ଢାକା,୨୩।୫: ସ୍ଥାନୀୟ ଶେରେ ବାଂଲା ଜାତୀୟ ଷ୍ଟାଡିୟମରେ ସୋମବାରଠାରୁ ବାଂଲାଦେଶ ଓ ଶ୍ରୀଲଙ୍କା ମଧ୍ୟରେ ଦ୍ୱିତୀୟ କ୍ରିକେଟ ଟେଷ୍ଟ ମ୍ୟାଚ୍ ଆରମ୍ଭ ହୋଇଯାଇଛି। ଟସ୍ ଜିତି ବ୍ୟାଟିଂ କରିଥିବା ବାଂଲାଦେଶ ପ୍ରାରମ୍ଭିକ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇ ମାତ୍ର ୨୪ରନ୍ ମଧ୍ୟରେ ଅଧାଦଳକୁ ହରାଇ ସାରିଥିଲା। ଏଭଳି ବିପରୀତ ପରିସ୍ଥିତିରେ ମୁଶ୍ଫିକର ରହିମ ଏବଂ ଲିଟନ ଦାସଙ୍କ ଅବିଭାଜିତ ୬ଷ୍ଠ ଉଇକେଟ ପାଇଁ ୭୭ ଓଭରରେ ୨୫୩ ରନ୍ର ଭାଗୀଦାରିତା କରିଛନ୍ତି। ଏହା ବାଂଲାଦେଶ ପାଇଁ ୬ଷ୍ଠ ଉଇକେଟ ଲାଗି ସର୍ବାଧିକ ଭାଗୀଦାରିତା। ଏଥିପୂର୍ବରୁ ଏହି ରେକର୍ଡ ରହିମ ଓ ପୂର୍ବତନ ଅଧିନାୟକ ମହମ୍ମଦ ଅଶ୍ରଫୁଲଙ୍କ ନାମରେ ଥିଲା। ଦୁହେଁ ୬ଷ୍ଠ ଉଇକେଟରେ ୨୦୧୩ରେ ସମାନ ପ୍ରତିଦ୍ୱନ୍ଦ୍ୱୀ ବିପକ୍ଷରେ ୧୯୧ ରନ୍ କରିଥିଲେ। ପ୍ରଥମ ଦିନ ଶେଷସୁଦ୍ଧା ଘରୋଇ ଦଳ ୫ ଉଇକେଟ ହରାଇ ୨୭୭ ରନ୍ କରିଛି। ଷ୍ଟମ୍ପ ଅପସାରଣ ବେଳକୁ ରହିମ ୧୧୫ (୧୩ ଚୌକା) ଓ ଲିଟନ ୧୩୫ (୧୬ ଚୌକା ଓ ୧ ଛକା) ରନ୍ କରି ଅପରାଜିତ ଅଛନ୍ତି। ଏହା ରହିମ୍ଙ୍କ ଲଗାତର ଦ୍ୱିତୀୟ ଏବଂ ଟେଷ୍ଟ କ୍ୟାରିୟରରେ ୯ମ ଶତକ ହୋଇଥିବା ବେଳେ ୨୭ ବର୍ଷୀୟ ଲିଟନଙ୍କ ପାଇଁ ଏହା ତୃତୀୟ ଟେଷ୍ଟ ଶତକ। ଶ୍ରୀଲଙ୍କା ପକ୍ଷରୁ କାସୁନ ରଜିଥା ୩ଟି ଓ ଅସିଥା ଫର୍ନାଣ୍ଡୋ ୨ଟି ଉଇକେଟ ନେଇଥିଲେ।
