କୋରାପୁଟ,୧୭ା୮(ସ୍ବ.ପ୍ର.): କୋରାପୁଟ ଜିଲାରେ ଲଗାଣ ବର୍ଷା ଯୋଗୁ ମଙ୍ଗଳବାର ଅପରାହ୍ନରେ କୋରାପୁଟ-ରାୟଗଡ଼ା ୩୨୬ ନଂ. ଜାତୀୟ ରାଜପଥର ବଙ୍ଗଳାଗୁଡ଼ା-ଲେନ୍ଦିରିମାଳିଗୁଡା ମଧ୍ୟରେ ଥିବା ଏକ ପୁରୁଣା ପୋଲ ଭୁଶୁଡିପଡିଛି। ଏଥିଯୋଗୁ କୋରାପୁଟ ଓ ପୋଡାଗଡ଼ ମଧ୍ୟରେ ଯାତାୟାତ ସମ୍ପୂର୍ଣ୍ଣ ବନ୍ଦ ହୋଇଯାଇଛି। କାକିରିଗୁମ୍ମା-ଲକ୍ଷ୍ମୀପୁର-ରାୟଗଡା ରାସ୍ତାରେ ଗାଡି ମୋଟର ଚଳାଚଳ ବ୍ୟାହତ ହୋଇଛି।
ମିଳିଥିବା ଖବରରୁ ଜଣାପଡିଛି, କୋରାପୁଟଠାରୁ ୧୪ କିମି ଦୂର ବଙ୍ଗଳଗୁଡା ନିକଟରେ ଥିବା ଏହି ପୋଲର କୋରାପୁଟ ଆଡକୁ ଥିବା ଭାଗ ହଠାତ୍ ଭୁଶୁଡି ପଡିଥିଲା। ବର୍ତ୍ତମାନ ରାୟଗଡାରୁ ଆସୁଥିବା କେବଳ ହାଲୁକା ଯାନଗୁଡିକ ପୋଡାଗଡଠାରୁ ଆଡମଣ୍ଡା ମାଲକାନାଗିରି, ମହାଦେଇପୁଟ ପଞ୍ଚାୟତ ଦେଇ କୋରାପୁଟ ସଦର ମହକୁମାକୁ ଆସୁଥିବା ଜଣାପଡିଛି। ସେହିପରି ରାୟଗଡା ଆଡୁ ଆସୁଥିବା ସମସ୍ତ ଭାରିଯାନ କାକିରିଗୁମ୍ମାଠାରୁ ଭାୟା ଦାମନଯୋଡି-ମାଥାଲପୁଟ-ସେମିଳିଗୁଡା ହୋଇ କୋରାପୁଟକୁ ଆସିବା ବ୍ୟବସ୍ଥା କରାଯାଇଥିବା ଜିଲାପାଳ ଅବଦାଲ ଏମ. ଅଖତାର ସୂଚନା ଦେଇଛନ୍ତି। ଏହି ଘଟଣା ପରେ ଜିଲାପାଳ ସମସ୍ତ ବିଭାଗୀୟ ଯନ୍ତ୍ରୀଙ୍କୁ ଘଟଣା ସ୍ଥଳକୁ ଯାଇ ପରିସ୍ଥିତି ଅନୁଧ୍ୟାନ କରି ରିପୋର୍ଟ ଦେବାକୁ ନିର୍ଦ୍ଦେଶ ଦେଇଛନ୍ତି। ସେହିପରି ଟ୍ରାଫିକ ବ୍ୟବସ୍ଥା ପାଇଁ କାକିରିଗୁମ୍ମା ପୋଲିସ ଓ କୋରାପୁଟ ସଦର ପୋଲିସକୁ କୁହାଯାଇଛି। ଆମ୍ବୁଲାନ୍ସ ଯାତାୟାତ ଓ ଅନ୍ୟ ଜରୁରୀ ବ୍ୟବସ୍ଥା କରିବାକୁ ବିଭାଗୀୟ ଅଧିକାରୀମାନଙ୍କୁ ଜିଲାପାଳ କହିଛନ୍ତି। ସୂଚନାଯୋଗ୍ୟ, ଦୀର୍ଘ ୩୦ ବର୍ଷରୁ ଊର୍ଦ୍ଧ୍ୱ ପୁରୁଣା ହୋଇଥିବା ଏହି ପୋଲ ପୂର୍ବରୁ ଉପଯୁକ୍ତ ରକ୍ଷଣା ବେକ୍ଷଣ ଅଭାବରୁ ପୋଲର ଏକ ପାର୍ଶ୍ୱ ଦୀର୍ଘ ଦିନ ହେଲା ଫାଟି ରହିଥିଲା। ଠିକ୍ ସମୟରେ ମରାମତି ଅଭାବରୁ ଆଜି ଏପରି ଦୁର୍ଘଟଣା ଘଟିଲା ବୋଲି ସ୍ଥାନୀୟ ଲେନ୍ଦିରିମାଳିଗୁଡା ଓ ବଙ୍ଗଳାଗୁଡା ଗ୍ରାମବାସୀ ଅଭିଯୋଗ କରିଛନ୍ତି।
