ଢାକା,୨୨।୧: ବାଂଲାଦେଶ ପ୍ରଧାନମନ୍ତ୍ରୀ ଶେଖ ହସିନା ଭାରତୀୟ ପ୍ରତିପକ୍ଷ ନରେନ୍ଦ୍ର ମୋଦିଙ୍କୁ ଧନ୍ୟବାଦ୍ ଜଣାଇଛନ୍ତି। ପଡ଼ୋଶୀ ଦେଶକୁ ଉପହାର ଆକାରରେ ୨ ନିୟୁତ କୋଭିଡ୍-୧୯ କୋଭିଡିଲ୍ଡ ଭାକ୍ସିନ ଯୋଗାଇଥିବାରୁ ସେ ଖୁସି ବ୍ୟକ୍ତ କରିଛନ୍ତି। ବାଂଲାଦେଶରେ ଏବେ କରୋନା ସଂକ୍ରମିତଙ୍କ ସଂଖ୍ୟା ବୃଦ୍ଧି ପାଉଥିବାବେଳେ ଗୁରୁତ୍ୱପୂର୍ଣ୍ଣ ସମୟରେ ଭାକ୍ସିନ ପଠାଇଛି ଭାରତ।
”ଉପହାର ସ୍ବରୂପ କୋଭିଡ୍ ଭାକ୍ସିନ ପଠାଇଥିବାରୁ ମୁଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଧନ୍ୟବାଦ୍ ଦେଉଛି“ ବୋଲି ଢାକା ବିଶ୍ୱବିଦ୍ୟାଳୟର ୧୦୦ତମ ପ୍ରତିଷ୍ଠା ଦିବସ ଅବସରରେ ଆୟୋଜିତ ଏକ ଅନଲାଇନ ଅନ୍ତର୍ଜାତୀୟ କନଫରେନ୍ସରେ ହସିନା କହିଛନ୍ତି। ଦେଶରେ କେଉଁ ଭଳି ଟିକାକରଣ କରାଯିବା, ସରକାର ତାହା ଯୋଜନା କରିସାରିଥିବା ସେ ପ୍ରକାଶ କରିଛନ୍ତି। କୋଭିଡ୍-୧୯ ପରିସ୍ଥିତି ବିରୋଧରେ ଆମେ ସମସ୍ତ ପ୍ରକାର ପଦକ୍ଷେପ ନେଇଛୁ। ବର୍ତ୍ତମାନ ପଠାଯାଇଥିବା ଭାକ୍ସିନକୁ ଛାଡ଼ି ଦେଲେ ଭାରତ ଠାରୁ ବାଂଲାଦେଶ ୩ କୋଟି ଡୋଜ କିଣିବାକୁ ଯୋଜନା କରିଛି।