ଅକ୍ଲାଣ୍ଡ,୧୭।୧୨: ନ୍ୟୁଜିଲାଣ୍ଡର ସ୍ବାସ୍ଥ୍ୟ ମନ୍ତ୍ରଣାଳୟ ନିର୍ଦ୍ଦେଶକ୍ରମେ ବାଂଲାଦେଶ ଦଳକୁ ପୁଣି ଥରେ କ୍ୱାରେଣ୍ଟିନରେ ରଖାଯାଇଛି। ବାଂଲାଦେଶ ଦଳର ସ୍ପିନ ବୋଲିଂ କୋଚ୍ ରଙ୍ଗନା ହେରାଥଙ୍କ କୋଭିଡ୍-୧୯ ରିପୋର୍ଟ ପଜିଟିଭ ଆସିବା ପରେ ନ୍ୟୁଜିଲାଣ୍ଡର ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ଏଭଳି ନିର୍ଦ୍ଦେଶ ଜାରି କରାଯାଇଛି।
ହେରାଥଙ୍କ ସଂସ୍ପର୍ଶରେ ଆସିଥିବା ଟେଷ୍ଟ ଦଳର ୮ ଜଣ ସଦସ୍ୟଙ୍କୁ ଆଇସୋଲେଶନରେ ରଖାଯାଇଛି। ଏମାନଙ୍କ ମଧ୍ୟରେ ଖେଳାଳିଙ୍କ ସହ କିଛି ସପୋର୍ଟ ଷ୍ଟାଫ ସଦସ୍ୟ ରହିଛନ୍ତି। ଅନ୍ୟ ଖେଳାଳିମାନେ ସେମାନଙ୍କ କ୍ୱାରେଣ୍ଟିନ ଶେଷ କରିବା ପରେ ଗତ ୧୬ ତାରିଖରେ ଗ୍ରାଉଣ୍ଡରେ ପ୍ରାକ୍ଟିସ ସେସନରେ ଯୋଗ ଦେଇଥିଲେ। କିନ୍ତୁ ପରେ ପ୍ରାକ୍ଟିସ ସେସନକୁ ବନ୍ଦ କରିବାକୁ ନିର୍ଦ୍ଦେଶ ଦିଆଯାଇଛି।
“ଆମକୁ ଗତକାଲିଠାରୁ ଅଭ୍ୟାସ କରିବା ଲାଗି ଅନୁମତି ମିଳିଥିଲା। କିନ୍ତୁ ନ୍ୟୁଜିଲାଣ୍ଡ ସରକାରଙ୍କ ନିର୍ଦ୍ଦେଶରେ ଆମ ପ୍ରାକ୍ଟିସକୁ ବାତିଲ କରି ଦିଆଯାଇଛି। ଆମେ ଏପର୍ଯ୍ୟନ୍ତ ୩ କୋଭିଡ୍ ଟେଷ୍ଟ କରାଇଛୁ। ଆହୁରି ଏକ କୋଭିଡ୍ ଟେଷ୍ଟ କରାଯିବ। କ୍ୱାରେଣ୍ଟିନର ୯ମ ଦିନ ସଭିଙ୍କ ରିପୋର୍ଟ ନେଗେଟିଭ ଆସିଲେ, ଆମକୁ ଅଭ୍ୟାସ ପାଇଁ ଅନୁମତି ମିଳିବ” ବୋଲି ବାଂଲାଦେଶ ଦଳୀୟ ମ୍ୟାନେଜର ନାଫିସ ଇକବାଲ କହିଛନ୍ତି। କୋଭିଡ୍ କାରଣରୁ କାର୍ଯ୍ୟସୂଚୀରେ ପରିବର୍ତ୍ତନ ହୋଇଛି। ଆସନ୍ତା ୨୮ ତାରିଖରୁ ଆରମ୍ଭ ହେବାକୁ ଥିବା ଦୁଇ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ ପୂର୍ବରୁ ବାଂଲାଦେଶ ଏକ ଦୁଇ ଦିନିଆ ଅଭ୍ୟାସ ଖେଳିବ।