଗ୍ରୀଷ୍ମପ୍ରବାହ ଜାରି ରହିଛି ନଦୀ ନାଳ ପୋଖରୀ ଗୁଡ଼ିକ ଶୁଖି ଯାଇଛି। ଭୂତଳ ଜଳସ୍ତର ହ୍ରାସ ପାଉଛି। ଫଳରେ ତୁମୁଡିବନ୍ଧ ଅଞ୍ଚଳରେ ପିଇବା ପାଣିର ସମସ୍ୟା ବଢ଼ିବାରେ ଲାଗିଛି। ଏହା ତୁମୁଡିବନ୍ଧ ବ୍ଲକ ମୁଣ୍ଡିଗଡ଼ ପଞ୍ଚାୟତର ଦାଗିରି ଗାଁ ନୂଆପଡା ଗ୍ରାମରେ ପିଇବା ପାଣି ଅଭାବ ଦେଖିବାକୁ ମିଳିଛି। ଗ୍ରାମର ମହିଳାମାନେ ବାଲି ଚୂଆର ପାଣିକୁ ପିଇବା ପାଣି ଭାବରେ ସଂଗ୍ରହ କରୁଥିବା ଦେଖିବାକୁ ମିଳିଛି। ଦାଗିରି ଗାଁ ନୂଆପଡ଼ା ଗ୍ରାମରେ ୩୫ ପରିବାରର ପ୍ରାୟ ୧୮୦ ଜନସଂଖ୍ୟା ଆଦିବାସୀ ଗାଁ ଅଟେ। ଏହି ଗ୍ରାମରେ ଗତ ବର୍ଷ ଏକ ନଳକୂପ ଖୋଳାଯାଇଛି। ସେହି ନଳକୂପରୁ ବାହାରୁଥିବା ପାଣି ହାଣ୍ଡି କିମ୍ବା ବାଲ୍ଟିରେ ରଖିଲେ ଉପରେ ତେଲ ପରି ଭାଷେ, କିଛି ସମୟ ପରେ ସେହି ପାଣି ଗୋଳିଆ ହୁଏ ଏବଂ ଗନ୍ଧିଯାଏ। ଫଳରେ ଗ୍ରାମବାସୀମାନେ ପିଇବାକୁ ନାରାଜ ହୁଅନ୍ତି। କିଛିଦିନ ପରେ ଏହି ନଳକୂପ ଖରାପ ହେବା ସହ ଅଚଳ ହୋଇ ପଡ଼ି ରହିଲା। ଯାହାଫଳରେ ଗ୍ରାମବାସୀ ମାନେ ବାଧ୍ୟ ହୋଇ ନଦୀ ପଟାରେ ବାଲି ଚୂଆ ପାଣିକୁ ଭରସା କରନ୍ତି। ଗ୍ରାମର ମହିଳାମାନେ ହାଣ୍ଡି ମାଠିଆ ବାଲ୍ଟି ଧରି ବିଲ ମାଳର ଅଙ୍କା ବଙ୍କା ଚଲାପଥ ଦେଇ ୧କିମି ଦୂରରେ ବହିଯାଉଥିବା ରାଉଳ ନଦୀ ପଟାରେ ବାଲି ଚୂଆ ଖୋଳି ସେଥିରୁ ବାହାରୁଥିବା ପାଣିକୁ ଛୋଟ ପାତ୍ରରେ କାଡ଼ି ହାଣ୍ଡି ମାଠିଆ ଓ ବାଲ୍ଟିରେ ସଂଗ୍ରହ କରନ୍ତି। ଦିନକୁ ଦୁଇଥର ନଦୀରୁ ପାଣି ଆଣିବାକୁ ପଡ଼େ। ଫଳରେ ମହିଳାମାନେ ଅନ୍ୟାନ୍ୟ ଆନୁଷଙ୍ଗିକ ଘର କାମ କରିବାକୁ ସମୟ ହୁଏ ନାହିଁ। ହେଲେ ସେହି ପାଣି ମଧ୍ୟ ସ୍ବାସ୍ଥ୍ୟ ପାଇଁ ହିତ ନୁହଁ। ଖରା ଦିନ ବାଲି ଚୂଆର ପାଣିକୁ ପିଇବା ପାଣି ରୂପେ ବ୍ୟବହାର କରୁଥିବା ବେଳେ ବର୍ଷା ଦିନେ କ୍ଷେତର କୂଅ ପାଣି ପିଇବାକୁ ପଡ଼େ। ହେଲେ ବର୍ଷ ତମାମ ପିଇବା ପାଣିର ସମସ୍ୟା ଲାଗିରହିଥିବା ବେଳେ ଗ୍ରାମବାସୀ ମାନେ ପଞ୍ଚାୟତ ଓ ବ୍ଲକ କାର୍ଯ୍ୟାଳୟକୁ ଯାଇ ଉକ୍ତ ବାବଦରେ ଲିଖିତ ଅଭିଯୋଗ ଦେଲେ ମଧ୍ୟ ସୁଫଳ ମିଳି ନାହିଁ ବୋଲି ଗ୍ରାମର ନୂଆଦେଇ ମାଝୀ କହିଛନ୍ତି। ସେହିପରି ଗାଁ ମୁଖିଆ ଗଜେନ୍ଦ୍ର ମାଝୀଙ୍କୁ ପଚାରିବାରୁ ସେ କହିଛନ୍ତି ଯେ ନୂତନ ଭାବେ ଏକ ନଳକୂପ ଖୋଳାଯାଇ ସୌର ଚାଳିତ ପମ୍ପ ସଂଯୋଗ କରି ପିଇବା ପାଣିର ବ୍ୟବସ୍ଥା କରାଯାଉ ବୋଲି କହିଛନ୍ତି। ଏହି ବାବଦରେ ତୁମୁଡିବନ୍ଧ ବ୍ଲକ ବିଡିଓ ଦାୟିତ୍ୱରେ ଥିବା ଏବିଡିଓ ଗୋବିନ୍ଦ ଚନ୍ଦ୍ର ଦାସଙ୍କୁ ପଚାରିବାରୁ ସେ କହିଛନ୍ତି ଯେ ପିଇବା ପାଣିର ବ୍ୟବସ୍ଥା କରାଯିବ ବୋଲି ମତ ପ୍ରକାଶ କରିଛନ୍ତି।