ମସ୍କୋ,୧୯।୧୨ : ଗତ ୧୦ ମାସ ଧରି ୟୁକ୍ରେନରେ ଯୁଦ୍ଧ କରୁଥିବା ସୈନ୍ୟଙ୍କର ମନୋବଳ ବଢ଼ାଇବା ପାଇଁ ରୁଷିଆ ବର୍ତ୍ତମାନ ଗାୟକ, ସଙ୍ଗୀତଜ୍ଞ ଏବଂ ସର୍କସ କଳାକାରଙ୍କୁ ନିୟୋଜିତ କରିବ। ଏହା ଯୁଦ୍ଧକ୍ଷେତ୍ରରେ ପୁରୁଣା ଦିନଗୁଡ଼ିକର ଅନୁଭବ ଦେବ।
ରୁଷିଆ କହିଛି ଯେ ୟୁକ୍ରେନରେ ଚାଲିଥିବା ଯୁଦ୍ଧ ମଧ୍ୟରେ ସଙ୍ଗୀତକାର ଏବଂ ଗାୟକମାନଙ୍କୁ ଯୁଦ୍ଧର ଆଗ ଧାଡ଼ିରେ ନିୟୋଜିତ କରିବ। ରୁଷିଆର ପ୍ରତିରକ୍ଷା ମନ୍ତ୍ରଣାଳୟ ଏକ ଫ୍ରଣ୍ଟ-ଲାଇନ କ୍ରିଏଟିଭ ବ୍ରିଗେଡ ଗଠନ କରିବାକୁ ଘୋଷଣା କରି କହିଛି ଯେ ଏଥିରେ ସର୍କସ କଳାକାର ମଧ୍ୟ ସାମିଲ ହେବେ। ଗୁପ୍ତଚର ସୂତ୍ରରୁ ମିଳିଥିବା ସୂଚନା ଆଧାରରେ ବ୍ରିଟେନର ପ୍ରତିରକ୍ଷା ମନ୍ତ୍ରଣାଳୟ ଏହି ସୂଚନା ଦେଇଛି।
ବ୍ରିଟେନର ଗୁପ୍ତଚର ରିପୋର୍ଟରେ ଏହା କୁହାଯାଇଛି ଯେ ରୁଷିଆ ସୈନ୍ୟଙ୍କର ମନୋବଳ ଦୁର୍ବଳ ହେବାରେ ଲାଗିଛି। ଏହି କାରଣରୁ ଯୁଦ୍ଧରେ ବାଧା ସୃଷ୍ଟି ହେଉଛି। ବ୍ରିଟେନ କହିଛି ଯେ ନୂତନ ସୃଜନଶୀଳ ବ୍ରିଗେଡ ଗଠନ ହେବା ପୂର୍ବରୁ ରୁଷିଆର ଜନସାଧାରଣଙ୍କୁ ସଙ୍ଗୀତ ଉପକରଣ ଦାନ କରିବାକୁ ଏକ ନିବେଦନ କରାଯାଇଥିଲା।
