ଗୋପ,୧୧।୭(ଡି.ଏନ୍.ଏ.): ଗୋପ ଥାନା ଅନ୍ତର୍ଗତ ଜଙ୍ଗଲବୋରି ପଞ୍ଚାୟତର ୬ ନମ୍ବର ଓ୍ବାର୍ଡରେ ଦୀର୍ଘଦିନ ଧରି ଯାଆଆସ କରୁଥିବା ଭୁରୁଭୁରା ଦଳିତ ସାହି ଗ୍ରାମରେ ୪ ଜଣ ଜମି ମାଲିକ ବାଉଁଶ ବାଡ଼ ପକାଇଥିବା ଅଭିଯୋଗ ହୋଇଆସୁଛି। ଗ୍ରାମରେ ରହୁଥିବା ୨୫ରୁ ଊଦ୍ଧର୍ବ ଦଳିତ ପରିବାର ଏବେ ବନ୍ଦୀ ଜୀବନ ବିତାଉଥିବାବେଳେ ୧୭ଜଣ ଛାତ୍ରୀଛାତ୍ର ଦୀର୍ଘ ୨୧ ଦିନ ଧରି ପାଠପଢାରୁ ବଞ୍ଚିତ ରହିଛନ୍ତି।
ସୂଚନା ମୁତାବକ, ଗ୍ରାମରେ ବସବାସ କରୁଥିବା ଏହି ଦଳିତ ପରିବାରର ସଦସ୍ୟ ଦୀର୍ଘବର୍ଷ ଧରି ଘର ସମ୍ମୁଖ ରାସ୍ତାରେ ଯିବାଆସିବା କରୁଥିଲେ। ତେବେ ଜୁନ୍ ୧୯ରେ ଉକ୍ତ ଗ୍ରାମର ୪ ଜଣ ସେହି ରାସ୍ତାକୁ ନିଜ ଜମି କହି ସେଠାରେ ବାଉଁଶ ବାଡ଼ ପକାଇ ଦେଇଥିଲେ। ଫଳରେ କିଛି ସମୟ ପାଇଁ ଉତ୍ତେଜନା ଦେଖାଦେଇଥିଲା। ଏପରି ଅଭିଯୋଗ ସମ୍ପର୍କରେ ଜାଣିବା ପରେ ଗୋପ ତହସିଲଦାର ଏସ୍କେ ସାର୍ଗି, ଅତିରିକ୍ତ ତହସିଲଦାର ଶରତ ପରିଡ଼ା ଜୁନ ୨୩ରେ ଘଟଣା ସ୍ଥଳରେ ପହଞ୍ଚି ନୟାହାଟ ଫାଣ୍ତି ଅଧିକାରୀ ବାବୁନି ପ୍ରଧାନଙ୍କୁ ତୁରନ୍ତ ବାଡ଼ ହଟାଇବା ପାଇଁ ନିର୍ଦ୍ଦେଶ ଦେଇଥିଲେ। କିନ୍ତୁ ସମ୍ପୃକ୍ତ ଫାଣ୍ଡି ଅଧିକାରୀ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରି ନ ଥିଲେ। ବାଉଁଶ ବାଡ଼ ନ ଉଠିବାରୁ ଗ୍ରାମର ଶତାଧିକ ମହିଳା ଓ ପୁରୁଷ ଜୁନ ୨୬ରେ ଗୋପ ତହସିଲ ଅଫିସ ସମ୍ମୁଖରେ ଧାରଣା ଦେଇଥିଲେ। ଅତିରିକ୍ତ ତହସିଲଦାର ତୁରନ୍ତ ବାଡ଼ ଉଠାଯିବା ପ୍ରତିଶ୍ରୁତି ଦେବା ପରେ ଧାରଣା ହଟିଥିଲା। ମାତ୍ର ଏ ପର୍ଯ୍ୟନ୍ତ ଏହି ନିର୍ଦ୍ଦେଶ କାର୍ଯ୍ୟକାରୀ ହୋଇ ନ ଥିବାବେଳେ ଦଳିତ ପରିବାର ଏବେ ବନ୍ଦୀ ଅବସ୍ଥାରେ ଅଛନ୍ତି। ଅପରପକ୍ଷରେ ଗ୍ରାମରେ ବାଉଁଶ ବାଡ଼ ପଡିଥିବାରୁ ୧୭ ଜଣ ଛାତ୍ରୀଛାତ୍ର ଏବେ ଦୀର୍ଘ ୨୧ ଦିନ ଧରି ପାଠପଢାରୁ ବଞ୍ଚିତ ହୋଇଥିବା ଜଣାପଡିଛି। ସ୍କୁଲ ସମୟରେ ଛାତ୍ରୀଛାତ୍ର ବାଡ଼ ସେପଟେ ସ୍କୁଲ ପୋଷାକ ପିନ୍ଧି ଠିଆ ହେଉଥିବା ଫଟୋ ଏବେ ଦେଖିବାକୁ ମିଳିଛି। ସମସ୍ତ ୧୭ ଜଣ ଛାତ୍ରୀଛାତ୍ର ଅଙ୍ଗନୱାଡ଼ିରେ ଅଧ୍ୟୟନ କରୁଥିବା ଜଣାପଡିଛି। ଏ ସମ୍ପର୍କରେ ଗୋପ ତହସିଲଦାର ଏସ୍କେ ସାର୍ଗିଙ୍କୁ ପଚାରିବାରେ, ବାଡ଼ ପଡିଥିବା ଜମିଟି ବ୍ୟକ୍ତିଗତ ଜମି ଅଟେ। ଖୁବ୍ଶୀଘ୍ର ସେମାନଙ୍କ ସହିତ ଆପୋସ ସମାଧାନ କରାଯିବ। ସେତେବେଳ ପର୍ଯ୍ୟନ୍ତ ଦଳିତ ପରିବାରକୁ ଯିବା ପାଇଁ ଏକ ସରୁ ରାସ୍ତା ଦିଆଯାଇଥିବା ସେ କହିଛନ୍ତି।