କୋଲକାତା,୨୫ା୫: ବାଂଲାଦେଶ ଏମ୍ପି ଅନଓ୍ବରୁଲ ଅଜିମ୍ ଅନଓ୍ବରଙ୍କୁ କୋଲକାତାରେ ହତ୍ୟା କରାଯିବା ପରେ ପ୍ରମାଣ ନଷ୍ଟ ପାଇଁ ହତ୍ୟାକାରୀ ତାଙ୍କ ମୃତଦେହରୁ ଚର୍ମ ଓ ମାଂସ ଉତ୍ତାରିବା ପରେ ହାଡ଼କୁ ଖଣ୍ଡ ଖଣ୍ଡ କରି ସହରର ବିଭିନ୍ନ ସ୍ଥାନରେ ଫିଙ୍ଗିଥିଲେ। ପଶ୍ଚିମବଙ୍ଗ ଅପରାଧ ତଦନ୍ତ ବିଭାଗ (ସିଆଇଡି) ହତ୍ୟାରେ ସମ୍ପୃକ୍ତ ଜଣେ ସନ୍ଦିଗ୍ଧଙ୍କୁ ଗିରଫ କରିବା ପରେ ଉପରୋକ୍ତ ଘଟଣା ସାମ୍ନାକୁ ଆସିଛି। ସନ୍ଦିଗ୍ଧ ଜିହାଦ ହାଲଦର ଜଣେ ପେସାଦାର କଂସେଇ। ତାଙ୍କ ଘର ବାଂଲାଦେଶର ଖୁଲ୍ନା ଜିଲାରେ ହୋଇଥିବାବେଳେ ସେ ବେଆଇନ ଭାବେ ଆସି ମୁମ୍ବାଇରେ ରହୁଥିଲେ। ଏମ୍ପି ଅନଓ୍ବରଙ୍କୁ ହତ୍ୟା କରିବା ପାଇଁ ତାଙ୍କ ବନ୍ଧୁ ତଥା ଆମେରିକା ନାଗରିକ ଅଖତରୁଜମାନ ୫ କୋଟି ଟଙ୍କା ଖର୍ଚ୍ଚ କରିଥିବାବେଳେ ଅଭିଯୁକ୍ତ ହାଲଦରଙ୍କୁ ଏହି କାର୍ଯ୍ୟରେ ନିୟୋଜିତ କରିଥିଲେ। ତାଙ୍କୁ ଅଖତରୁଜମାନ କୋଲକାତା ଆଣି ଏକ ହୋଟେଲରେ ରଖିଥିଲେ। ହାଲଦର ଆଉ ୪ ଜଣଙ୍କ ସହ ମିଶି ଏମ୍ପିଙ୍କୁ ହତ୍ୟା କରିଥିବା ସିଆଇଡି ନିକଟରେ ସ୍ବୀକାର କରିଛନ୍ତି। ଖଣ୍ଡିତ ମୃତଦେହକୁ ବ୍ୟାଗରେ ନେଇ ବିଭିନ୍ନ ସ୍ଥାନରେ ଫିଙ୍ଗିବା ପରେ ହତ୍ୟାକାରୀମାନେ ସହରର ଭିନ୍ନ ଭିନ୍ନ ସ୍ଥାନକୁ ପଳାଇଥିଲେ।
ହତ୍ୟାକାଣ୍ଡ ପୂର୍ବରୁ ବାଂଲାଦେଶୀ ଏମ୍ପିଙ୍କୁ ହନିଟ୍ରାପ୍ରେ ଫସାଯାଇଥିଲା। ମିଛ ପ୍ରେମଜାଲରେ ଫସାଇଥିବା ମହିଳା ଶିଲାନ୍ତି ରହମାନଙ୍କୁ ଢାକା ପୋଲିସ ଅଟକ ରଖିଛି। ସେ ମୁଖ୍ୟ ଅଭିଯୁକ୍ତ ଅଖତରୁଜମାନଙ୍କ ବାନ୍ଧବୀ ବୋଲି ଜଣାପଡ଼ିଛି। ହତ୍ୟାକାଣ୍ଡ ଦିନ ଅଖତରୁଜମାନ କୋଲକାତାରେ ଥିଲେ। ପରେ ସେ ମୁଖ୍ୟ ହତ୍ୟାକାରୀ ଅମନୁଲ୍ଲା ଅମନଙ୍କୁ ନେଇ ଢାକା ପଳାଇଥିଲେ।