କେନ୍ଦୁଝର,୨୭ା୧୦(ନରେଶ ଚନ୍ଦ୍ର ପଟ୍ଟନାୟକ): ରାଜ୍ୟ କେନ୍ଦ୍ର ସମବାୟ ବ୍ୟାଙ୍କର ମହାସଂଘର ଆହ୍ବାନ କ୍ରମେ ୫ ଦଫା ଦାବି ନେଇ କେନ୍ଦୁଝର କେନ୍ଦ୍ର ସମବାୟ ବ୍ୟାଙ୍କର କର୍ମଚାରୀଙ୍କ ଚାଲିଥିବା ଆନ୍ଦୋଳନ ଶୁକ୍ରବାର ଶେଷ ହୋଇଛି। ଅକ୍ଟୋବର ୨୫ରୁ ଆରମ୍ଭ ହୋଇ ୨୭ ସରିଛ। ସମବାୟ ବ୍ୟାଙ୍କର ଦୀର୍ଘ ବର୍ଷ ଧରି ଲାଭ କରି ସରକାରଙ୍କୁ ଲାଭାଂଶ ପ୍ରଦାନ କରି ଆସୁଛନ୍ତି ହେଁ କର୍ମଚାରୀମାନଙ୍କ ଆର୍ଥିକ ଦାବି ପ୍ରଦାନ କରିବାରେ ଟାଳଟୁଳ ନୀତି ଅବଲମ୍ବନ କରୁଥିବା ଅଭିଯୋଗ କରିଛନ୍ତି। ସପ୍ତମ ବେତନ କମିଶନ ଅନୁଯାୟୀ, ୨୦୧୬ରୁ ବେତନ ଦେବାକୁ ନିର୍ଦ୍ଦେଶନାମା ଥିଲେ ମଧ୍ୟ ତାହା କାର୍ଯ୍ୟକାରୀ କରାଯାଉ ନ ଥିବାରୁ ଅସନ୍ତୋଷ ବ୍ୟକ୍ତ କରିଛନ୍ତି । ସେହିପରି ୨୦୧୪ ପରଠାରୁ ବ୍ୟାଙ୍କରେ ଚାକିରି କରୁଥିବା କର୍ମଚାରୀଙ୍କ ଅବସର ପରେ ଇପିଏଫ୍ ଓ ସ୍କିମ୍ ଅଧୀନରେ ପେନ୍ସନ ପାଇପାରୁ ନ ଥିବାରୁ ଏକ ପେନ୍ସନ୍ ପାଣ୍ଠି ଗଠନ କରିବାକୁ ଦାବି କରିଛନ୍ତି। ଏହି ପରିପ୍ରେକ୍ଷୀରେ କେନ୍ଦୁଝର କେନ୍ଦ୍ର ସମବାୟ ବ୍ୟାଙ୍କ ଅଧୀନରେ ଥିବା ୧୯ଟି ଶାଖା ଏବଂ କେନ୍ଦୁଝରସ୍ଥିତ ମୁଖ୍ୟ କାର୍ଯ୍ୟାଳୟ ସମ୍ମୁଖରେ ବ୍ୟାନର ପୋଷ୍ଟର ଧରି ବ୍ୟାଙ୍କ କର୍ମଚାରୀମାନେ ଆନ୍ଦୋଳନ ଜାରି ରଖିଥିଲେ। ଏହି ଆନ୍ଦୋଳନରେ ବ୍ୟାଙ୍କ କର୍ମଚାରୀ ସଂଘର ସଭାପତି ବିଶ୍ୱଜିତ୍ ବିଶାଳ, ସମ୍ପାଦକ ବିକାଶ ସାହୁ ସହିତ ବରିଷ୍ଠ କର୍ମଚାରୀ ଆଲୋକ ବଳ, ସନ୍ତୋଷ ମିଶ୍ର, ଜିତେଶ ନାୟକ, ଆଶିଷ ପ୍ରିୟଦର୍ଶୀ, ତାରିଣୀ ଦାସ, ଭୀମସେନ ଜେନା, କାଳନ୍ଦୀ ଦେହୁରୀ, ଇନ୍ଦୁମତି ମହାରଣା, କୀର୍ତ୍ତନ ସାହୁ, ରାଇଟର ମାଝୀ, ପ୍ରଶାନ୍ତ କୁମାର ରାଜ, ଭରତ ପ୍ରଧାନ, ସସ୍ମିତା ସିଂଦେଓ, ହିତାକାଂକ୍ଷୀ ନାଏକ ପ୍ରମୁଖ ସାମିଲ ଥିଲେ।