ମେଲବୋର୍ନ,୨୦।୫(ପି.ଟି.)- ୨୦୧୮ ସ୍ୟାଣ୍ଡ ପେପର ତଥା ବଲ୍ ଟ୍ୟାମ୍ପରିଂ ମାମଲାରେ ଅଷ୍ଟ୍ରେଲୀୟ ବୋଲରମାନେ ଦେଇଥିବା ସ୍ପଷ୍ଟୀକରଣ ପୂର୍ବତନ ଅଧିନାୟକ ମାଇକେଲ କ୍ଲାର୍କଙ୍କୁ ସନ୍ତୁଷ୍ଟ କରିପାରିନାହିଁ। ଦକ୍ଷିଣ ଆଫ୍ରିକା ବିପକ୍ଷରେ କେପ୍ ଟାଉନ୍ରେ ଖେଳାଯାଇଥିବା ଟେଷ୍ଟ ମ୍ୟାଚ୍ରେ ଭ୍ରମଣକାରୀ ଅଷ୍ଟ୍ରେଲିଆ କ୍ରିକେଟରମାନେ ବଲ୍ ଟ୍ୟାମ୍ପରିଂ କରିବାକୁ ପ୍ରୟାସ କରି ବାସନ୍ଦର ସମ୍ମୁଖୀନ ହୋଇଥିଲେ। ଅଷ୍ଟ୍ରେଲିଆର ୪ ବୋଲର ପ୍ୟାଟ କୁମିନ୍ସ, ମିଚେଲ ଷ୍ଟାର୍କ, ଜୋଶ ହାଜେଲଉଡ ଓ ନାଥନ ଲିୟନ ବଲ ଟ୍ୟାମ୍ପରିଂ ନେଇ ଅବଗତ ଥିଲେ ବୋଲି ବଲ୍ ଟ୍ୟାମ୍ପରିଂ କରିବାକୁ ପ୍ରୟାସ କରିଥିବା କ୍ୟାମେରନ ବ୍ୟାନକ୍ରଫ୍ଟ କହିଛନ୍ତି। ଫଳରେ ପୁଣି ଥରେ ଏହି ଘଟଣା ନେଇ ଚର୍ଚ୍ଚା ସୃଷ୍ଟି ହୋଇଛି। ଏହାପରେ ବୋଲରମାନେ ସଫେଇ ଦେଇଥିଲେ ମଧ୍ୟ ଏହା ସନ୍ତୋଷଜନକ ନୁହେଁ ବୋଲ କ୍ଲାର୍କ କହିଛନ୍ତି। ବାହାରୁ ପଡ଼ିଆ ଭିତରକୁ କୌଣସି ପଦାର୍ଥ ନିଆଯାଇଥିଲା ବୋଲି ଆମେ ଜାଣି ନ ଥିଲୁ ବୋଲି ବୋଲରମାନେ ଏକ ମିଳିତ ବିବୃତିରେ କହିଥିଲେ। ଅତି ଚତୁରତାର ସହ ଏହି ୪ ବୋଲର ମତବ୍ୟକ୍ତ କରିଛନ୍ତି ଓ ସନ୍ତୋଷଜନକ ଉତ୍ତର ଦେବାରେ ବିଫଳ ହୋଇଛନ୍ତି ବୋଲି କ୍ଲାର୍କ ବୁଧବାର କହିଛନ୍ତି।
୨୦୧୮ରେ କେପ୍ଟାଉନ ଟେଷ୍ଟରେ ବ୍ୟାନକ୍ରଫ୍ଟ ସ୍ୟାଣ୍ଡ ପେପରରେ ବଲର ସ୍ଥିତି ବିଗାଡିବାକୁ ଚେଷ୍ଟା କରୁଥିବା ବେଳେ ଟିଭି କ୍ୟାମେରାରେ ଧରା ପଡିଥିଲେ। ଫଳରେ ବ୍ୟାନକ୍ରଫ୍ଟଙ୍କ ସମେତ ଅଧିନାୟକ ଷ୍ଟିଭ ସ୍ମିଥ ଓ ତାଙ୍କ ଡେପୁଟି ଡେଭିଡ୍ ଓ୍ବାର୍ନରଙ୍କୁ କ୍ରିକେଟରୁ ବାସନ୍ଦ କରାଯାଇଥିଲା। ବ୍ୟାନକ୍ରଫ୍ଟଙ୍କୁ ୯ ମାସ, ସ୍ମିଥ୍ ଓ ଓ୍ବାର୍ନରଙ୍କୁ ଗୋଟିଏ ବର୍ଷ ବାସନ୍ଦ କରାଯାଇଥିଲା।
