ଭୁବନେଶ୍ୱର,୧୫ା୮(ଅଭିଜିତ ଦାସ): ତେଜସ୍ ର଼୍ୟାକ୍ଯୁକ୍ତ ରାଜଧାନୀ ଏକ୍ସପ୍ରେସ୍ର ଉଦ୍ଘାଟନୀ ସମାରୋହରେ ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ଓଡ଼ିଶାରେ ଦ୍ୱିତୀୟ ବନ୍ଦେ ଭାରତ ଏକ୍ସପ୍ରେସ୍ ଟ୍ରେନ୍ ଚଳାଚଳ କରିବ ବୋଲି ସୂଚନା ଦେବା ସହ ଓଡିଶା ପାଇଁ ‘ବନ୍ଦେ ଭାରତ ମେଟ୍ରୋ’ ପ୍ରକଳ୍ପ ଘୋଷଣା କରିଥିଲେ। ପୁରୀ-ଭୁବନେଶ୍ୱର-କଟକ ମଧ୍ୟରେ ଏହି ବୃହତ୍ ପ୍ରକଳ୍ପ କାର୍ଯ୍ୟକାରୀ କରାଯିବ ବୋଲି ରେଳମନ୍ତ୍ରୀ କହିଥିଲେ। ତେବେ ଏହି ଘୋଷଣା ପରେ ସେଠାରେ ଉପସ୍ଥିତ ଥିବା ବିଜେଡି ବିଧାୟକ ଅନନ୍ତ ନାରାୟଣ ଜେନା ଓ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ନିଜ ଅଭିଭାଷଣ ମାଧ୍ୟମରେ କଥାକଟାକଟି ହୋଇଥିବା ଦେଖିବାକୁ ମିଳିଥିଲା। ‘ବନ୍ଦେ ଭାରତ ମେଟ୍ରୋ’ ପ୍ରକଳ୍ପକୁ ସମାଲୋଚନା କରି ବିଧାୟକ ଜେନା କହିଲେ, ଓଡିଶାରେ ମେଟ୍ରୋ ପ୍ରକଳ୍ପର କାର୍ଯ୍ୟ ଆରମ୍ଭ ହୋଇସାରିଛି। ତ୍ରିଶୂଳିଆରୁ ପ୍ରଥମେ ପ୍ରକଳ୍ପର ଶୁଭାରମ୍ଭ କରାଯାଇଛି। ଦିଲ୍ଲୀ ମେଟ୍ରୋ ରେଳ କର୍ପୋରେଶନ(ଡିଏମ୍ଆର୍ସି)ର ଜିଓ ଟେକ୍ନିକାଲ ଟିମ୍ ମାଟି ପରୀକ୍ଷା କରୁଥିବାବେଳେ ଭୁବନେଶ୍ୱରର ବିଭିନ୍ନ ସ୍ଥାନରୁ ମାଟି ନମୁନା ସଂଗ୍ରହ କରାଯାଇ ପରୀକ୍ଷା କରାଯାଉଛି। ରାଜ୍ୟ ସରକାର ଖୁବ୍ଶୀଘ୍ର ଓଡ଼ିଶାବାସୀଙ୍କୁ ମେଟ୍ରୋ ରେଳର ସୁବିଧା ଯୋଗାଇ ଦେବେ ବୋଲି ଅନନ୍ତ କହିଥିଲେ। ଅନ୍ୟପକ୍ଷରେ କେନ୍ଦ୍ର ଶିକ୍ଷା ଓ ଦକ୍ଷତା ବିକାଶ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ରାଜ୍ୟ ସରକାରଙ୍କ ମେଟ୍ରୋ ରେଳ ପ୍ରକଳ୍ପର ସ୍ଥିତିକୁ ନେଇ ପ୍ରଶ୍ନ ଉଠାଇଥିଲେ। ସେ କହିଲେ, ରାଜ୍ୟ ସରକାର ମେଟ୍ରୋ ପ୍ରକଳ୍ପ ଲାଗି ରେଳ ମନ୍ତ୍ରଣାଳୟ ସହ କୌଣସି ଆଲୋଚନା କରିନାହାନ୍ତି। ରାଜ୍ୟରେ ୪ରୁ ୫ଜଣ ବାବୁ ଆସି ଦେଖିଦେଲେ ମେଟ୍ରୋ ପ୍ରକଳ୍ପ ହୁଏନାହିଁ। ମେଟ୍ରୋ ପ୍ରକଳ୍ପ ଲାଗି କିଏ ଖର୍ଚ୍ଚ କରିବେ, ତାହାକୁ ନେଇ ମଧ୍ୟ କୌଣସି ଆଲୋଚନା କରାଯାଇନାହିଁ। ଏସବୁ ଭିତରେ ମେଟ୍ରୋ ପ୍ରକଳ୍ପ କେମିତି ହେବ ବୋଲି ସେ କଟାକ୍ଷ କରିଥିଲେ। ତେବେ କେନ୍ଦ୍ର ସରକାରଙ୍କ ‘ବନ୍ଦେ ଭାରତ ମେଟ୍ରୋ’ ସମ୍ପର୍କରେ ସେ କହିଲେ,ଏହାକୁ ଭାରତ ସରକାରଙ୍କ ଅର୍ବାନ ଡେଭଲପମେଣ୍ଟ ଓ ସ୍ଥାନୀୟ ରାଜ୍ୟ ସରକାର ମିଶି କରୁଛନ୍ତି। ଓଡ଼ିଶାରେ ବନ୍ଦେ ଭାରତ ମେଟ୍ରୋ ଚାଲିବା ପାଇଁ ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ଘୋଷଣା କରିଛନ୍ତି। ତେବେ ମେଟ୍ରୋ ଓଡ଼ିଶାକୁ ଆସୁ, କିନ୍ତୁ ଆସିବା ପାଇଁ ଠିକ ଢଙ୍ଗରେ ପ୍ରୟାସ ହେଉ। ସେହିପରି ମେଟ୍ରୋ ପ୍ରକଳ୍ପ ପୂର୍ବରୁ ରାଜ୍ୟ ସରକାର ଭୁବନେଶ୍ୱର ଷ୍ଟେଶନ ବାହାର ସ୍ଥାନଗୁଡିକର ମରାମତି କାର୍ଯ୍ୟ କରନ୍ତୁ। ବିଭିନ୍ନ ସ୍ଥାନରେ ଖାଲଖମା ରହିଥିବାରୁ ରେଳଯାତ୍ରୀମାନେ ହନ୍ତସନ୍ତ ହେଉଥିବା ସେ କହିଛନ୍ତି।