ଜଳେଶ୍ୱର,୨୪।୧୨(ସ୍ବ.ପ୍ର.)-ସପ୍ତାହେ ନ ପୂରୁଣୁ ପୁଣି ଏକ ଦନ୍ତା ହାତୀ ବାଲେଶ୍ୱର ଜିଲା ଜଳେଶ୍ୱର ବ୍ଲକ ଅଧୀନ ରାଇବଣିଆସ୍ଥିତ ବଣକାଟି ଗଁାରେ ଆତଙ୍କ ଖେଳାଇଛି। ଶିମିଳିପାଳର ଏକ ଦନ୍ତା ଜଳେଶ୍ୱର ରେଞ୍ଜର ସୁରେଇ ସାହି, ରଙ୍ଗାମାଟିଆ ଜଙ୍ଗଲ ଦେଇ ବଣକାଟି ଗଁାରେ ପଶି କ୍ଷତି ଘଟାଇଛି। ସୂଚନା ଅନୁଯାୟୀ, ବୁଧବାର ଭୋରରେ ଦନ୍ତା ହାତୀଟି ମୟୂରଭଞ୍ଜ ସୀମା ପାର ହୋଇ ଗୋଠଖଣ୍ଡିଆ ଭାବେ ଜଳେଶ୍ୱର ରେଞ୍ଜର ଆମ୍ବତୁମ୍ବା ଟ୍ରେଞ୍ଚ ପାରି ହୋଇ ରାଇବଣିଆ ଅଞ୍ଚଳରେ ପ୍ରବେଶ କରିଥିଲା। ବଣକାଟି ଗଁାର ତତ ରଣାଙ୍କ ଘର ଅଗଣାରେ ଥିବା ଧାନ ଓ ଚାଉଳ ଖାଇବା ସହିତ ରାସ୍ତାରେ ବୁଣିଥିଲା। ପରିବାର ଲୋକ ଘର ପଛପଟ ଦେଇ ପାଖ ଘରକୁ ଦୌଡ଼ି ପଳାଇଥିଲେ। ଗ୍ରାମବାସୀ ଏକାଠି ହୋଇ ନିଅଁା ହୋଳା ସାହାଯ୍ୟରେ ନିକଟ ଜଙ୍ଗଲକୁ ହାତୀ ଘଉଡ଼ାଇବାରେ ସକ୍ଷମ ହୋଇଥିଲେ। ବିଲରେ ଧାନ ନ ଥିବାରୁ ହାତୀଟି ଖାଦ୍ୟ ପାଇଁ ଗ୍ରାମ ମୁହଁା ହେଉଥିବା ଜଣାଯାଇଛି। ଏହି ହାତୀ ବାଲେଶ୍ୱର ଓ ମୟୂରଭଞ୍ଜ ଜିଲାର ସୀମାରେ ରହିଥିବାରୁ ଜଙ୍ଗଲ ବିଭାଗ ପ୍ରତି ସମସ୍ୟା ସୃଷ୍ଟି କରିଛି। ଜଙ୍ଗଲ ବିଭାଗ ପକ୍ଷରୁ ଡାକବାଜି ଯନ୍ତ୍ର ମାଧ୍ୟମରେ ଗ୍ରାମବାସୀଙ୍କୁ ସତର୍କ କରାଯାଇଥିବା ରେଞ୍ଜର ସରୋଜ କୁମାର ମହାନ୍ତି କହିଛନ୍ତି।