କୋଲକାତା,୨୫।୨ : ଫ୍ଲାଏ ଆଶ୍ ନେଇ ସ୍ବଦେଶ ଫେରୁଥିବା ବାଂଲାଦେଶର ମାଲ ପରିବହନକାରୀ ଜାହାଜ ଅନ୍ୟ ଏକ ଜାହାଜ ସହିତ ମୁହାଁମୁହିଁ ହେବା ପରେ ହୁଗୁଳି ନଦୀରେ ବୁଡ଼ି ଯାଇଛି। ଶନିବାର ଆଭ୍ୟନ୍ତରୀଣ ଜଳପଥ ପ୍ରାଧିକରଣର ଜଣେ ଅଧିକାରୀ ଏହି ସୂଚନା ପ୍ରଦାନ କରିଛନ୍ତି। କୋଲକାତା ଠାରୁ ପ୍ରାୟ ୬୦ କିଲୋମିଟର ଦୂରରେ ଥିବା ଦକ୍ଷିଣ ୨୪ ପରଗଣା ଜିଲାର ନିଶ୍ଚିତପୁରରେ ଶୁକ୍ରବାର-ଶନିବାର ମଧ୍ୟବର୍ତ୍ତୀ ରାତିରେ ଏହି ଘଟଣା ଘଟିଛି ବୋଲି ସେ କହିଛନ୍ତି। ଅଧିକାରୀ ଜଣକ କହିଛନ୍ତି ଯେ ଜାହାଜରେ ଥିବା ଚାଳକ ଦଳର ନଅ ଜଣ କର୍ମଚାରୀଙ୍କୁ ପୋଲିସ ସୂଚନା ପାଇବା ପରେ ଘଟଣାସ୍ଥଳରେ ପହଞ୍ଚି ଉଦ୍ଧାର କରାଯାଇଥିଲା।
ପୋଲିସ କହିଛି ଯେ ଉଦ୍ଧାର ପରେ କ୍ରୁ ସଦସ୍ୟଙ୍କୁ ପୋଲିସ ଷ୍ଟେଶନକୁ ଅଣାଯାଇଥିଲା। ଜାହାଜର ପ୍ରତିନିଧୀ କହିଛନ୍ତି ଯେ ଜାହାଜର ଏକ ଅଂଶ ଜଳମଗ୍ନ ହୋଇଯାଇଥିଲା ଏବଂ ଇଞ୍ଜିନ ରୁମରେ ଜଳ ଶୀଘ୍ର ଭରି ଯାଉଥିଲା। ଜାହାଜକୁ ଏବେ ମଧ୍ୟ ଉଦ୍ଧାର କରାଯାଇପାରିବ ବୋଲି ସେ କହିଛନ୍ତି।
ଆଭ୍ୟନ୍ତରୀଣ ଜଳପଥ ପ୍ରାଧିକରଣର ଅଧିକାରୀ କହିଛନ୍ତି ଯେ ସେହି ସମୟରେ ଦୁର୍ଘଟଣା କାର୍ଗୋ ଜାହାଜ ଯାତାୟାତ ଜଳ ମାର୍ଗରେ ନ ଥିବାରୁ କୋଲକାତା ବନ୍ଦରରେ ଜାହାଜ ଚଳାଚଳ ପ୍ରଭାବିତ ହୋଇ ନ ଥିଲା। ସେ କହିଛନ୍ତି ଯେ ଯାଞ୍ଚକାରୀ ଦଳ ଘଟଣାସ୍ଥଳକୁ ଯାଇଛନ୍ତି। ଏନେଇ ବିସ୍ତୃତ ରିପୋର୍ଟକୁ ଅପେକ୍ଷା କରାଯାଇଛି। ଅଧିକାରୀଙ୍କ କହିବାନୁସାରେ, ଉଦ୍ଧାର ହୋଇଥିବା ନାବିକମାନଙ୍କୁ ସେମାନଙ୍କ ଦେଶକୁ ପଠାଇବା ପାଇଁ ଆଲୋଚନା ଚାଲିଛି।
