ଢାକା,୨୧।୭: ବାଂଲାଦେଶ ସରକାରୀ ନିଯୁକ୍ତିରେ ସଂରକ୍ଷଣ ବ୍ୟବସ୍ଥାରେ ସଂସ୍କାର ଦାବିରେ ଆନ୍ଦୋଳନ ଉଗ୍ର ହେବାରେ ଲାଗିଛି। ଆନ୍ଦୋଳନକାରୀ ଓ ପୋଲିସ ମଧ୍ୟରେ ସଂଘର୍ଷ ଘଟି ଇତିମଧ୍ୟରେ ୧୩୦ ଜଣଙ୍କ ଜୀବନ ଯିବା ସହ ବହୁସଂଖ୍ୟାରେ ଆହତ ହେଲେଣି। ଉତ୍ତ୍ୟକ୍ତ ଆନ୍ଦୋଳନକାରୀ ବାଂଲାଦେଶର ସରକାରୀ ଗଣମାଧ୍ୟମ ବି-ଟିଭି କାର୍ଯ୍ୟାଳୟ ସମେତ ବିଭିନ୍ନ ସରକାରୀ ବିଲ୍ଡିଂରେ ପୋଡ଼ାଜଳା ଜାରି ରଖିଥିବାରୁ ବାଂଲାଦେଶ ପୋଲିସ ସେମାନଙ୍କୁ ଦେଖିଲାମାତ୍ରେ ଗୁଳି ସମେତ କର୍ଫ୍ୟୁ ଆଇନକୁ କଡ଼ାକଡ଼ି ଲାଗୁ କରିଛି। ଶନିବାର ରାଜଧାନୀ ଢାକାର ବିଭିନ୍ନ ଭାଗରେ ସେନା ଯବାନମାନେ ପାଟ୍ରୋଲିଂ କରିଛନ୍ତି। ଦେଶବ୍ୟାପୀ ଆନ୍ଦୋଳନ ହିଂସାତ୍ମକ ରୂପ ଧାରଣ କରିଥିବାବେଳେ ୧୫ ବର୍ଷ କାର୍ଯ୍ୟକାଳ ପରେ ପ୍ରଧାନମନ୍ତ୍ରୀ ଶେଖ୍ ହାସିନା ପ୍ରଥମଥର ବଡ଼ ଚ୍ୟାଲେଞ୍ଜର ସମ୍ମୁଖୀନ ହୋଇଛନ୍ତି।
ଶୁକ୍ରବାର ମଧ୍ୟରାତ୍ରରୁ କର୍ଫ୍ୟୁ ଜାରି ହୋଇଥିବାବେଳେ ଶନିବାର ଜନସାଧାରଣ ଅତ୍ୟାବଶ୍ୟକ ସାମଗ୍ରୀ ସଂଗ୍ରହ କରିବା ପାଇଁ ମଧ୍ୟାହ୍ନରୁ ଅପରାହ୍ନ ୨ଟା ପର୍ଯ୍ୟନ୍ତ ଏହାକୁ କୋହଳ କରାଯାଇଥିଲା। ରବିବାର ପୂର୍ବାହ୍ନ ୧୦ଟା ପର୍ଯ୍ୟନ୍ତ କର୍ଫ୍ୟୁ ଜାରି ରହିବ ବୋଲି ଆଶା କରାଯାଉଛି। ହିଂସାରେ ସମ୍ପୃକ୍ତ ଲୋକଙ୍କୁ ଆବଶ୍ୟକ ପଡ଼ିଲେ ଦେଖିବା ମାତ୍ରେ ଗୁଳି ଚଳାଇବାକୁ ପୋଲିସ ଅଫିସରମାନଙ୍କୁ ନିର୍ଦ୍ଦେଶ ଦିଆଯାଇଥିବା ଶାସକ ଆଓ୍ବାମି ଲିଗ୍ ଦଳର ସାଧାରଣ ସମ୍ପାଦକ ଓବାଇଦୁଲ୍ କାଦେର କହିଛନ୍ତି। କର୍ଫ୍ୟୁ ଯୋଗୁ ରାଜଧାନୀ ଢାକାର ରାସ୍ତାଘାଟ ଶୂନ୍ଶାନ ହାଇଯାଇଛି। ସଶସ୍ତ୍ର ଯବାନମାନେ ପାଟ୍ରୋଲିଂ ଚଳାଇଛନ୍ତି ।
ବାଂଲାଦେଶର ସ୍ବାଧୀନତା ସଂଗ୍ରାମୀଙ୍କ ପିଲାମାନଙ୍କ ପାଇଁ ସରକାରୀ ଚାକିରିରେ ୩୦ ପ୍ରତିଶତ ସଂରକ୍ଷଣ ବ୍ୟବସ୍ଥା ରଖାଯାଇଥିବାରୁ ଏହାର ପ୍ରତିବାଦରେ ଛାତ୍ର ସଂଗଠନଗୁଡ଼ିକ ରାସ୍ତାକୁ ଓହ୍ଲାଇଥିଲେ। ଏଥିରେ ଅନ୍ୟମାନେ ସାମିଲ ହେବା ପରେ ଗତ ମଙ୍ଗଳବାର ଆନ୍ଦୋଳନ ହିଂସାତ୍ମକ ରୂପ ନେଇଥିଲା। କେବଳ ଶୁକ୍ରବାର ୪୩ ଜଣଙ୍କ ମୃତ୍ୟୁ ଘଟିଥିଲା। ଗୁରୁବାର ୨୫ ଜଣଙ୍କ ଜୀବନ ଯାଇଥିଲା।
