West Indies' captain Kraigg Brathwaite (2L) is bowled out by Bangladesh's Nayeem Hasan (not pictured) during the third day of the first cricket Test match between Bangladesh and West Indies at the Zohur Ahmed Chowdhury Stadium in Chittagong on February 5, 2021. (Photo by Munir Uz zaman / AFP) (Photo by MUNIR UZ ZAMAN/AFP via Getty Images)
ଚଟୋଗ୍ରାମ,୬।୨(ଏପି): ମେହିଦୀ ହାସନ ମିରାଜଙ୍କ ଅଲରାଉଣ୍ଡ ପ୍ରଦର୍ଶନ ବଳରେ ବାଂଲାଦେଶ ଭ୍ରମଣକାରୀ ଓ୍ବେଷ୍ଟଇଣ୍ଡିଜ ବିପକ୍ଷ ପ୍ରଥମ ଟେଷ୍ଟ ମ୍ୟାଚକୁ ନିୟନ୍ତ୍ରଣରେ ରଖିଛି। ପ୍ରଥମ ଇନିଂସରେ ୧୦୩ ରନର ଶତକୀୟ ଇନିଂସ ଖେଳିବା ପରେ ମିରାଜ ମୂଲ୍ୟବାନ ୪ ଉଇକେଟ ଅକ୍ତିଆର କରି ଦଳ ପାଇଁ ସୁବିଧାଜନକ ସ୍ଥିତି ସୃଷ୍ଟି କରିଛନ୍ତି। ଟସ୍ ଜିତି ବାଂଲାଦେଶ ପ୍ରଥମ ଇନିଂସରେ ୧୫୦.୨ ଓଭରରେ ୪୩୦ ରନ କରି ଅଲ୍ଆଉଟ ହୋଇଥିଲା। ଜବାବରେ ଓ୍ବେଷ୍ଟଇଣ୍ଡିଜ ୯୬.୧ ଓଭରରେ ୨୫୯ ରନ କରି ଅଲ୍ଆଉଟ ହୋଇ ବୃହତ୍ ୧୭୧ ରନ ପଛରେ ପଡିଥିଲା। ଏହାପରେ ଦ୍ୱିତୀୟ ଇନିଂସ ଆରମ୍ଭ କରି ବାଂଲାଦେଶ ଶୁକ୍ରବାର ତୃତୀୟ ଦିବସ ଖେଳ ଶେଷ ସୁଦ୍ଧା ୨୦ ଓଭରରେ ୩ ଉଇକେଟ ହରାଇ ୪୭ ରନ ସଂଗ୍ରହ କରିଛି। ମ୍ୟାଚ୍ ଆଉ ୨ ଦିନ ବାକିଥିବା ବେଳେ ବାଂଲାଦେଶ ୭ ଉଇକେଟ ହାତରେ ରଖି ୨୧୮ ରନ୍ର ମହତ୍ତ୍ୱପୂର୍ଣ୍ଣ ଅଗ୍ରଣୀ ହାସଲ କରିଛି। ଷ୍ଟମ୍ପ୍ ଅପସାରଣ ବେଳକୁ ଅଧିନାୟକ ମୋମିନୁଲ ହକ୍ ୩୧ ଓ ମୁସ୍ଫିକର ରହିମ ୧୦ ରନ କରି ଅପରାଜିତ ରହିଛନ୍ତି। ମାତ୍ର ୩୩ ରନ୍ରେ ୩ ଉଇକେଟ ହରାଇ ପ୍ରାରମ୍ଭିକ ଝଟକା ଖାଇଥିଲେ ମଧ୍ୟ ବାଂଲାଦେଶ ସୁବିଧାଜନକ ସ୍ଥିତିରେ ରହିଛି। ଓପନର ତାମିମ ଇକ୍ବାଲ ଓ ନାଜମୁଲ ହୋସେନ ସାଣ୍ଟୋ ଖାତା ଖୋଲିବା ପୂର୍ବରୁ ଅଫ୍ ସ୍ପିନର ରାହକିମ୍ କର୍ନଓ୍ବାଲଙ୍କ ଦ୍ୱାରା ଆଉଟ ହୋଇ ପ୍ୟାଭିଲିୟନ ଫେରିଥିଲେ। ତାମିମ ଏଲ୍ବିଡବ୍ଲ୍ୟୁ ହୋଇଥିବା ବେଳେ ସାଣ୍ଟୋ ସ୍ଲିପ୍ରେ ଜେର୍ମାଇନ୍ ବ୍ଲାକଉଡ୍ଙ୍କୁ କ୍ୟାଚ୍ ଦେଇ ଆଉଟ ହୋଇଥିଲେ। ଅନ୍ୟତମ ଓପନର ଶଦମନ ଇସ୍ଲାମ ୫ ରନ କରିଥିବା ବେଳେ ଉଇକେଟକିପର ଜସୁଆ ଡା’ ସିଲଭାଙ୍କୁ କ୍ୟାଚ୍ ଦେଇ ଶାନନ ଗାବ୍ରିଏଲ୍ଙ୍କ ଦ୍ୱାରା ଆଉଟ ହୋଇଥିଲେ। କର୍ନଓ୍ବାଲ ୨ ଓ ଗାବ୍ରିଏଲ୍ ଗୋଟିଏ ଉଇକେଟ ଅକ୍ତିଆର କରିଥିଲେ।
ଓଭରନାଇଟ୍ ପ୍ରଥମ ଇନିଂସ ସ୍କୋର ୭୫/୨ରୁ ଖେଳ ଆରମ୍ଭ କରି ଓ୍ବେଷ୍ଟଇଣ୍ଡିଜ ଶୁକ୍ରବାର ଅଲ୍ଆଉଟ ହୋଇଥିଲା। ଅପରାଜିତ ସ୍କୋର ୪୯ରୁ ଖେଳ ଆରମ୍ଭ କରି ଓପନର କ୍ରେଗ୍ ବ୍ରାଥଓ୍ବେଟ୍ ୭୬ ରନର ଅର୍ଦ୍ଧଶତକୀୟ ପାଳି ଖେଳି ଆଉଟ ହୋଇଥିଲେ। ସେହିପରି ୧୭ ରନରୁ ଖେଳ ଆରମ୍ଭ କରି ଏନ୍କ୍ରୁମା ବୋନର ଅଧିନ ରନ୍ ସଂଗ୍ରହ କରି ନ ପାରି ସମାନ ସ୍କୋରରେ ଆଉଟ ହୋଇଥିଲେ। ଏହାପରେ କାଏଲ ମେୟେର୍ସ ୪୦, ବ୍ଲାକ୍ଉଡ୍ ୬୮, ଜୋଶୁଆ ଡା’ ସିଲ୍ଭା ୪୨ ରନ ସଂଗ୍ରହ କରିଥିବା ବେଳେ ଅନ୍ୟମାନେ ଦୁଇଅଙ୍କ ଛୁଇଁ ପାରି ନ ଥିଲେ। ଏହି କ୍ରମରେ କର୍ନଓ୍ବାଲ ୨, ଜୋମେଲ ଓ୍ବାରିକାନ ୪ ରନ ସଂଗ୍ରହ କରିଥିବା ବେଳେ କେବର ରୋଚ ଖାତା ଖୋଲିପାରି ନ ଥିଲେ। ଗାବ୍ରିଏଲ ବିନା ସ୍କୋରରେ ଅପରାଜିତ ରହିଥିଲେ। ମାତ୍ର ୬ ରନ ମଧ୍ୟରେ ଓ୍ବେଷ୍ଟଇଣ୍ଡିଜ ତା’ର ଅନ୍ତିମ ୫ ଉଇକେଟ ହରାଇଥିଲା। ବୋଲିଂରେ ବାଂଲାଦେଶ ତରଫରୁ ମିରାଜ ସର୍ବାଧିକ ୪, ମୁସ୍ତାଫିଜୁର ରହମାନ, ତାଇଜୁଲ ଇସ୍ଲାମ ଓ ନୟିମ ହାସନ ୨ଟି ଲେଖାଏ ଉଇକେଟ ଅକ୍ତିଆର କରିଥିଲେ।
ସଂକ୍ଷିପ୍ତ ସ୍କୋର:
ବାଂଲାଦେଶ ପ୍ରଥମ ଇନିଂସ- ୧୫୦.୨ ଓଭରରେ ୪୩୦ ଅଲଆଉଟ୍
ଓ୍ବେଷ୍ଟଇଣ୍ଡିଜ ପ୍ରଥମ ଇନିଂସ- ୯୬.୧ ଓଭରରେ ୨୫୯ ଆଲଆଉଟ୍
(ବ୍ରାଥଓ୍ବେଟ- ୭୬, ବ୍ଲାକ୍ଉଡ- ୬୮, ଡା ସିଲଭା- ୪୨, ମେୟେର୍ସ- ୪୦, ମିରାଜ- ୪/୫୮, ମୁସ୍ତାଫିଜୁର- ୨/୪୬, ତାଇଜୁଲ-୨/ ୮୪, ନୟିମ- ୨/୫୪)।
ବାଂଲାଦେଶ ଦ୍ୱିତୀୟ ଇନିଂସ- ୨୦ ଓଭରରେ ୪୭/୩
(ମୋମିନୁଲ- ୩୧*, ମୁସ୍ଫିକର- ୧୦*, କର୍ନଓ୍ବାଲ- ୨/୨୮, ଗାବ୍ରିଏଲ- ୧/୧୩)।