ଯୋଡ଼ା,୨୭ା୩(ଡି.ଏନ.ଏ):କେନ୍ଦୁଝର ଜିଲା ଯୋଡ଼ା ବ୍ଲକ୍ ଅନ୍ତର୍ଗତ କୋଲହୋ ହୁଣ୍ଡୁଳା ଗ୍ରାମର କେତେଜଣ ଆଦିବାସୀ ମହିଳାଙ୍କ ନାମରେ ଜନୈକ ମହିଳା ବ୍ୟାଙ୍କରୁ ଋଣ କରି ଟଙ୍କା ଆତ୍ମସାତ କରିଥିବା ନେଇ ଅଭିଯୋଗ ହୋଇଛି। ଏନେଇ ବ୍ୟାଙ୍କ ନୋଟିସ୍ ପରେ ଆଦିବାସୀ ମହିଳାମାନେ ଯୋଡ଼ା ଥାନାର ଦ୍ୱାରସ୍ଥ ହୋଇଛନ୍ତି। ଅଭିଯୋଗ ଆଧାରରେ ତଦନ୍ତ କରାଯିବ ବୋଲି ଯୋଡ଼ା ଥାନା ଅଧିକାରୀ ଜୟନାରାୟଣ ଖଣ୍ଡେଇ ସୂଚନା ଦେଇଛନ୍ତି।
ପୋଲିସ ସୂଚନା ମୁତାବକ, ଉକ୍ତ ଗ୍ରାମରେ ରହୁଥିବା ଜନୈକା ମହିଳା ଗ୍ରାମର ୮ ଆଦିବାସୀ ମହିଳାଙ୍କୁ ଏକତ୍ର କରି ବ୍ଲକ୍ରେ ଗ୍ରୁପ କରାଯିବ, ଭତ୍ତା ମିଳିବ କହି ଯୋଡ଼ାକୁ ଆଣିଥିଲେ। ସେଠାରେ ଏକ ଘରୋଇ ବ୍ୟାଙ୍କରେ ସେମାନଙ୍କଠାରୁ ଟିପଚିହ୍ନ ନେଇ ସେମାନଙ୍କୁ ଘରକୁ ପଠାଇ ଦେଇଥିଲେ। ତେବେ କିଛି ଦିନ ପରେ ଘରୋଇ ବ୍ୟାଙ୍କ ପକ୍ଷରୁ ଉକ୍ତ ମହିଳାମାନଙ୍କ ନିକଟକୁ ବ୍ୟାଙ୍କ ଋଣ ଶୁଝିବା ପାଇଁ ଫୋନ ଆସିଥିଲା। ଜଣକ ପିଛା ୨୪ ହଜାର ଟଙ୍କା ଋଣ କରାଯାଇଥିବା ବ୍ୟାଙ୍କ ପକ୍ଷରୁ କୁହାଯାଇଥିଲା। ମହିଳାମାନେ ପ୍ରକୃତରେ କୌଣସି ଋଣ କରି ନ ଥିବାରୁ ସେମାନଙ୍କୁ ବ୍ୟାଙ୍କକୁ ନେଇଥିବା ମହିଳାଙ୍କ ବିରୋଧରେ ଯୋଡ଼ା ଥାନାରେ ଅଭିଯୋଗ କରିଥିଲେ। ଏ ବାବଦରେ ଘରୋଇ ବ୍ୟାଙ୍କର ମ୍ୟାନେଜର ଜ୍ୟୋତିରଞ୍ଜନ ନାୟକଙ୍କୁ ପଚାରିବାରୁ ସେ କହିଥିଲେ, ଦୁଇ ମାସ ହେବ ବ୍ୟାଙ୍କରେ ଯୋଗ ଦେଇଛନ୍ତି। ଏହା ତିନି ମାସ ପୂର୍ବରୁ ଘଟିଛି। ଚଞ୍ଚକତା କରି ଋଣ କରାଯାଇଥିବା ନେଇ ସେ ଯାଞ୍ଚ କରି ଜାଣିବାକୁ ପାଇଛନ୍ତି। ଘଟଣାରେ ପୂର୍ବ ବ୍ୟାଙ୍କ ମ୍ୟାନେଜର ଓ ଜଣେ କର୍ମଚାରୀଙ୍କ ସମ୍ପୃକ୍ତି ଥିବା ସୂଚନା ଦେଇଥିଲେ। ଅଭିଯୁକ୍ତଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ଉଚ୍ଚ କର୍ତ୍ତୃପକ୍ଷଙ୍କୁ ଜଣାଇଥିବା କହିଛନ୍ତି।