ହ୍ୟୁଷ୍ଟନ,୨୨।୫:ତିନି ମ୍ୟାଚ ବିଶିଷ୍ଟ ଟି-୨୦ ସିରିଜ ପାଇଁ ବାଂଲାଦେଶ ଦଳ ଆମେରିକା ଗସ୍ତରେ ଅଛି। ସିରିଜର ପ୍ରଥମ ମ୍ୟାଚରେ କ୍ରିକେଟ ଜଗତର ଶିଶୁ କହାଯାଉଥିବା ଆମେରିକା ଏକ ବଡ ବିପର୍ଯ୍ୟୟ ସୃଷ୍ଟି କରି ବାଂଲାଦେଶକୁ ୫ ଉଇକେଟରେ ପରାସ୍ତ କରିଛି। ଆମେରିକାର ଜିତିବାରେ ପୂର୍ବତନ ଭାରତୀୟ ଖେଳାଳିଙ୍କର ଗୁରୁତ୍ୱପୂର୍ଣ୍ଣ ଅବଦାନ ଥିଲା। ସିରିଜର ପ୍ରଥମ ମ୍ୟାଚ ହ୍ୟୁଷ୍ଟନ ସ୍ଥିତ ପ୍ରିରି ଭ୍ୟୁ କ୍ରିକେଟ କମ୍ପ୍ଲେକ୍ସରେ ଖେଳାଯାଇଥିଲା।
ଏହି ମ୍ୟାଚରେ ଆମେରିକା ଟସ ଜିତି ବୋଲିଂ କରିବାକୁ ନିଷ୍ପତ୍ତି ନେଇ ବାଂଲାଦେଶକୁ ବ୍ୟାଟିଂ କରିବାକୁ ଆମନ୍ତ୍ରଣ କରିଥିଲା। ପ୍ରଥମେ ବ୍ୟାଟିଂ କରିବାକୁ ଆସିଥିବା ବାଂଲାଦେଶ ୨୦ ଓଭରରେ ୬ ଉଇକେଟ ନେଇ ୧୫୩ ରନ କରିଥିଲା। ତାହିଦ ହ୍ରିଦୟୋୟ ଦଳ ପାଇଁ ସବୁଠୁ ବଡ଼ ଇନିଂସ ଖେଳି ୪୭ ବଲରେ ୪ ଚୌକା ଓ ୪ ଛକା ସହାୟତାରେ ୫୮ ରନ ସ୍କୋର କରିଥିଲେ। ଷ୍ଟିଭେନ ଟେଲର ଆମେରିକା ପାଇଁ ସର୍ବାଧିକ ୨ ଉଇକେଟ ନେଇଥିଲେ।
ତା’ପରେ ଆମେରିକା ଟାର୍ଗେଟକୁ ପିଛା କରି ୧୯.୩ ଓଭରରେ ଜିତିଲା। ଦଳର ବିଜୟରେ ପୂର୍ବତନ ଭାରତୀୟ ଖେଳାଳି ହରମିତ ସିଂଙ୍କର ଏକ ବଡ଼ ଅବଦାନ ଥିଲା। ସେ ସାତ ନମ୍ବରରେ ବ୍ୟାଟିଂ କରି ୧୩ ବଲରେ ୩୩ ରନ୍ର ଚମତ୍କାର ଇନିଂସ ଖେଳିଥିଲେ। ଏଥିରେ ୨ ଚୌକା ଓ ୩ ଛକା ସାମିଲ ଥିଲା। ଏହି ଇନିଂସ ପାଇଁ ହରମିତ ସିଂଙ୍କୁ ‘ପ୍ଲେୟାର ଅଫ ଦି ମ୍ୟାଚ’ ଆଖ୍ୟା ଦିଆଯାଇଥିଲା। ହରମିତ ମଧ୍ୟ ଆଇପିଏଲର ଏକ ଅଂଶ ହୋଇସାରିଛନ୍ତି।