![](https://www.dharitri.com/wp-content/uploads/2022/09/Untitled-1-246.jpg)
ବେରୁଟ, ୧୫ା୯: ଭଉଣୀର କ୍ୟାନ୍ସର ଚିକିତ୍ସା ପାଇଁ ଲେବାନନ୍ର ଜଣେ ମହିଳା ବୁଧବାର ବ୍ୟାଙ୍କ ଲୁଟିଛନ୍ତି। ଆଶ୍ଚର୍ଯ୍ୟର କଥା ହେଉଛି ସେ ଲୁଟ୍ବେଳେ ବ୍ୟାଙ୍କ କର୍ମଚାରୀଙ୍କୁ ଡରାଇବା ପାଇଁ ଖେଳଣା ବନ୍ଧୁକ ଧରିଥିଲେ। ବ୍ଲୋମ୍ ବ୍ୟାଙ୍କର ବେରୁଟ୍ ଶାଖାରେ ଲୁଟ୍ ବେଳର ଭିଡିଓ ସେ ଲାଇଭ୍ ଷ୍ଟ୍ରିମ୍ ମଧ୍ୟ କରିଥିଲେ।
କରିଥିବା ମହିଳା ଜଣକ ହେଲେ ସାଲି ହାଫିଜ୍। ୨୮ ବର୍ଷୀୟା ସାଲି ଜଣେ ଫ୍ୟାଶନ ଡିଜାଇନର ଏବଂ ସାମାଜିକ କର୍ମୀ। ଦେଶର ଅର୍ଥନୀତି ଭୁଶୁଡ଼ି ପଡ଼ିଥିବାରୁ ବହୁ ଜମାକାରୀଙ୍କ ଅର୍ଥ ବିଭିନ୍ନ ବ୍ୟାଙ୍କରେ ଫସିରହିଛି। ତେଣୁ ଲୋକେ ସେମାନଙ୍କ ଜମାପୁଞ୍ଜି ବ୍ୟାଙ୍କଗୁଡ଼ିକରୁ ବାହାର କରିବା ପାଇଁ ଆସୁଥିଲେ ହେଁ ନିରାଶ ହୋଇ ଫେରିବାକୁ ପଡ଼ୁଛି। ବ୍ଲୋମ୍ ବ୍ୟାଙ୍କରେ ସାଲିଙ୍କ ପରିବାର ମଧ୍ୟ ଅର୍ଥ ଜମା କରିଥିଲେ। ହେଲେ ସେ ଅର୍ଥ ଉଠାଣ କରି ନ ପାରିବାରୁ ଲୁଟ୍ର ବାଟ ଆପଣାଇଥିବା କହିଛନ୍ତି।
ଲାଇଭ୍ ଭିଡିଓରେ ସାଲି ବ୍ୟାଙ୍କ କର୍ମଚାରୀଙ୍କ ଉପରେ ପାଟି କରୁଥିବା ଦେଖିବାକୁ ମିଳିଛି। ‘ମୁଁ ସାଲି ହାଫିଜ୍, ମୋ ଭଉଣୀ ହସ୍ପିଟାଲରେ ମୃତ୍ୟୁ ସହ ସଂଘର୍ଷ କରୁଛି। ତାଙ୍କ ଜମାଅର୍ଥ ନେବାକୁ ଏଠାକୁ ଆସିଛି। କାହାରିକୁ ହତ୍ୟା କରିବି ନାହିଁ କିମ୍ବା ଗୁଳି ଚଳାଇବି ନାହିଁ। ମୋ ଅଧିକାର ସାବ୍ୟସ୍ତ କରିବାକୁ ବ୍ୟାଙ୍କରେ ପହଞ୍ଚିଛି’ ବୋଲି ସେ ଭିଡିଓରେ କହୁଥିବା ଶୁଣାଯାଉଛି। କ୍ୟାନ୍ସର ଚିକିତ୍ସା ପାଇଁ ୫୦ ହଜାର ଡଲାର ଆବଶ୍ୟକ। ତାଙ୍କ ପରିବାର ଡିପୋଜିଟ୍ କରିଥିବା ୨୦ ହଜାର ଡଲାରରୁ ପ୍ରାୟ ୧୩ ହଜାର ଡଲାର ସେ ନେଇଥିବା ମିଡିଆ ଆଗରେ କହିଛନ୍ତି। ଲୁଟ୍ ବେଳେ ସେ ଖେଳଣା ବନ୍ଧୁକ ଧରିଥିଲେ ବୋଲି ପ୍ରକାଶ କରିଛନ୍ତି। ସାଲି ଓ ତାଙ୍କ ସହଯୋଗୀ ବ୍ୟାଙ୍କ ଝରକା ଭାଙ୍ଗି ସେଠାରୁ ଖସିଯାଇଥିଲେ।
ସୋସିଆଲ ମିଡିଆରେ ଭାଇରାଲ ହେବା ପରେ ଲେବାନନ୍ବାସୀ ସାଲିଙ୍କୁ ପ୍ରଶଂସା କରିଛନ୍ତି। ନିଜ କଷ୍ଟ ଉପାର୍ଜିତ ଟଙ୍କା ପାଇବା ପାଇଁ କୌଣସି ବିକଳ୍ପ ନାହିଁ ବୋଲି ସେମାନେ ମତ ଦେଇଛନ୍ତି। ୨୦୧୯ରୁ ଲେବାନନ୍ର ଅର୍ଥନୀତି ଭୁଶୁଡ଼ି ପଡ଼ିଛି। ସେଠାକାର ମୁଦ୍ରାର ମୂଲ୍ୟ ୯୦% ପର୍ଯ୍ୟନ୍ତ ହ୍ରାସ ପାଇଛି। ଲୋକେ ସେମାନଙ୍କ ଜମାଅର୍ଥ ବ୍ୟାଙ୍କରୁ ଉଠାଇପାରୁନାହାନ୍ତି। ଦେଶରେ ଦାରିଦ୍ର୍ୟ ହାର, ବେରୋଜଗାରୀ ବହୁମାତ୍ରାରେ ବୃଦ୍ଧି ପାଇଛି।