ନୂଆଦିଲ୍ଲୀ,୧୬।୩: ଆଜିର ଦିନରେ କ୍ରିକେଟ ଇତିହାସରେ ଅନେକ ବଡ଼ ଘଟଣା ଘଟିଥିଲେ ହେଁ ଏହି ତାରିଖକୁ ଦୁଃଖର ସହକାରେ ମନେ ପକାଯାଇଥାଏ। କାରଣ ବାଂଲାଦେଶ କ୍ରିକେଟ ଟିମ୍ର ପୂର୍ବ କ୍ରିକେଟର ମଜରୁଲ ଇସଲାମ ଏହି ଦିନ ସଡକ ଦୁର୍ଘଟଣାରେ ପ୍ରାଣ ହରାଇଥିଲେ। ସବୁଠାରୁ କମ୍ ବୟସରେ ପ୍ରାଣ ହରାଇଥିବା ଟେଷ୍ଟ କ୍ରିକେଟର ଥିଲେ ସେ। ମଜରୁଲଙ୍କ ମୃତ୍ୟୁର ପରଦିନ ତାଙ୍କୁ ଶ୍ରଦ୍ଧାଞ୍ଜଳି ଦେବାକୁ ଯାଇ ବାଲାଂଦେଶ ଦଳ ବିଜୟ ହାସଲ କରି ତାଙ୍କୁ ସମର୍ପିତ କରିଥିଲା।
ମଜରୁଲଙ୍କୁ ରାଣା ବୋଲି ମଧ୍ୟ କୁହାଯାଉଥିଲା। ସେ ୧୯୮୪ ମେ ୪ ତାରିଖରେ ଜନ୍ମଗ୍ରହଣ କରିଥିଲେ। କଠିନ ପରିସ୍ଥିତିରେ ତାଙ୍କ ପିଲାଦିନ ବିତିଥିଲେ ହେଁ ପରିଶ୍ରମ ବଳରେ ମାତ୍ର ୧୮ ବର୍ଷ ବୟସରେ ସେ ୨୦୦୩ରେ ଦେଶପାଇଁ ପ୍ରଥମ ଦିନିକିଆ ଖେଳିବାର ଗୌରବ ହାସଲ କରିଥିଲେ। ପରେ ୨୦୦୪ରେ ଟେଷ୍ଟ ଟିମ୍ ପାଇଁ ତାଙ୍କର ଚୟନ କରାଯାଇଥିଲା।
ବାମହାତୀ ମଜରୁଲ ବାଂଲାଦେଶ ପାଇଁ ୬ ଟେଷ୍ଟ ମ୍ୟାଚ୍ ଏବଂ ୨୫ ଦିନିକିଆ ଖେଳିଥିଲେ। ଦିନିକିଆରେ ସେ ୩୩୧ରନ୍ କରିବା ସହ ୨୩ ଉଇକେଟ ନେଇଥିଲେ। ସେହିଭଳି ଟେଷ୍ଟ ଟିମ୍ରେ ୨୫୭ରନ୍ କରିଥିଲେ। ହେଲେ ୨୦୦୭ ମାର୍ଚ୍ଚ ୧୬ରେ ସେ ବନ୍ଧୁଙ୍କ ସହ ବାଇକ୍ ଯୋଗେ ଯାଉଥିବା ସମୟରେ ଦୁର୍ଘଟଣାର ଶିକାର ହୋଇଥିଲେ। ତାଙ୍କର ଗାଡ଼ି ଛୋଟ ବସ୍କୁ ଧକ୍କା ଦେଇଥିଲା। ଦୁର୍ଘଟଣାରେ ଉଭୟଙ୍କ ମୃତ୍ୟୁ ଘଟିଥିଲା। ସେତେବେଳେ ତାଙ୍କୁ ମାତ୍ର ୨୨ ବର୍ଷ ୩୧୬ଦିନ ହୋଇଥିଲା।
ମଜରୁଲଙ୍କ ମୃତ୍ୟୁର ପରଦିନ ଓ୍ବେଷ୍ଟଇଣ୍ଡିଜରେ ୨୦୦୭ କ୍ରିକେଟ ବିଶ୍ୱକପ୍ ମ୍ୟାଚ୍ରେ ବାଲାଂଦେଶ ଟିମ୍ ବେଶ ଆକ୍ରାମକ ନଜର ଆସିଥିଲା। ବାଲାଂଦେଶ ଟିମ୍ ଭାରତକୁ ହରାଇଥିଲା। ମ୍ୟାଚ୍ ପରେ ଦଳର ସମସ୍ତ ଖେଳାଳି ସାଥି ଖେଳାଳିଙ୍କୁ ମନେ ପକାଇ କାନ୍ଦିଥିଲେ। ପରେ ଏହି ବିଜୟକୁ ସେମାନେ ତାଙ୍କୁ ସମର୍ପିତ କରିଥିଲେ।
