ତେହରାନ,୨୮ା୧୧: ଇରାନରେ ୧୯୭୯ ବିପ୍ଳବ ପରେ ଆମେରିକା ସମର୍ଥତ୍ତ ରାଜତନ୍ତ୍ରର ଅବସାନ ଘଟିଥିଲା। ଏହାର ୪ ବର୍ଷ ପରେ ପ୍ରତିଷ୍ଠିତ ଇସ୍ଲାମୀୟ ଗଣତନ୍ତ୍ରରେ ହିଜାବ ପରିଧାନକୁ ଦେଶରେ ବାଧ୍ୟତାମୂଳକ କରାଯାଇଥିଲା। ବେଶଭୂଷାକୁ ନେଇ ରୁଚିରେ ପରିବର୍ତ୍ତନ ଆସିବାରୁ ମହିଳାମାନେ ମଧ୍ୟ ଟାଇଟ୍ ଜିନ୍ସ ପିନ୍ଧି ବୁଲୁଥିବା ଦେଖିବାକୁ ମିଳିଥିଲା। କିନ୍ତୁ ଗତ ଜୁଲାଇରେ ଅତିରକ୍ଷଣଶୀଳ ରାଷ୍ଟ୍ରପତି ଇବ୍ରାହିମ୍ ରଇସି ସବୁ ସରକାରୀ ସଂସ୍ଥାରେ ହିଜାବ ଆଇନକୁ କଡ଼ାକଡ଼ି କରିବାକୁ ନିର୍ଦ୍ଦେଶ ଦେଇଥିଲେ। ତେବେ ଏହି ନିୟମକୁ ଅନେକ ମହିଳା ମାନି ନ ଥିଲେ। ଅବଜ୍ଞାକାରୀମାନଙ୍କ ମଧ୍ୟରେ ଥିଲେ ୨୨ ବର୍ଷୀୟା ମହଶା ଅମିନି। ସେପ୍ଟେମ୍ବର ୧୬ରେ ମୋରାଲିଟି ପୋଲିସ ମାଡ଼ରେ ମହଶାଙ୍କ ମୃତ୍ୟୁ ଘଟିଥିଲା।
ଏହି ହାଜତ ମୃତ୍ୟୁକୁ ନେଇ ଦେଶବ୍ୟାପୀ ଆନ୍ଦୋଳନ ଚାଲିଛି। ପୋଲିସର ମାତ୍ରାଧିକ କାର୍ଯ୍ୟାନୁଷ୍ଠାନରେ ଅଦ୍ୟାବଧି ୪୫୦ ବିକ୍ଷୋଭକାରୀଙ୍କ ଜୀବନ ଯାଇଥିବାବେଳେ ୧୮,୧୭୩ ଆହତ ହେଲେଣି। ମୃତକଙ୍କ ମଧ୍ୟରେ ୬୩ ପିଲା ଓ ୬୦ ସୁରକ୍ଷା କର୍ମୀ ଅଛନ୍ତି। ଅନ୍ୟପକ୍ଷେ ‘ପାଶ୍ଚାତ୍ୟ ଶତ୍ରୁ’ ଦଙ୍ଗା ଉସୁକାଉଥିବାରୁ ଏପରି ସ୍ଥିତି ଉପୁଜିଥିବା ତେହରାନ କହିଛି। ଏଭଳି ସମୟରେ କୋମ୍ ପ୍ରଦେଶର ବ୍ୟାଙ୍କ ମ୍ୟାନେଜର ହିଜାବ ପିନ୍ଧି ନ ଥିବା ଜଣେ ମହିଳାଙ୍କୁ ବ୍ୟାଙ୍କିଙ୍ଗ୍ ସର୍ଭିସ୍ ଦେବାରୁ ଗଭର୍ନରଙ୍କ ନିର୍ଦ୍ଦେଶକ୍ରମେ ତାଙ୍କୁ ନିଜ ଚାକିରି ହରାଇବାକୁ ପଡ଼ିଛି। ଇରାନର ଅଧିକାଂଶ ବ୍ୟାଙ୍କ ସରକାରୀ ନିୟନ୍ତ୍ରଣରେ ରହିଛି। ତେଣୁ ହିଜାବ ନିୟମର ଅନୁପାଳନକୁ ସୁନିଶ୍ଚିତ କରିବା ଏପରି ସଂସ୍ଥାଗୁଡ଼ିକର ମ୍ୟାନେଜରଙ୍କ ଦାୟିତ୍ୱ ବୋଲି ସରକାରଙ୍କ ପକ୍ଷରୁ କୁହାଯାଇଛି।
ସୁପ୍ରିମ ଲିଡରଙ୍କ ଭାଣିଜୀ ଗିରଫ
ଇରାନର ସୁପ୍ରିମ ଲିଡର ଆୟାତୋଲ୍ଲା ଖାମେନେଇଙ୍କ ଭାଣିଜୀ ତଥା ଜଣାଣୁଣା ସିଭିଲ୍ ରାଇଟ୍ସ ଆକ୍ଟିଭିଷ୍ଟ ଫରିଦେ ମୋରାଦଖାନି ତେହରାନ ସହ ସବୁ ପ୍ରକାର ସମ୍ପର୍କ ଛିନ୍ନ କରିବା ପାଇଁ ବିଦେଶୀ ସରକାରଙ୍କୁ ଅନୁରୋଧ କରିଛନ୍ତି। ପେସାରେ ଇଞ୍ଜିନିୟର ଫରିଦେଙ୍କ ସ୍ବର୍ଗତ ପିତା ଅଲୀ ମୋରାଦଖାନି ଅରଙ୍ଗେ ବିରୋଧୀ ଦଳର ଜଣେ ବରିଷ୍ଠ ନେତା ଥିଲେ। ସେ ଖାମେନେଇଙ୍କ ଭଉଣୀଙ୍କୁ ବିବାହ କରିଥିଲେ। ଇସ୍ଲାମିକ୍ ରିପବ୍ଲିକ୍ ବିରୋଧୀ ଆଭିମୁଖ୍ୟ ପାଇଁ ତାଙ୍କୁ ଏକ ଜେଲରେ ରଖାଯାଇଥିବାବେଳେ ନିକଟରେ ତାଙ୍କ ମୃତ୍ୟୁ ଘଟିଛି। ଇତିମଧ୍ୟରେ ଫରିଦେ ଅନ୍ଲାଇନ୍ରେ ଏକ ଭିଡିଓ ଶେୟାର କରିଥିଲେ। ଏଥିରେ ସେ ଦେଶବାସୀଙ୍କୁ ସମ୍ବୋଧନ କରି କହିଥିଲେ, ହେ ମୁକ୍ତ ଜନ ସାଧାରଣ, ଆମ ସହ ରୁହ।
ଏହି ହତ୍ୟାକାରୀ ଓ ଶିଶୁହନ୍ତା ସରକାରକୁ ସମର୍ଥନ ବନ୍ଦ କର। ଏହି ଶାସନ ନିଜର କୌଣସି ଧର୍ମୀୟ ସିଦ୍ଧାନ୍ତ ପ୍ରତି ବିଶ୍ୱସ୍ତ ନୁହେଁ। କ୍ଷମତାରେ ରହିବା ଓ ବଳ ପ୍ରୟୋଗ କରିବା ଛଡ଼ା ଏହାକୁ କିଛି ଜଣାନାହିଁ। ତେଣୁ ସମସ୍ତ ସ୍ବାଧୀନ ଓ ଗଣତାନ୍ତ୍ରିକ ରାଷ୍ଟ୍ର ଇରାନରୁ ନିଜ ନିଜ ପ୍ରତିନିଧିଙ୍କୁ ଫେରାଇ ନେଇ ଏହି ବର୍ବର ଶାସନକୁ ଉଚିତ ଜବାବ ଦିଅନ୍ତୁ ବୋଲି ସେ କହିଥିଲେ। ଏହା ପରେ ନଭେମ୍ବର ୨୩ରେ ଫରିଦେଙ୍କୁ ପୋଲିସ ଗିରଫ କରିଥିଲା। ତାଙ୍କ ଦୋଷ ହେଉଛି ଇରାନର ପୂର୍ବତନ ରାଜକୀୟ ଶାସକଙ୍କୁ ପ୍ରଶଂସା କରିବା। ଇରାନର ଉଚ୍ଚ ପଦାଧିକାରୀଙ୍କ ସମ୍ପର୍କୀୟମାନେ ସରକାରକୁ ସମାଲୋଚନା କରିବା ନୂଆ ନୁହେଁ। ୨୦୧୨ରେ ପୂର୍ବତନ ରାଷ୍ଟ୍ରପତି ଆକବର ହାଶେମି ରଫସାଞ୍ଜାନିଙ୍କ ଝିଅ ଫାଜେ ହାଶେମିଙ୍କୁ ଦେଶ ବିରୋଧୀ ଅଭିଯାନ ପାଇଁ ଜେଲ ଯିବାକୁ ପଡ଼ିଥିଲା।