ଡେରାବିଶ,୧ା୧୨(ସ୍ବ.ପ୍ର.): କେନ୍ଦ୍ରାପଡ଼ା ସଦର ଥାନା ଅନ୍ତର୍ଗତ ବାଲିଆ ବଜାରରେ ଗତ ୨୩ ତାରିଖରେ ଅନୁଷ୍ଠିତ କାର୍ତ୍ତିକେଶ୍ୱର ଭସାଣି ଉତ୍ସବରେ ବାଣ ବିସ୍ଫୋରଣ ଘଟି ୪୦ରୁ ଊର୍ଦ୍ଧ୍ୱ ଆହତ ହୋଇଥିଲେ। ସେମାନଙ୍କ ମଧ୍ୟରୁ ୪୦ ଜଣ ଗୁରୁତର ହୋଇ କଟକ ବଡ ମେଡିକାଲ(ଏସ୍ସିବି)ରେ ଚିକିତ୍ସିତ ହେଉଥିଲେ। ଚିକିତ୍ସାଧୀନ ଅବସ୍ଥାରେ ଗୁରୁତର ଆହତ ଉଦୟନାଥ ଭୋଇ ଓ ପିଣ୍ଟୁ ଖାଁଙ୍କର ମୃତ୍ୟୁ ହୋଇଛନ୍ତି। ଏବେବି ୧୨ ଜଣ ଆଇସିୟୁରେ ଚିକିତ୍ସିତ ହେଉଛନ୍ତି। ଏମାନଙ୍କ ମଧ୍ୟରୁ ସେଣ୍ଟ୍ରାଲ ଆଇସିୟୁରେ ୩ ଜଣ, ଟ୍ରୋମା ଆଇସିୟରୁ ୬ ଜଣ ଓ ବର୍ଣ୍ଣ ଆଇସିୟୁରେ ୩ଜଣ ଚିକିତ୍ସାଧୀନ ଅଛନ୍ତି। ତେବେ ୩ ଜଣ ଭେଣ୍ଟିଲେଟରରେ ଥିବା ବେଳ ୩ଜଣଙ୍କୁ ଅକ୍ସିଜେନ୍ ଦିଆଯାଇ ଚିକିତ୍ସା କରାଯାଉଛି। ସେଣ୍ଟ୍ରାଲ ଆଇସିୟୁରେ ସଂକ୍ରମଣ ହେବାର ଆଶଙ୍କା ରହିଛି ବୋଲି ଆହତଙ୍କ ଚିକିତ୍ସାରେ ସହଯୋଗ କରୁଥିବା ସାମାଜିକ କର୍ମୀ ରାଜେଶ ପଣ୍ଡା କହିଛନ୍ତି। ସରକାରଙ୍କ ପକ୍ଷରୁ ରୋଗୀଙ୍କୁ ସମ୍ପୂର୍ଣ୍ଣ ମାଗଣାରେ ଚିକିତ୍ସା ସୁବିଧା ଯୋଗାଇ ଦିଆଯାଉଥିଲେ ମଧ୍ୟ ଏସସିବି କର୍ତ୍ତୃପକ୍ଷଙ୍କ ପକ୍ଷରୁ ସର୍ଜିକାଲ୍ ଓ ବର୍ଣ୍ଣ ୱାର୍ଡ଼ରେ ଥିବା ଆହତଙ୍କ ସମେତ ଆଇସିୟୁରେ ଚିକିତ୍ସାଧୀନ ରହିଛି। ସର୍ଜିକାଲ୍ ୱାର୍ଡ଼ରେ ବୁଧବାର ସୁଦ୍ଧା ୬ ଜଣ ଓ ବର୍ଣ୍ଣ ୱାର୍ଡରେ ୮ ଜଣ ଆହତ ଚିକିତ୍ସିତ ହେଉଛନ୍ତି। ମଙ୍ଗଳବାର ଆହତଙ୍କ ମଧ୍ୟରୁ ସୁସ୍ଥ ହୋଇ ୫ ଜଣ ରୋଗୀ ଘରକୁ ଫେରିଥିବା ବେଳେ ବୁଧବାର ଜଣେ ସୁସ୍ଥ ହୋଇ ଫେରିଛନ୍ତି। ସୁସ୍ଥ ହୋଇ ଫେରିଥିବା ୬ ଜଣ ହେଲେ କେନ୍ଦ୍ରାପଡ଼ା ବ୍ଲକ ଅଧୀନ ଚକ୍ରୋଡ଼ା ପଞ୍ଜାୟତ ପଦାଲୋ ଗାଁର ଚିତ୍ରସେନ ମଲିକ, ତାଙ୍କ ପୁଅ ଦେବେନ୍ଦ୍ର ଓ ଅନ୍ତାଳୋ ଗ୍ରାମର ହୃଷୀକେଶ ଜେନା, ଜମଧର ପଞ୍ଚାୟତ ଜମଧର ଗ୍ରାମର ଭାବଗ୍ରାହୀ ଜେନା ଓ କଣ୍ଟାଣିଆ ଗାଁର ନିତ୍ୟାନନ୍ଦ ବେହେରା, ଡେରାବିଶ ବ୍ଲକ ମଙ୍ଗଳପୁର ପଞ୍ଚାୟତ ହଳଦିଆ ପାଟଣା ଗାଁର ସଙ୍ଗୀତା ସାହୁ ସୁସ୍ଥ ହୋଇ ଘରକୁ ଫେରିଛନ୍ତି। ମଙ୍ଗଳବାର କେନ୍ଦ୍ରାପଡ଼ା ଏସ୍ପି ମଡକର ସନ୍ଦୀପ ସମ୍ପଦ ମେଡ଼ିକାଲ୍ ଯାଇ ଚିକିତ୍ସାଧୀନ ସମସ୍ତ ଆହତଙ୍କୁ ଭେଟିବା ସହ ସ୍ବାସ୍ଥ୍ୟବସ୍ଥା ସମ୍ପର୍କରେ ପଚାରି ବୁଝିଥିଲେ। ଏସ୍ପିଙ୍କୁ ତାଙ୍କ ସମ୍ପର୍କୀୟମାନେ ଚିକିତ୍ସାରେ ଅବହେଳା ନେଇ ଅଭିଯୋଗ କରିଥିଲେ। ସମୟ ଗଡ଼ି ଚାଲିଥିବା ବେଳେ ଏବେବି ୧୨ ଜଣ ମୃତ୍ୟୁସହ ସଂଗ୍ରାମ କରୁଛନ୍ତି।