ଭଦ୍ରକ ଅଫିସ/ଚାନ୍ଦବାଲି, ୨୪।୯(ଡି.ଏନ.ଏ.): ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର ଏବଂ ୫-ଟି ସଚିବ ଭି.କେ. ପାଣ୍ଡିଆନ ଶୁକ୍ରବାର ଭଦ୍ରକ ଜିଲା ଗସ୍ତରେ ଆସି ଧାମରାରେ ବିଭିନ୍ନ ପ୍ରକଳ୍ପର ଅଗ୍ରଗତି ନେଇ ସମୀକ୍ଷା କରିଛନ୍ତି। ଅପରାହ୍ନ ୩ଟା ୨୨ରେ ହେଲିକପ୍ଟର ଯୋଗେ ଆସି ସେମାନେ ଧାମରା ବନ୍ଦରରେ ପହଞ୍ଚିଥିଲେ। ବନ୍ଦର ପୂର୍ବତନ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ସୁବ୍ରତ ତ୍ରିପାଠୀ ଓ ଭଦ୍ରକ ଜିଲାପାଳ ସିଦ୍ଧେଶ୍ୱର ବଳିରାମ ବୋନ୍ଦର ସେମାନଙ୍କୁ ସ୍ବାଗତ କରିଥିଲେ। ଏହାପରେ ନିକଟସ୍ଥ ଏକ ହୋଟେଲରେ ପହଞ୍ଚିବା ପରେ ଜାମୁଝାଡ଼ି-ବାସୁଦେବପୁର ରାସ୍ତା ନିର୍ମାଣ କରୁଥିବା ୟୁଏମ୍ଏସ୍ଏଲ୍ କମ୍ପାନୀ ପକ୍ଷରୁ ସେମାନଙ୍କୁ ସ୍ବାଗତ କରାଯାଇଥିଲା। କମ୍ପାନୀ ନିଦ୍ଦେର୍ର୍ଶକ ଗୌରାଙ୍ଗ ଦେଶାଇ, ସାଧାରଣ ପରିଚାଳକ ଚନ୍ଦ୍ରଶେଖର ପ୍ରସାଦ, ଭୂ-ଅର୍ଜନ ଅଧିକାରୀ କାର୍ତ୍ତିକ ନାଥ ମଣ୍ଡଳ, ଅତିରିକ୍ତ ଜିଲାପାଳ ରାମଦାସ ଟୁଡୁ, ଶାନ୍ତନୁ ମହାନ୍ତି ପ୍ରମୁଖ ଉପସ୍ଥିତ ରହି ଚାନ୍ଦବାଲି ବ୍ଲକର ଜାଗୁଳା ଏବଂ କଇଥଖୋଲା ପଞ୍ଚାୟତରେ ଅଧିଗ୍ରହଣ ହୋଇଥିବା ୭୫୦ ଏକର ପରିମିତ ଜମିରେ ହେବାକୁ ଥିବା ଶିଳ୍ପାଞ୍ଚଳ ପାର୍କର ବ୍ଲୁପ୍ରିଣ୍ଟ ଦେଖାଇଥିଲେ।
ଉକ୍ତ ହୋଟେଲରେ ଭର୍ଚ୍ଚୁଆଲ ମୋଡ୍ରେ ଦୁଇ ସଚିବ ପ୍ରକଳ୍ପଗୁଡ଼ିକର ନିର୍ମାଣ କାର୍ଯ୍ୟ ଦେଖିଥିଲେ। ଧାମରା-ବାସୁଦେବପୁର-ଜାମୁଝାଡ଼ି ରାସ୍ତା ନିର୍ମାଣାଧୀନ ଥିବାବେଳେ ଖୁବ୍ଶୀଘ୍ର ଏହି କାର୍ଯ୍ୟ ହୋଇପାରିଛି ବୋଲି ରାସ୍ତା ଏବଂ ଗୃହ ନିର୍ମାଣ ବିଭାଗର ଚିଫ୍ କନଷ୍ଟ୍ରକ୍ଶନ ଇଞ୍ଜିନିୟର ରଥାଙ୍ଗଧର ରାଉତ, ସୁପରିଣ୍ଟେଣ୍ଡେଣ୍ଟ ଇଞ୍ଜିନିୟର ରାମଚନ୍ଦ୍ର ସେଠୀ, କାର୍ଯ୍ୟନିର୍ବାହୀ ଯନ୍ତ୍ରୀ ପ୍ରଭାତ କୁମାର ସାହୁ, ସହକାରୀ ଯନ୍ତ୍ରୀ କାର୍ତ୍ତିକେଶ୍ୱର ମହାରଣା ପ୍ରମୁଖ ଅବଗତ କରାଇଥିଲେ। ବାସୁଦେବପୁର ବ୍ଲକ ବାଲିମୁଣ୍ଡାଠାରେ ନିର୍ମାଣାଧୀନ ଏୟାରଷ୍ଟ୍ରିପ୍ର ବ୍ଲୁପ୍ରିଣ୍ଟ ସେମାନେ ଦେଖିଥିଲେ। ଏଥିସହ ସେମାନେ ଅଧିକାରୀମାନଙ୍କ ସହ ଆଲୋଚନା କରିଥିଲେ। ମୁଖ୍ୟ ଶାସନ ସଚିବ ଏବଂ ୫-ଟି ସଚିବ ଏଠାରେ ସମସ୍ତ କାର୍ଯ୍ୟକ୍ରମ ସାରି ଆରଡ଼ି ଅଭିମୁଖେ ଯାଇଥିଲେ। ସେଠାରେ ଆଖଣ୍ଡଳମଣି ପୀଠର ବିକାଶ ନେଇ ପ୍ରଶାସନିକ ଅଧିକାରୀ ଓ ସେବାୟତମାନଙ୍କ ସହ ଆଲୋଚନା କରିଥିଲେ। ଅପରପକ୍ଷେ ମୁଖ୍ୟ ଶାସନ ସଚିବ ଓ ୫-ଟି ସଚିବଙ୍କ ଗସ୍ତକୁ ଚାନ୍ଦବାଲି କଂଗ୍ରେସ ପକ୍ଷରୁ ବିରୋଧ କରାଯାଇଛି। ସାଧାରଣ ଲୋକଙ୍କ ଅଜାଣତରେ ଏହି ସମସ୍ତ କାର୍ଯ୍ୟ ହେଉଛି ଏବଂ ସ୍ଥାନୀୟ ଜନତା ଏ ବିଷୟରେ କୌଣସି ସୁରାକ୍ ପାଉନାହାନ୍ତି ବୋଲି କଂଗ୍ରେସ ନେତା ଦିଗମ୍ବର ଦାସ ଅଭିଯୋଗ କରିଥିଲେ। ଆଗାମୀ ଦିନରେ ଏହାକୁ ନେଇ ଦଳ ରାଜରାସ୍ତାକୁ ଓହ୍ଲାଇବ ବୋଲି ସେ ପ୍ରକାଶ କରିଛନ୍ତି।