କେସିଙ୍ଗା,୨୦।୧୧(ତୁମେଶ୍ୱର ସାହୁ): କଳାହାଣ୍ଡି ଜିଲା କେସିଙ୍ଗା ରେଳ ଷ୍ଟେଶନରେ ସୋମବାର ଅପରାହ୍ନରେ ବନାରସ-ସମ୍ବଲପୁର-ବିଶାଖାପାଟଣା ପର୍ଯ୍ୟନ୍ତ ସମ୍ପ୍ରସାରିତ ଏକ୍ସପ୍ରେସ ଟ୍ରେନର ଉଦ୍ଘାଟନ କାର୍ଯ୍ୟକ୍ରମ ରହିଛି। ଏହା ଦ୍ୱାରା କଳାହାଣ୍ଡି, ନୂଆପଡ଼ା, ନବରଙ୍ଗପୁର ଆଦି ଜିଲା ସହ କେସିଙ୍ଗା ଅଞ୍ଚଳର ବହୁ ଦିନର ଦାବି ପୂରଣ ହେବ।
ମୁଖ୍ୟତଃ ପଶ୍ଚିମ ଓଡ଼ିଶାର ବରଗଡ଼, ବଲାଙ୍ଗୀର, ଟିଟଲାଗଡ଼, କଳାହାଣ୍ଡିର ରେଳ ଯାତ୍ରୀ ଆଗରୁ ବନାରସ ଓ ପ୍ରୟାଗରାଜ ଯିବାକୁ ହେଲେ ସମ୍ବଲପୁର କିମ୍ବା ଛତିଶଗଡ଼ର ରାଜଧାନୀ ରାୟପୁର ଯିବାକୁ ପଡୁଥିଲା। ସେଠାରୁ ଅନ୍ୟ ଏକ ଟ୍ରେନରେ ବନାରସ, ପ୍ରୟାଗରାଜ ଯିବାକୁ ପଡୁଥିଲା। କିନ୍ତୁ ସୋମବାରଠାରୁ ବନାରସ-ସମ୍ବଲପୁର ଏକ୍ସପ୍ରେସ ବିଶାଖାପାଟଣ ପର୍ଯ୍ୟନ୍ତ ସମ୍ପ୍ରସାରିତ କରାଯାଇଛି I ସପ୍ତାହକୁ ଦୁଇ ଦିନ ସୋମବାର ଏବଂ ଗୁରୁବାର ଏହା ଚାଲିବ ବୋଲି ସୂଚନା ମିଳିଛି।
ପ୍ରଥମେ ସମ୍ବଲପୁର ରେଳ ଷ୍ଟେଶନଠାରେ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ରେଳ ମନ୍ତ୍ରୀ ଅଶ୍ୱନୀ ବୈଷ୍ଣବ ବନାରସ-ସମ୍ବଲପୁର-ବିଶାଖାପାଟଣା ସମ୍ପ୍ରସାରଣ ଏକ୍ସପ୍ରେସ ଟ୍ରେନର ଉଦ୍ଘାଟନ କରିବେ। ଏନେଇ କେସିଙ୍ଗା ଷ୍ଟେଶନରେ ଏକ୍ସପ୍ରେସ ଟ୍ରେନ୍ର ସ୍ବାଗତକୁ ନେଇ ମଧ୍ୟ ଜୋର୍ଦାର ପ୍ରସ୍ତୁତି ଚାଳିଛି।
ସେହିପରି ଏକ୍ସପ୍ରେସ ଟ୍ରେନକୁ ବରଗଡ଼ ରେଳ ଷ୍ଟେଶନରେ ଏମ୍ପି ସୁରେଶ ପୂଝରୀ, ଏମ୍ପି ସଂଗୀତା କୁମାରୀ ସିଂହ ଦେଓ ରାଜ୍ୟସଭା ଏମ୍ପି ନିରଞ୍ଜନ ବିଶିଙ୍କ ସମେତ କଳାହାଣ୍ଡିର ମୁଖ୍ୟ ରେଳ ଷ୍ଟେଶନ ଅଧିକାରୀ, କଳାହାଣ୍ଡି ଏମ୍ପି ବସନ୍ତ ପଣ୍ଡା ଓ ରାଜ୍ୟ ସଭା ଏମ୍ପି ସୁଜିତ ସେଠ ପ୍ରମୁଖ ଉପସ୍ଥିତ ରହି ସ୍ବାଗତ କରିବାର କାର୍ଯ୍ୟକ୍ରମ ରହିଛି ବୋଲି ଲୋକସମ୍ପର୍କ ଅଫିସର ସମ୍ବଲପୁର ଡିଭିଜନ ପକ୍ଷରୁ ଏକ ପ୍ରେସ ବିଜ୍ଞପ୍ତିରେ ପ୍ରକାଶ କରାଯାଇଛି।