ଅନ୍ତର୍ଜାତୀୟ କ୍ରିକେଟ ପରିଷଦ(ଆଇସିସି) ଏବଂ ଅନ୍ୟାନ୍ୟ କ୍ରିକେଟ ବୋର୍ଡ କରୋନାକୁ ଦୃଷ୍ଟିରେ ରଖି ସମ୍ପୂର୍ଣ୍ଣ ସତର୍କତା ଅବଲମ୍ବନ କରୁଥିବା ଦେଖାଯାଉଛି। ଅନ୍ୟପଟେ ପାକିସ୍ତାନର ଜଣେ ଘରୋଇ କ୍ରିକେଟର କରୋନା ଆକ୍ରାନ୍ତ ସତ୍ତ୍ୱେ ମ୍ୟାଚ ଖେଳିବା ଜାରି ରଖିଥିବା ସୂଚନା ମିଳିଛି। ପାକିସ୍ତାନର ଘରୋଇ କ୍ରିକେଟର ବିସ୍ମିଲ୍ଲାହ ଖାନ କରୋନା ପଜିଟିଭ୍ ବୋଲି ଜଣାପଡିଛି। ଏକ ରିପୋର୍ଟ ଅନୁଯାୟୀ, କ୍ୱେଦ ଆଜମ ଟ୍ରଫିରେ ଦକ୍ଷିଣ ପଞ୍ଜାବ ବିପକ୍ଷ ଦ୍ୱିତୀୟ ରାଉଣ୍ଡ ମ୍ୟାଚ ସମୟରେ ବଲୁଚିସ୍ତାନର ଉଇକେଟ୍ କିପର ବ୍ୟାଟ୍ସମ୍ୟାନ ବିସ୍ମିଲ୍ଲାହ ଖାନଙ୍କ କୋଭିଡ ଲକ୍ଷଣ ଦେଖିବାକୁ ମିଳିଥିଲା। ତେବେ ଚତୁର୍ଥ ଦିନ ପର୍ଯ୍ୟନ୍ତ ତାଙ୍କୁ ପରୀକ୍ଷା କରାଯାଇ ନ ଥିଲା। ଏହାପରେ ତାଙ୍କର ଟେଷ୍ଟ କରାଯାଇଥିଲା। ସମସ୍ତ ଖେଳାଳି ଗୋଟିଏ ହୋଟେଲରେ ରହିଥିବାରୁ ଏହି ଟୁର୍ନାମେଣ୍ଟ ମଧ୍ୟ ସନ୍ଦେହ ଘେରରେ ଆସିଥିଲା। ପରେ ସମସ୍ତ ଖେଳାଳି ଏବଂ ଷ୍ଟାଫ୍ଙ୍କ କରୋନା ଟେଷ୍ଟ କରାଯାଇଥିଲା। ଏବେ ପାକିସ୍ତାନ କ୍ରିକେଟ ବୋର୍ଡ (ପିସିବି) ନିଶ୍ଚିତ କରିଛି ଯେ ସମସ୍ତ ଖେଳାଳି, ସପୋର୍ଟ ଷ୍ଟାଫ ଏବଂ ମ୍ୟାଚ ଅଧିକାରୀଙ୍କ କରୋନା ପରୀକ୍ଷା ରିପୋର୍ଟ ନେଗେଟିଭ୍ ଆସିଥିଲା। ନଭେମ୍ବର ୬ରୁ ଆରମ୍ଭ ହେବାକୁ ଥିବା ତୃତୀୟ ରାଉଣ୍ଡ ମ୍ୟାଚ ଖେଳିବାକୁ ପ୍ରସ୍ତୁତ।
