ଖୋର୍ଦ୍ଧା ଅଫିସ,୧୪।୫: ରାଜ୍ୟରେ କରୋନା ସଂକ୍ରମଣ ରୋକିବା ଲାଗି ଲକ୍ଡାଉନ ଜାରିରହିଛି। ଏଥିଯୋଗୁ ରାସ୍ତାପାର୍ଶ୍ୱ ବାଉଁଶ କାରିଗରଙ୍କ ବେପାର ମାନ୍ଦା ପଡ଼ିଛି। ବେପାର ହେଉ ନ ଥିବାରୁ ସେମାନଙ୍କ ପକ୍ଷେ ପରିବାର ଚଳାଇବା କଷ୍ଟକର ହେଉଛି। ପୂର୍ବରୁ ଦିନକୁ ୧ ହଜାର ଟଙ୍କା ପର୍ଯ୍ୟନ୍ତ ରୋଜଗାର କରୁଥିବା ବ୍ୟବସାୟୀଙ୍କ ପାଇଁ ଏବେ ୬ଘଣ୍ଟାରେ ଶହେ ଟଙ୍କା ରୋଜଗାର କରିବା ମୁସ୍କିଲ ହେଉଛି। ଖୋର୍ଦ୍ଧା ନୂଆବସ୍ଷ୍ଟାଣ୍ଡରେ ରହୁଥିବା ପ୍ରାୟ ଶହେରୁ ଊର୍ଦ୍ଧ୍ୱ ପରିବାର ଏବେ ଦୁଃଖକଷ୍ଟରେ ଚଳୁଛନ୍ତି। ସେମାନଙ୍କୁ ପରିବାର ଚିନ୍ତା ଘାରିଛି। ରାତି ପାହିଲେ ରାସ୍ତାକଡ଼ରେ ବାଉଁଶ ନିର୍ମିତ ସାମଗ୍ରୀର ପସରା ମେଲି ସେମାନେ ବସୁଛନ୍ତି ସତ ହେଲେ ଗ୍ରାହକଙ୍କ ଦେଖାନାହିଁ। କାରିଗର ସିଦ୍ଧାର୍ଥ ପାତ୍ର କହିଛନ୍ତି, ଏଠାରେ ଆମେ ଦୀର୍ଘବର୍ଷ ଧରି ବଂଶାନୁକ୍ରମିକ ଭାବେ ବାଉଁଶରେ ତିଆରି ବିଭିନ୍ନ ସାମଗ୍ରୀ ବିକ୍ରି କରି ପରିବାର ଚଳାଉଛୁ। ଗ୍ରାହକଙ୍କ ଚାହିଦାନୁସାରେ ଚାଙ୍ଗୁଡ଼ିି, ଝୁଡ଼ିି, ପରିବା ଡାଲା, ବିଞ୍ଛଣା, ଫୁଲଦାନି, ଝାଟିଆ, ପଁଅରା ସମେତ ବିଭିନ୍ନ ଘରକରଣା ସାମଗ୍ରୀ ତିଆରି କରି ବିକ୍ରି କରୁଛୁ। ବିବାହ, ବ୍ରତ, ସମେତ ବିଭିନ୍ନ ପର୍ବପର୍ବାଣିରେ ରୋଜଗାର ଭଲ ହୋଇଥାଏ। ମାତ୍ର କରୋନା ସଂକ୍ରମଣ ବଢିବା ପରଠାରୁ ଆମ ବେପାରରେ ଗ୍ରହଣ ଲାଗିଯାଇଛି। ଗତ ବର୍ଷସାରା କିଛି ବେପାର ହୋଇ ନ ଥିବାବେଳେ ଏବେ ମଧ୍ୟ ସେହି ସ୍ଥିତି। ଲକ୍ଡାଉନ, ଶଟ୍ଡାଉନ ମଧ୍ୟରେ ବାଉଁଶ କାରିଗର ପେଷି ହୋଇଯାଉଛନ୍ତି। ପୂର୍ବରୁ ଦୈନିକ ୧ ହଜାର ଟଙ୍କା ପର୍ଯ୍ୟନ୍ତ ବେପାର ହେଉଥିଲା। ଏବେ ଶହେ ଟଙ୍କା ବି ମିଳୁନି। ସକାଳ ୬ରୁ ମଧ୍ୟାହ୍ନ ୧୨ଟା ପର୍ଯ୍ୟନ୍ତ ଦୋକାନ ଖୋଲିବାକୁ ଅନୁମତି ରହିଛି। ହେଲେ ବଜାରକୁ କାଁ ଭାଁ ଲୋକେ ଆସୁଥିବାରୁ ବେପାର ପୂରା ମାନ୍ଦା। ଗତ ସପ୍ତାହକ ମଧ୍ୟରେ ମାତ୍ର ୬ଶହ ଟଙ୍କା ରୋଜଗାର ହୋଇଛି। ଏଥିରେ ପରିବାର କିପରି ଚଳାଇବୁ ସେଇ ଚିନ୍ତା ଘାରିଛି। ଗୋଟିଏ ପଟେ କରୋନା ଭୟ, ଅନ୍ୟପଟେ ପେଟ ଚିନ୍ତା। ଏମିତି ଦୋଛକିରେ ବାଉଁଶ କାରିଗରଙ୍କ ଜୀବନ ଦୁର୍ବିସହ ହୋଇପଡୁଛି। ସରକାରଙ୍କ ପକ୍ଷରୁ ସେମାନଙ୍କୁ ଆର୍ଥତ୍କ ସହାୟତା ଯୋଗାଇ ଦେବା ଲାଗି ସିଦ୍ଧାର୍ଥଙ୍କ ସମେତ ବହୁ ବାଉଁଶ କାରିଗର ଦାବି କରିଛନ୍ତି।