ଲଣ୍ଡନ,୨୭।୭: ସ୍କୁଲଗୁଡ଼ିକରେ ଛାତ୍ରୀଛାତ୍ର ସ୍ମାର୍ଟଫୋନ୍ ବ୍ୟବହାର କରିବା ଦ୍ୱାରା ଶ୍ରେଣୀଗୃହରେ ସେମାନଙ୍କ ପାଠପଢ଼ା ବ୍ୟାହତ ହେଉଛି। ଏହାକୁ ଦୂର କରି ଶିକ୍ଷାରେ ଉନ୍ନତି ଆଣିବା ଏବଂ ପିଲାଙ୍କୁ ଅନ୍ଲାଇନ ଠକାମିରୁ ସୁରକ୍ଷା ଦେବା ନିମନ୍ତେ ଶିକ୍ଷାନୁଷ୍ଠାନଗୁଡ଼ିକରେ ସ୍ମାର୍ଟଫୋନ୍ ବ୍ୟବହାର ଉପରେ ନିଷିଦ୍ଧାଦେଶ ଜାରି କରିବା ପାଇଁ ଜାତିସଂଘ ପକ୍ଷରୁ ପ୍ରକାଶିତ ଏକ ରିପୋର୍ଟରେ ସୁପାରିସ କରାଯାଇଛି।
ଜାତିସଂଘର ଶିକ୍ଷା, ବିଜ୍ଞାନ ଏବଂ ସଂସ୍କୃତି ଏଜେନ୍ସି ‘ୟୁନେସ୍କୋ’ ପକ୍ଷରୁ କୁହାଯାଇଛି ଯେ, ଅତ୍ୟଧିକ ମୋବାଇଲ୍ ଫୋନ୍ ବ୍ୟବହାର ଯୋଗୁ ପିଲାଙ୍କ ଶିକ୍ଷାଗତ ପ୍ରଦର୍ଶନ ହ୍ରାସ ପାଉଛି। ଅଧିକ ସମୟ ଧରି ମୋବାଇଲ ଫୋନ୍ ଧରି ବସିଲେ ପିଲାମାନଙ୍କ ମାନସିକ ସ୍ଥିରତା ଉପରେ ନକାରାତ୍ମକ ପ୍ରଭାବ ପଡ଼ୁଛି। ସ୍ମାର୍ଟଫୋନ୍ ଏବଂ କୃତ୍ରିମ ବୃଦ୍ଧିମତ୍ତା (ଏଆଇ) ସମେତ ଡିଜିଟାଲ ଟେକ୍ନୋଲୋଜିକୁ ଶିକ୍ଷାର ‘ମାନବକୈନ୍ଦ୍ରିକ ଦୂରଦୃଷ୍ଟି’ରେ ଅତ୍ୟଧିକ ଗୁରୁତ୍ୱ ଦେବା ଅନୁଚିତ। ଶିକ୍ଷକଙ୍କ ଦ୍ୱାରା ମୁହଁାମୁହିଁ ପାଠପଢ଼ାର ଏହା ବିକଳ୍ପ ନୁହେଁ। ପ୍ରତ୍ୟେକ ପରିବର୍ତ୍ତନରେ ବିକାଶସାଧିତ ହୋଇ ନ ଥାଏ। ପ୍ରଯୁକ୍ତିର ବିକାଶ ଯୋଗୁ ଟେକ୍ନୋଲୋଜି ଉପରେ ମଣିଷ ଅତ୍ୟଧିକ ନିର୍ଭରଶୀଳ ନ ହୋଇ ନିଜସ୍ବ ଉଦ୍ୟମ ଜାରି ରଖିବା ଉଚିତ ବୋଲି ଏହି ରିପୋର୍ଟ ରେଖାଙ୍କିତ କରିଛି। ଏଥିସହ ଶିକ୍ଷାର ସାମାଜିକ ଦିଗ ଉପରେ ଗୁରୁତ୍ୱ ଦେବା ପାଇଁ ନୀତି ପ୍ରଣୟନକାରୀମାନଙ୍କୁ ୟୁନେସ୍କୋ ସତର୍କ କରାଇଛି। ଡିଜିଟାଲ ବିପ୍ଳବରେ ଅମାପ ସମ୍ଭାବନା ରହିଛି। କିନ୍ତୁ ସମାଜରେ ଏହାକୁ ନିୟନ୍ତ୍ରଣ କରି ଶିକ୍ଷାରେ ଏହାର ଉପଯୋଗକୁ ମଧ୍ୟ ସମାନ ଗୁରୁତ୍ୱ ଦେବା ଆବଶ୍ୟକ ବୋଲି ୟୁନେସ୍କୋ ମହାନିର୍ଦ୍ଦେଶକ ଅଡ୍ରେ ଅଜୌଲେ ପରାମର୍ଶ ଦେଇଛନ୍ତି। ସେ ଆହୁରି କହିଛନ୍ତି, ଡିଜିଟାଲ ଟେକ୍ନୋଲୋଜିର ବ୍ୟବହାର ଶିକ୍ଷା, ଅନୁଭୂତିକୁ ତ୍ୱରାନ୍ବିତ କରିବା ଏବଂ ଶିକ୍ଷକ ଓ ଛାତ୍ରୀଛାତ୍ରଙ୍କ ମଙ୍ଗଳ ପାଇଁ ବ୍ୟବହାର କରାଯିବା ଜରୁରୀ। କିନ୍ତୁ ତାହା ସେମାନଙ୍କ କ୍ଷତିସାଧନ ନ କରୁ। ଶିକ୍ଷାର୍ଥୀଙ୍କ ଆବଶ୍ୟକତାକୁ ପ୍ରଥମେ ପ୍ରାଧାନ୍ୟ ଦିଆଯାଉ ଏବଂ ପରେ ଶିକ୍ଷକମାନଙ୍କ ପାଇଁ ଡିଜିଟାଲ ଟେକ୍ନୋଲୋଜି ଯେପରି ସହାୟକ ହେବ ତାହା ଉପରେ ଗୁରୁତ୍ୱ ଦିଆଯାଉ। ଅନ୍ଲାଇନ କନେକଶନ ବ୍ୟକ୍ତିଗତ ଭାବେ ଭାବ ବିନିମୟର ବିକଳ୍ପ ନୁହେଁ ବୋଲି ଅଜୌଲେ କହିଛନ୍ତି। ଶିକ୍ଷାର ଗୁଣବତ୍ତା ପାଇଁ ଡିଜିଟାଲ ଟେକ୍ନୋଲୋଜି ଉଦ୍ଦିଷ୍ଟ ବୋଲି ଦର୍ଶାଇବା ଭଳି ଉତ୍କୃଷ୍ଟ ଗବେଷଣା କରାଯାଇ ନ ଥିବା ଉକ୍ତ ରିପୋର୍ଟରେ କୁହାଯାଇଛି। ଘରୋଇ ଶିକ୍ଷା ସଂସ୍ଥାଗୁଡ଼ିକ ଡିଜିଟାଲ ଶିକ୍ଷାର ବ୍ୟବସାୟୀକରଣ ପାଇଁ ଡିଜିଟାଲ ମାଧ୍ୟମର ଯଥାର୍ଥତା ପ୍ରମାଣିତ କରିବା ସକାଶେ ପାଣ୍ଠି ଯୋଗାଇଥାନ୍ତି। ସାରା ବିଶ୍ୱରେ ଶିକ୍ଷାନୀତି ପ୍ରଣୟନ କ୍ଷେତ୍ରରେ ଏଭଳି ସଂସ୍ଥାର ପ୍ରଭାବ ବୃଦ୍ଧି ଚିନ୍ତାର ବିଷୟ ବୋଲି ୟୁନେସ୍କୋ ପକ୍ଷରୁ କୁହାଯାଇଛି। ଡିଜିଟାଲ ଟେକ୍ନୋଲୋଜି ଛାତ୍ରୀଛାତ୍ରଙ୍କର କ୍ଷତି କରିବା ପରିବେର୍ତ୍ତ ସେମାନଙ୍କ ପାଇଁ ଯେପରି ଲାଭଦାୟକ ହେବ ତାହା ସୁନିଶ୍ଚିତ କରିବା ନିମନ୍ତେ ଦେଶଗୁଡ଼ିକର ସ୍ପଷ୍ଟ ଉଦ୍ଦେଶ୍ୟ ଓ ସିଦ୍ଧାନ୍ତ ରହୁ ବୋଲି ଜାତିସଂଘର ଏହି ଏଜେନ୍ସି ଯୁକ୍ତିବାଢ଼ିଛି।