![](https://www.dharitri.com/wp-content/uploads/2024/07/5-36.jpg)
କୋକସରା,୨୬ା୭ (ଦୁଷ୍ମନ୍ତ କୁମାର ପାଟ୍ଟଯୋଷୀ): କଳାହାଣ୍ଡି ଜିଲା କୋକସରା ବ୍ଲକ ବରାଡଙ୍ଗା ପଞ୍ଚାୟତର ଏକ ଆଦିବାସୀ ବହୁଳ ଗ୍ରାମ ଝୁଲେନବର। ଜଙ୍ଗଲ ପରିବେଷ୍ଟିତ ଗାଁରେ ପ୍ରାୟ ୫୦ ଆଦିବାସୀ ପରିବାର ବସବାସ କରନ୍ତି। କନ୍ଧ ଜନଜାତିର କିଛି ପରିବାର ସଦସ୍ୟଙ୍କୁ ବାଉଁଶ କାରିଗରୀ ଜୀବିକା ଦେଇଛି। ଏମାନେ ନିକଟ ଜଙ୍ଗଲରୁ ବାଉଁଶ ସଂଗ୍ରହ କରି ସେଥିରେ ବିଭିନ୍ନ ପ୍ରକାର ଘରକରଣା ସାମଗ୍ରୀ ତିଆରି କରୁଛନ୍ତି। ପରେ ଏହାକୁ ନିକଟସ୍ଥ ଆମପାଣି ଓ ପୂଜାରିଗୁଡା ସାପ୍ତାହିକ ହାଟରେ ବିକ୍ରି କରି ପରିବାର ପ୍ରତିପୋଷଣ କରୁଛନ୍ତି। ସପ୍ତାହରେ ୮ଶହରୁ ୧ ହଜାର ଟଙ୍କା ରୋଜଗାର କରୁଥିବା କହିଛନ୍ତି ବାଉଁଶ କାରିଗର ସୀତା ମାଝି, କୁନି ମାଝି, ଆଶା ମାଝି, ଚାଉଳ ମାଝି, ନୂଆ ମାଝି, ରଏବାରି ମାଝି, ପ୍ରଭୁ ମାଝି, କାଉରୁ ମାଝି ପ୍ରମୁଖ।
ପ୍ରତିଦିନ ସକାଳୁ ଆଦିବାସୀ ପରିବାରର ପୁରୁଷମାନେ ଜଙ୍ଗଲରୁ ବାଉଁଶ କାଟି ଘରକୁ ଆଣିଥାନ୍ତି। ପରେ ମହିଳାମାନେ ବାଉଁଶ ପାତିଆ ବାହାର କରି କୁଲା, ଟୋପା, ଡଲା, ଝାଡୁ, ବାଉଁଶ ତୋଳା ଆଦି ସାମଗ୍ରୀ ତିଆରି କରନ୍ତି। ଏହି କାର୍ଯ୍ୟରେ ପିଲା ଛୁଆ ସମସ୍ତେ ଲାଗିପଡନ୍ତି। ସରକାରଙ୍କ ଏମ୍ଜିଏନ୍ଆର୍ଇଜିଏସ୍ରେ ଶ୍ରମିକମାନଙ୍କୁ ବର୍ଷକୁ ଶହେଦିନର କାର୍ଯ୍ୟ ଦିବସ ଯୋଗାଇଦେବା ବ୍ୟବସ୍ଥା ରହିଥିଲେ ମଧ୍ୟ ଏହି ଗାଁରେ ପହଞ୍ଚତ୍ପାରି ନାହିଁ। ଅନ୍ୟପଟେ ଏହି ଯୋଜନାରେ କାମ ଆସୁଥିଲେ ମଧ୍ୟ ମଜୁରି ମିଳିବାରେ ଡେରି ହେଉଥିବା ଯୋଗୁ ଏମାନେ କାମ କରିବା ପାଇଁ ଇଚ୍ଛା ପ୍ରକାଶ କରନ୍ତି ନାହିଁ ବୋଲି ସ୍ଥାନୀୟ ଜନପ୍ରତିନିଧି ପ୍ରକାଶ କରିଛନ୍ତି। ବାଉଁଶ କାରିଗରଙ୍କ ହାତ ତିଆରି ସାମଗ୍ରୀ ଯଦି ବ୍ଲକ ପ୍ରଶାସନ ସ୍ବୟଂସହାୟକ ଗୋଷ୍ଠୀ ଜରିଆରେ କ୍ରୟ କରି ପ୍ରୋତ୍ସାହିତ କରାଯାଆନ୍ତା ତା’ହେଲେ ଆଦିବାସୀ ପରିବାର ଉପଯୁକ୍ତ ବଜାର ମୂଲ୍ୟ ପାଇବା ସହ ଆତ୍ମନିର୍ଭରଶୀଳ ହୋଇପାରନ୍ତେ ବୋଲି ସାଧାରଣରେ ମତ ପ୍ରକାଶ ପାଇଛି।